ރަޝިޔާގެ ވެރިރަށް މޮސްކޯގައި ބާއްވާ ގޭސް އެކްސްޕޯޓްކުރާ ޤައުމުތަކުގެ ފޯރަމް (ޖީއީސީއެފް) ސަމިޓުގެ ހަވާސާގައި، ރަޝިޔާގެ ރައީސް ވްލަދިމީރް ޕޫޓިން ވަނީ ޤަޠަރުގެ އަމީރު ޝެއިޚް ތަމީމް ބިން ޙަމަދު އަލް-ޘާނީއާއި އީރާނުގެ ރައީސް މަސްޢޫދު ޕެޒެޝްކިއާންއާއެކު މުހިންމު މަޝްވަރާތަކެއް ބާއްވާފައެވެ.
އަންގާރަ ދުވަހު މޮސްކޯގައި ބޭއްވި 8 ވަނަ ޖީއީސީއެފް ސަމިޓުގައި ވާހަކަދައްކަމުން އީރާނުގެ ރައީސް ވަނީ، ހަކަތަ އުފައްދާ މަރުކަޒުތަކަށް ޙަމަލާދިނުމާއި ހުޅަނގުން ދަތިކުރުމުގެ ފިޔަވަޅުތައްެ އެޅުމަކީ ”އިޤްތިޞާދީ ޓެރަރިޒަމް“ ކަމަށް ސިފަކޮށްފައެވެ. ރައީސް ޕޫޓިންވެސް ވަނީ ހުޅަނގުގެ ފިޔަވަޅުތަކަށް ފާޑުކިޔައި، ދުނިޔޭގެ ހަކަތައިގެ ރައްކާތެރިކަން ދެމެހެއްޓުމަށް ގޭސް އެކްސްޕޯޓްކުރާ ޤައުމުތަކުގެ އެއްބާރުލުން މުހިންމުކަން ފާހަގަކޮށްފައެވެ.
ޕޫޓިންއާއެކު ބޭއްވި ބައްދަލުވުމުގެ ކުރިން، ޤަޠަރުގެ އަމީރު ޝެއިޚް ތަމީމް ވަނީ އީރާނުގެ ރައީސް ޕެޒެޝްކިއާންއާއެކު ވަކިން ބައްދަލުކޮށްފައެވެ. މި ބައްދަލުވުމުގައި ދެޤައުމުގެ ދެމެދުގައިވާ ސިޔާސީ، އިޤްތިޞާދީ އަދި ހަކަތައިގެ ދާއިރާގެ ގުޅުންތައް ވަރުގަދަކުރުމާ މެދު މަޝްވަރާކުރިއެވެ.
ޤަޠަރަކީ އެމެރިކާއާއި އީރާނާ ދެމެދު ސުލްޙައިގެ މެދުވެރިއެއްގެ ދައުރު އަދާކުރާ ޤައުމަކަށްވާއިރު، ޤަޠަރުގެ ޚާރިޖީ ވުޒާރާއިން ވަނީ ސުލްޙައިގެ މަޝްވަރާތައް ކާމިޔާބުކުރުމަށްޓަކައި ހޮރްމޫޒް ކަނޑުއޮޅި ހުޅުވާލައި، އީރާނުން އިޚްލާޞްތެރިކަން ދެއްކުމަށް ގޮވާލާފައެވެ.
