”ދިވެހީންގެ އުފެއްދުންތެރިކަމުގެ މައުރަޒު 2026“ ޖުމްލަ 4،404 އުފެއްދުމާއެކު ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު މިރޭ ހުޅުވައިދެއްވައިފިއެވެ. ހުޅުމާލެ ސެންޓްރަލް ޕާކުގައި ކުރިއަށްދާ މި މައުރަޒަކީ މިއަދުން ފެށިގެން ކުރިއަށް އޮތް މަހުގެ 2 ވަނަ ދުވަހުގެ ނިޔަލަށް، 9 ދުވަހުގެ މުއްދަތަށް އާންމުންނަށް ހުޅުވާލައިގެން ކުރިއަށްގެންދާ ހަރާތެކެވެ. މިއަހަރުގެ މައުރަޒުގައި ބައިވެރިވުމަށް 780 ފަރާތަކުން ރަޖިސްޓްރީކުރިއިރު، 419 ފަރާތަކުން ވަނީ އުފެއްދުންތައް ހުށަހަޅާފައެވެ. މިއީ 2025 ވަނަ އަހަރާ އަޅާބަލާއިރު 83.5 އިންސައްތައިގެ ބޮޑު ކުރިއެރުމެކެވެ.
މި މައުރަޒުގައި އަމިއްލަ ފަރުދުންނާއި މަސައްކަތްތެރިންގެ އިތުރުން ވިޔަފާރިތަކާއި، ނުކުޅެދުންތެރިކަން ހުންނަ ފަރާތްތަކާއި، ތައުލީމީ މަރުކަޒުތަކާއި ކުންފުނިތަކުން ވަނީ ބައިވެރިވެފައެވެ. ޖުމްލަ 16 ދާއިރާއަކުން 73 ގިންތިއަކަށް ބަހާލައިގެން ކުރިއަށްދާ މި މައުރަޒުގައި އެންމެ ގިނަ އުފެއްދުން ހުށަހަޅާފައިވަނީ ސަގާފީ އަތްތެރި މަސައްކަތުގެ ދާއިރާއިން (1،695 އުފެއްދުން) އަދި ކްރިއޭޓިވް އާޓްސްގެ ދާއިރާއިން (920 އުފެއްދުން) ނެވެ. މީގެއިތުރުން ކާބޯތަކެތި، ފެޝަން، އައިސީޓީ، އަދަބިއްޔާތު، މަސްވެރިކަން އަދި އިޔާދަކުރަނިވި ހަކަތަ ފަދަ ދާއިރާތަކުންވެސް ގިނަ އުފެއްދުންތަކެއް ވަނީ ބައިވެރިކޮށްފައެވެ.
މުޅި މައުރަޒުން ޖުމްލަ 298 އެވޯޑު ދިނުމަށް ހަމަޖެހިފައިވާއިރު، 134 ބައިވެރިއަކު ވަނީ ތަފާތު ވަނަތައް ހާސިލުކޮށްފައެވެ. މީގެތެރޭގައި ޚާއްޞަ އެހީއަށް ބޭނުންވާ 14 ބައިވެރިއަކު 76 އެވޯޑު ހޯދިކަން ހިމެނެއެވެ. ތަފާތު 7 ޑިސްޓްރިކްޓަކަށް ބަހާލައިގެން ކުރިއަށްގެންދާ މި މައުރަޒަކީ ދިވެހި އުފެއްދުންތެރިންނަށް މާކެޓުގައި އައު ފުރުސަތުތައް ހޯދައިދީ، ބޭރުގެ ފަރާތްތަކާ ގުޅިގެން ވިޔަފާރިތައް ބައިނަލްއަޤްވާމީ ފެންވަރަކަށް ފުޅާކުރުމަށް ލިބިގެންދާ މުހިންމު ފުރުސަތެކެވެ.
