މިއަހަރު ފާހަގަކުރުމަށް ހަމަޖެހިފައިވާ 46 ވަނަ މަސްވެރިންގެ ދުވަހާ ގުޅުވައިގެން، ހާއްސަ ބަހުސް މުބާރާތެއް ބޭއްވުމަށް ވާދަކުރުމުގެ ފުރުސަތު ހުޅުވާލައިފިއެވެ.
މަސްވެރިކަމާ ބެހޭ ވުޒާރާއިން ކޮށްފައިވާ އިއުލާނެއްގައި ބަޔާންކޮށްފައިވާ ގޮތުގައި، މި މުބާރާތް ކުރިއަށް ގެންދިއުމަށް ހަމަޖެހިފައިވަނީ ”މަސްވެރިކަމުގެ ސިނާއަތުގައި ޒުވާނުންގެ ބައިވެރިވުން އިތުރުކުރުން“ މި މައުލޫއުގެ ދަށުންނެވެ. މި ބަހުސްގައި މަތީ ތައުލީމު ފޯރުކޮށްދޭ މަރުކަޒުތަކާއި، އެކެޑެމީތަކާއި، ކްލަބް ޖަމިއްޔާތަކުގެ އިތުރުން ސަރުކާރުގެ އިދާރާތަކަށާއި ކުންފުނިތަކަށް ޓީމުތައް ބައިވެރިކުރުމުގެ ފުރުސަތު ވަނީ ދީފައެވެ. އަދި މީގެ އިތުރުން އަމިއްލަ ގޮތުން ވެސް ޓީމުތަކަށް ބައިވެރިވެވޭނެއެވެ.
މުބާރާތުގެ ގަވާއިދުގައިވާ ގޮތުން، ކޮންމެ ޓީމެއްގައި އަސާސީ 3 ބައިވެރިން ހިމެނެންޖެހެއެވެ. އަދި ބޭނުންނަމަ ބަދަލުގައި އަރާނެ އިތުރު 2 ބައިވެރިން ޓީމުގައި ހިމެނުމުގެ އިހުތިޔާރު އޮންނާނެއެވެ. މި މުބާރާތުގައި ބައިވެރިވެވޭނީ މިއަހަރުގެ ޖަނަވަރީ މަހުގެ ނިޔަލަށް އުމުރުން 16 އަހަރު ފުރިފައިވާ ފަރާތްތަކަށެވެ. މުބާރާތް ނިމުމުން، އެންމެ މޮޅު 3 ޓީމާއި އެންމެ މޮޅު 3 ބަހުސްކުރުންތެރިން ހޮވުމަށް ވަނީ ކަނޑައަޅާފައެވެ
މި ބަހުސް މުބާރާތް ބޭއްވުމަށް ހަމަޖެހިފައިވަނީ އަންނަ ޑިސެމްބަރު މަހުގެ 3 އިން 7 ވަނަ ދުވަހުގެ ނިޔަލަށެވެ.
މުބާރާތުގައި ވާދަކުރަން އެދޭ ޓީމުތަކުން އަންނަ މަހުގެ 5 ވާ ދުވަހުގެ މެންދުރުފަހު 14:00 ގެ ކުރިން، އެކަމަށް ހާއްސަ ފޯމު ފުރިހަމަކުރުމަށްފަހު ވުޒާރާއަށް ހުށަހެޅުމަށް މަސްވެރިކަމާ ބެހޭ ވުޒާރާއިން ވަނީ އެދިފައެވެ.
