ކުރިއަށް އޮތް 1448 ވަނަ އަހަރުގެ ބަރަކާތްތެރި ރަމަޟާން މަހަށް ޚާއްޞަކޮށްގެން މާލޭ ސިޓީ ކައުންސިލުން އިންތިޒާމުކޮށްގެން ބާއްވާ ކީރިތި ޤުރްއާން ކިޔެވުމާއި މަދަޙަ ކިޔުމުގެ މުބާރާތުގައި ބައިވެރިވުމުގެ ފުރުޞަތު އާންމުކޮށް ހުޅުވާލައިފިއެވެ. މި ދެ މުބާރާތުގައި ބައިވެރިވާން އެދޭ ފަރާތްތަކަށް އެޕްލިކޭޝަން ހުށަހެޅުމުގެ ފުރުޞަތު އަންނަ ނޮވެންބަރު މަހުގެ 5 ވަނަ ދުވަހުގެ މެންދުރުފަހު 2:00 އާ ހަމައަށް އޮންނާނެއެވެ.
މާލޭ ސިޓީ ކައުންސިލުން މަޢުލޫމާތު ދޭ ގޮތުގައި، ކީރިތި ޤުރުއާން މުބާރާތް ކުރިއަށްދާނީ ބަލައިގެން ކިޔެވުމުގެ ގޮފީގެ އިތުރުން ނުބަލައި ކިޔެވުމުގެ ގޮފި ހިމެނޭހެން ދެ ގޮތްޕަކަށް ބަހާލައިގެންނެވެ. މި މުބާރާތްތަކުގައި 6 އަހަރުން ދަށާއި، 9 އަހަރުން ދަށާއި، 11 އަހަރުން ދަށާއި، 13 އަހަރުން ދަށާއި، 16 އަހަރުން ދަށުގެ އިތުރުން 19 އަހަރުން ދަށުގެ އުމުރުފުރާތަކުން ބައިވެރިވެވޭނެއެވެ. މީގެ ތެރެއިން ޖޫނިއަރ ގްރޫޕުގައި 9 އަހަރުން ދަށާއި 11 އަހަރުން ދަށުގެ އުމުރުފުރާ ހިމެނޭއިރު، ސީނިއަރ ގްރޫޕުގައި ހިމެނެނީ 13 އަހަރުން ދަށާއި، 16 އަހަރުން ދަށާއި 19 އަހަރުން ދަށުގެ އުމުރުފުރާއެވެ. އުމުރުފުރާ ކަނޑައެޅުމުގައި ބަލާނީ 1 ޖަނަވަރީ 2026 އަށް ދަރިވަރަށް ފުރޭ އަހަރަށެވެ.
މުބާރާތުގެ 6 އަހަރުން ދަށުގެ އުމުރުފުރާގެ ދަރިވަރުންގެ ކިޔެވުމާއި މަދަޙަ ކިޔުން އިންސާފުނުކުރާ ގޮތަށް ހަމަޖެހިފައިވާއިރު، އެ އުމުރުފުރާގެ ދަރިވަރުންނަށް ޚަތިމުން ބޭނުން ކޮންމެ ތަނަކުން 5 ފޮޅުވަތާއި 7 ފޮޅުވަތާ ދެމެދުގެ މިންވަރެއް ކިޔެވޭނެއެވެ. އަދި ޤުރުއާން މުބާރާތުގައި ކޮންމެ ދަރިވަރަކަށް ވެސް ބައިވެރިވެވޭނީ އެއް އުމުރުފުރާގެ އެއް ގޮފީގައެވެ.
މި މުބާރާތްތަކުން ވަނަތަކަށް ހޮވޭ ދަރިވަރުންނަށް ބޮޑެތި ފައިސާގެ އިނާމުތަކެއް ވަނީ ކަނޑައަޅާފައެވެ. އެގޮތުން ޤުރުއާން މުބާރާތުގެ ބަލައިގެން އަދި ނުބަލައި ކިޔެވުމުގެ ގޮފިން މުޅި މުބާރާތުން 1 ވަނައަށް 50،000 ރުފިޔާ، 2 ވަނައަށް 25،000 ރުފިޔާ އަދި 3 ވަނައަށް 15،000 ރުފިޔާ ޓްރޮފީއާއި ސެޓްފިކެޓާއެކު ދިނުމަށް ވަނީ ހަމަޖެހިފައެވެ. މީގެ އިތުރުން 4 ވަނައަށް 7،000 ރުފިޔާ އަދި 5 ވަނައަށް 5،000 ރުފިޔާ ޕްލާކާއި ސެޓްފިކެޓާއެކު ދިނުމަށް ނިންމާފައިވާއިރު، މަދަޙަ މުބާރާތުގެ މުޅި މުބާރާތުން 1 ވަނައިން 5 ވަނައަށް ހޮވޭ ފަރާތްތަކަށް ވެސް ކަނޑައަޅާފައިވަނީ ހަމަ މި އަދަދުތަކުގެ ފައިސާގެ އިނާމުތަކެވެ.
ވަކިވަކި އުމުރުފުރާތަކުން 1 ވަނައަށް 10،000 ރުފިޔާ، 2 ވަނައަށް 7،000 ރުފިޔާ، 3 ވަނައަށް 5،000 ރުފިޔާ، 4 ވަނައަށް 3،000 ރުފިޔާ އަދި 5 ވަނައަށް 2،000 ރުފިޔާ ދިނުމަށް ވަނީ ހަމަޖެހިފައެވެ. އަދި ޖޫނިއަރާއި ސީނިއަރ ގްރޫޕުން 1 ވަނައަށް އަންނަ ފަރާތްތަކަށް 15،000 ރުފިޔާ، 2 ވަނައަށް 10،000 ރުފިޔާ، 3 ވަނައަށް 7،000 ރުފިޔާ، 4 ވަނައަށް 5،000 ރުފިޔާ އަދި 5 ވަނައަށް 3،000 ރުފިޔާގެ އިނާމު ދިނުމަށް ވަނީ ކަނޑައަޅާފައެވެ.
މި މުބާރާތްތަކުގައި ބައިވެރިވާން އެދޭ ދަރިވަރުން މާލޭ ސިޓީ ކައުންސިލްގެ ޚާއްޞަ ޕޯޓަލް މެދުވެރިކޮށް އެޕްލިކޭޝަން ހުށަހެޅޭނެ ކަމަށް އެ އިދާރާއިން މަޢުލޫމާތު ދެއެވެ. އަދި މުބާރާތާ ގުޅޭ އިތުރު މަޢުލޫމާތު ހޯދުމަށް ސިޓީ ކައުންސިލްގެ ކޯލް ސެންޓަރު ނަންބަރު 1622 އަށް ގުޅުމަށް ވަނީ އެދިފައެވެ.
