ވިލިމާލޭގައި ޗައިނާ ސަރުކާރުގެ ހިލޭ އެހީގެ ދަށުން އަޅާ 112 އެނދުގެ ޓާޝަރީ ހޮސްޕިޓަލުގެ ޢަމަލީ މަސައްކަތް ފެށުމަށްޓަކައި ސައިޓް ތައްޔާރުކުރުމުގެ ގޮތުން، މިހާރު ހުރި ހޮސްޕިޓަލުން ދެމުންދިޔަ ޞިއްޙީ ޚިދުމަތްތައް އެ އަވަށުގައި ހުންނަ ”އަމާން ހިޔާ“ އިމާރާތަށް މިއަދު ވަނީ ބަދަލުކޮށްފައެވެ. މި ބަދަލާއެކު މިހާރު ހުރި އިމާރާތް ހުސްކޮށް، އައު ހޮސްޕިޓަލް އެޅުމަށްޓަކައި ބިން ސާފުކުރުމުގެ މަސައްކަތް ވަނީ ފަށާފައެވެ.
ޚިދުމަތްތައް ވަގުތީ ގޮތުން ބަދަލުކުރި ”އަމާން ހިޔާ“ އިމާރާތަކީ ކުރީގެ ކުޑަކުދިންގެ ހިޔާ ހިންގި އިމާރާތަށްވާއިރު، މާލެ ސިޓީ ގްރޫޕް އޮފް ހޮސްޕިޓަލްސްގެ ސީއީއޯ އިބްރާހީމް ޢަބްދުއްރައްޒާޤު ޙަލީމް ވިދާޅުވީ ޚިދުމަތްތައް ބަދަލުކުރުމުގެ ކުރިން އެ ތަނަށް ގެންނަންޖެހޭ އެންމެހައި ބަދަލުތައް ގެނެސް ފުރިހަމައަށް ތައްޔާރުކޮށްފައިވާ ކަމަށެވެ. އަދި ވަގުތީ އިމާރާތަށް ޚިދުމަތްތައް ބަދަލުވި ނަމަވެސް، ކުރިން ވިލިމާލޭ ހޮސްޕިޓަލުން ރައްޔިތުންނަށް ލިބެމުންދިޔަ އެއްވެސް ޚިދުމަތަކަށް މެދުކެނޑުމެއް ނާންނާނެ ކަމުގެ ޔަޤީންކަން އޭނާ ދެއްވިއެވެ.
”ވިލިމާލެ ޗައިނާ މޯލްޑިވްސް ފްރެންޑްޝިޕް ހޮސްޕިޓަލް“ ގެ ނަމުގައި ތަރައްޤީކުރާ މި ޒަމާނީ ހޮސްޕިޓަލުގައި އޯޕީޑީއާއި ކުއްލި ފަރުވާގެ ޚިދުމަތުގެ އިތުރުން، ބަލިތައް ދެނެގަތުމަށް ޚާއްޞަ ބައިތަކާއި، އެޑްމިޓްކޮށްގެން ފަރުވާދޭ ވޯޑުތައް ހިމެނޭނެއެވެ. މީގެއިތުރުން އިސްރަށްވެހިންނާއި ދިގު މުއްދަތަކަށް އެޑްމިޓްކޮށްގެން ފަރުވާދޭންޖެހޭ މީހުންނަށް ޚާއްޞަ ސެންޓަރެއްވެސް މި ހޮސްޕިޓަލުގައި ގާއިމުކުރުމަށް ވަނީ ހަމަޖެހިފައެވެ.
ސަރުކާރުން މި މަޝްރޫޢު ކުރިއަށްގެންދަނީ ތިލަމާލެ ބްރިޖާއެކު ގުޅީފަޅާއި ގިރާވަރުފަޅު ހިއްކައި މީހުން އާބާދުވާން ފެށުމުން އެ ސަރަޙައްދަށް ބޭނުންވާނެ ޞިއްޙީ ޚިދުމަތްތައް ފުޅާކުރުމުގެ މަޤްޞަދުގައެވެ. މިހާރު ހުރި ވިލިމާލޭ ހޮސްޕިޓަލުގެ ޖާގަ ކުޑަވުމުގެ ސަބަބުން އިތުރަށް ތަރައްޤީކުރެވެން ނެތުމުން، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ވަޢުދުފުޅާ އެއްގޮތަށް އައު ހޮސްޕިޓަލް އިމާރާތްކުރުމާއި ވަސީލަތްތައް ގާއިމުކުރުމުގެ ހުރިހާ މަސައްކަތެއްވެސް ކުރިއަށްގެންދާނީ ޗައިނާ ސަރުކާރުންނެވެ.
މި މަޝްރޫޢުގެ ދަށުން ދެން އެންމެ އަވަހަށް ކުރިއަށްދާނީ މަސައްކަތް ހަވާލުކުރާނެ ކޮންޓްރެކްޓަރަކު ކަނޑައަޅައި، އައު އިމާރާތުގެ ޢަމަލީ މަސައްކަތް ފެށުމުގެ މަރުޙަލާއެވެ.
