ސޫރިޔާގެ ދެކުނު-ހުޅަނގުގައިވާ ދަރްޢާ ޕްރޮވިންސްގެ ޖަމްލާ އަވަށަށް އިޒްރޭލު ސިފައިން ވަދެގަނެ، ގޭގެއަށް ވަދެ ހިންގި އޮޕަރޭޝަނެއްގައި ނުކުޅެދުންތެރިކަން ހުންނަ ސޫރިޔާގެ އާންމު ރައްޔިތެއްގެ ގަޔަށް ބަޑިޖަހައި ޝަހީދުކޮށްލައިފިއެވެ.
ސޫރިޔާގެ ދައުލަތުގެ ނިއުސް އޭޖެންސީ (ސާނާ) އިން ރިޕޯޓުކުރި ގޮތުގައި، ޖަމްލާ އަވަށުގެ ގޭގެއަށް ވަދެ އިސްރާއީލު ސިފައިން ހިންގި ބަލައިފާސްކުރުމުގެ އޮޕަރޭޝަނެއްގެ ތެރޭގައި، ނުކުޅެދުންތެރިކަން ހުންނަ ފިރިހެނަކަށް އަމާޒުކޮށް ސީދާ ބަޑިޖަހައި އޭނާ ވަނީ ޝަހީދުކޮށްލާފައެވެ. މިއީ އިޒްރޭލު ސިފައިން އިސްތިއުމާރުކޮށްފައިވާ ސޫރިޔާގެ ހިސާބުގެ އެތެރެއަށް ވަދެގަނެ ފެށި ނިރުބަވެރި އޮޕަރޭޝަނުގައި އާންމު ރައްޔިތަކު މަރުވި ފުރަތަމަ ޙާދިސާއެވެ.
އިއްޔެ އިޒްރޭލު ސިފައިން ވަނީ ޖަމްލާ އަވަށަށް ވަދެ، އާންމުންގެ ގޭގޭގެ ފުރާޅުތައްމަތީގައި ސުނައިޕަރުން އަތުރައި، އަވަށުގެ ތެރެއަށް ވަކި އަމާޒެއްނެތި ބަޑިޖަހާފައެވެ. އޭގެފަހުން މިއަދު ސިފައިން ވަނީ ގޭގޭގެ ދޮރުތައް ހަލާކުކޮށްލައިގެން އެތެރެއަށް ވަދެ، އާންމުންނަށް ބިރުދައްކައި އޮޕަރޭޝަންތައް ފުޅާކޮށްފައެވެ.
ގޯލާންގެ އިންފަހަނައެޅުމަށްފަހު ސޫރިޔާގެ ދިރުޢާ ޕްރޮވިންސްގެ އެތެރެއަށް އިސްރާއީލުން ވަދެގަނެ ހިންގަމުންދާ މި އަސްކަރީ ޙަރަކާތްތަކުގެ ސަބަބުން، ސޫރިޔާގެ ބޯޑަރު ސަރަޙައްދުގައި ތިބި އާންމު ރައްޔިތުންގެ ފުރާނައަށް ވަނީ ބޮޑު ނުރައްކަލެއް ކުރިމަތިވެފައެވެ.
