ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ޕާކިސްތާނަށް ކުރައްވަމުން ގެންދަވާ ފުރަމާނަ ދަތުރުފުޅުގެ ތެރެއިން، އެ ޤައުމުގެ ފަސްޓް ލޭޑީ އަސީފާ ބުއްޓޫ ޒަރްދާރީއާ ބައްދަލުވެވަޑައިގަތުމަކީ ލިބިވަޑައިގެންނެވި ވަރަށް ބޮޑު އުފަލެއް ކަމަށް ރައީސުލްޖުމްހޫރިއްޔާގެ އަނބިކަނބަލުން މެޑަމް ސާޖިދާ މުޙައްމަދު ވިދާޅުވެއްޖެއެވެ.
މެޑަމް ސާޖިދާ ސޯޝަލް މީޑިއާގައި ކުރެއްވި ޕޯސްޓެއްގައި ވިދާޅުވީ، ޕާކިސްތާނުގެ ފަސްޓް ލޭޑީ އަސީފާ ބުއްޓޫގެ ފަރާތްޕުޅުން ފެނިގެންދިޔަ ހޫނު މެހެމާންދާރީއަށާއި، ބައްދަލުވުމުގެ ތެރެއިން ދެކެވުނު މާނަފުން ވާހަކަތަކަށްޓަކައި ނުހަނު އިހްލާސްތެރިކަމާއެކު ޝުކުރު އަދާކުރައްވާ ކަމަށެވެ. މީގެއިތުރުން، ރައީސުލްޖުމްހޫރިއްޔާގެ ދެކަނބަލުންގެ ޝަރަފުގައި ޕާކިސްތާނުން އިންތިޒާމުކުރި ފުރަމާނަ ޖާފަތަށްޓަކައި ވެސް އެކަމަނާ ވަނީ ހިތުގެ އަޑިން ޝުކުރު އަދާކުރައްވާފައެވެ.
It was a great pleasure to meet with my dear sister, the First Lady of Pakistan, @AseefaBZ.
I am deeply grateful for her exceptional warmth and gracious hospitality, as well as the meaningful conversation we shared during our meeting. I also extend my heartfelt appreciation for… pic.twitter.com/oMeVoyHxMa
— First Lady Sajidha Mohamed (@sajidhaamohamed) October 22, 2026
ދިވެހިރާއްޖެއާއި ޕާކިސްތާނާ ދެމެދު އޮތް ގާތް ގުޅުމަށް އަލިއަޅުއްވާލައްވަމުން އެކަމަނާ ވިދާޅުވީ، ދެ ޤައުމުގެ އެކުވެރިކަމަކީ އެއްބަޔަކު އަނެއް ބަޔަކަށް ކުރާ އިހްތިރާމާއި، ހިއްސާކުރާ އިސްލާމީ އެއް ގަދަރެއްގެ މައްޗަށް ބިނާވެފައިވާ ވަރުގަދަ ގުޅުމެއް ކަމަށެވެ. އަދި ދެ ގައުމުގެ ރައްޔިތުންގެ މެދުގައި އޮތް ޒަމާންވީ ލޯތްބާއި އެކުވެރިކަން ވޭތުވެދިޔަ އަހަރުތަކުގައި އިތުރަށް ބަދަހިވެފައިވާ ކަމަށާއި، މިއީ ޒަމާންތަކަށް ދެމިގެންގޮސްފައިވާ ވަރުގަދަ ގުޅުމެއްކަން އެކަމަނާ ފާހަގަކުރެއްވިއެވެ.
މެޑަމް ސާޖިދާގެ ޕޯސްޓް ނިންމަވާލައްވާފައިވަނީ ދިވެހިރާއްޖެއާއި ޕާކިސްތާނުގެ ދެމެދުގައި އޮތް ޒަމާންވީ އެކުވެރިކަމާއި އެއްބައިވަންތަކަން އަބަދަށް ދެމިއޮތުމަށް އެދިވަޑައިގަންނަވަމުންނެވެ.
