ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު، ޕާކިސްތާނަށް މިހާރު ކުރައްވަމުން ގެންދަވާ ރަސްމީ ދަތުރުފުޅުގެ ތެރެއިން އެ ޤައުމުގެ ރައީސް އާސިފް ޢަލީ ޒަރްދާރީއާ މިއަދު ބައްދަލުކުރައްވައިފިއެވެ.
މި ބައްދަލުކުރެއްވުން ބާއްވަވާފައިވަނީ ޕާކިސްތާނުގެ ވެރިރަށް އިސްލާމްއާބާދުގައި ހުންނަ އެ ޤައުމުގެ ރައީސްގެ ރަސްމީ ގަނޑުވަރު، އައިވާން-އީ-ސަދްރުގައެވެ. ރައީސް މުޢިއްޒު އަދި އެމަނިކުފާނުގެ އަނބިކަނބަލުން ސާޖިދާ މުޙައްމަދު، ރަސްމީ ގަނޑުވަރަށް ވަޑައިގެންނެވުމުން އެ ދެކަނބަލުންނަށް މަރުޙަބާ ދެންނެވީ ޕާކިސްތާނުގެ ރައީސް، ހިޒް އެކްސަލަންސީ އާސިފް ޢަލީ ޒަރްދާރީ އާއި، އެ ޤައުމުގެ ފަސްޓް ލޭޑީ އަދި ނޭޝަނަލް އެސެމްބްލީގެ މެންބަރު އަސީފާ ބުއްޓޯ ޒަރްދާރީއެވެ.
މި ޒިޔާރަތުގެ ތެރެއިން، ރައީސްގެ ދެކަނބަލުން ވަނީ ޕާކިސްތާނުގެ ރައީސް އަދި އެމަނިކުފާނުގެ އަނބިކަނބަލުންނާއެކު ވަކިވަކި ބައްދަލުވުންތަކެއް ބާއްވަވާފައެވެ.
މި ބައްދަލުކުރެއްވުމުގައި ޕާކިސްތާނުގެ ރައީސް އާސިފް ޢަލީ ޒަރްދާރީ ވަނީ ދިވެހިރާއްޖޭގެ ރައީސުލްޖުމްހޫރިއްޔާއަށް ހޫނު މަރުޙަބާއެއް ދަންނަވައި، އެ ޤައުމަށް ފުރަމާނަ ދަތުރުފުޅެއް ކުރެއްވި ކަމަށްޓަކައި އިޚްލާޞްތެރި ޝުކުރެއް އަދާކުރައްވާފައެވެ. އަދި މި ދަތުރުފުޅަކީ ދެ ޤައުމުގެ ދެމެދުގައި އޮތް ގުޅުން އައު އުސްމިންތަކަކަށް ގެންގޮސްދީ، އިތުރަށް ހަރުދަނާވެގެންދާނެ ދަތުރުފުޅެއްކަން އެމަނިކުފާނު ފާހަގަކުރެއްވިއެވެ. ރައީސް މުޢިއްޒު ވަނީ ދިވެހި ވަފުދަށް ޕާކިސްތާނު ސަރުކާރުންނާއި ރައްޔިތުންގެ ފަރާތުން އަދާކުރެއްވި ފުރިހަމަ އަދި ހޫނު މެހެމާންދާރީއަށްޓަކައި ޝުކުރު އަދާކުރައްވާފައެވެ.
ރައީސުލްޖުމްހޫރިއްޔާގެ ވާހަކަފުޅުގައި، ދިވެހިރާއްޖެއާއި ޕާކިސްތާނާ ދެމެދު އޮތް ތާރީޚީ އަދި އަޚުވަންތަ ގުޅުމުގެ މައްޗަށް އަލިއަޅުއްވާލެއްވިއެވެ. އަދި ޚާއްޞަކޮށް ވިޔަފާރިއާއި، ތަޢުލީމާއި، ޞިއްޙީ ދާއިރާގެ އިތުރުން އެކި ދާއިރާތަކުން މީހުން ތަމްރީނުކުރުމުގެ ރޮނގުން ދެ ޤައުމުގެ ގުޅުން އިތުރަށް ބަދަހިކުރެވިދާނެ ކަމަށް އެމަނިކުފާނު ވިދާޅުވިއެވެ. މީގެއިތުރުން، ދޭދޭ ގުޅުމުގެ އިތުރުން ބައިނަލްއަޤުވާމީ މަސްރަޙުގައިވެސް ދެ ޤައުމު ގުޅިގެން މަސައްކަތްކުރެވޭނެ ދާއިރާތަކާ ގުޅޭގޮތުން ދެ ލީޑަރުން ފުޅާ ދާއިރާއެއްގައި މަޝްވަރާކުރެއްވިއެވެ.
މި ބައްދަލުވުމުގައި ވާހަކަފުޅު ދައްކަވަމުން ރައީސް ޒަރްދާރީ ވަނީ ރާއްޖޭގެ ފަތުރުވެރިކަމުގެ ސިނާޢަތު ހޯދާފައިވާ ބޮޑު ކުރިއެރުމާއި ތަރައްޤީއަށް ތަޢުރީފު ކުރައްވާފައެވެ. އަދި މި ދަތުރުފުޅުގެ ތެރެއިން މިއަދު ސޮއިކުރެވުނު މުހިންމު އެއްބަސްވުންތަކުގެ ސަބަބުން ދެ ޤައުމުގެ ގުޅުން އައު ހަރުފަތަކަށް ގެންދެވޭނެ ކަމުގެ ފުރިހަމަ ޔަޤީންކަން އެބައޮތް ކަމަށް އެމަނިކުފާނު ވިދާޅުވިއެވެ. ގިނަ ދުވަސްތަކެއްގެ މެދުކެނޑުމަކަށްފަހު، ރާއްޖޭގެ ރައީސަކު ޕާކިސްތާނަށް މިފަދަ މުހިންމު ދަތުރުފުޅެއް ކުރެއްވުމަކީ ޕާކިސްތާނުގެ ރައްޔިތުން ނުހަނު އުފަލާއެކު ބަލައިގަންނަ ކަމެއް ކަމުގައިވެސް ޒަރްދާރީ ފާހަގަކުރެއްވިއެވެ.
މި ބައްދަލުކުރެއްވުން ނިންމަވާލައްވާފައިވަނީ ދެ ޤައުމުގެ ދެމެދުގައި ޒަމާނުއްސުރެ އޮތް ގާތް ރަޙްމަތްތެރި ކަމާއި އަޚުވަންތަކަމުގެ ގުޅުން ކުރިމަގުގައިވެސް އެކި ދާއިރާތަކުން އިތުރަށް ހަރުދަނާކޮށް، އެކުގައި މަސައްކަތްކުރުމުގެ ޢަޒުމާއި ޔަޤީންކަން އައުކުރައްވަމުންނެވެ.
