ދެކުނު އޭޝިއާ ސަރަހައްދީ އެއްބާރުލުމުގެ ޖަމްއިއްޔާ (ސާކް) ގެ މަސައްކަތްތައް އަލުން ސަކްރިޔަކޮށް، އެންމެ ފުރިހަމައަށް ހިންގަން ފެށުމަށްޓަކައި ދިވެހިރާއްޖެއިން ދޭންޖެހޭ ފުރިހަމަ އެއްބާރުލުން ދިނުމަށް ތައްޔާރަށް އޮތްކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެއެވެ.
ޕާކިސްތާނުގެ ބޮޑުވަޒީރު ޝަހެބާޒް ޝަރީފްގެ ދައުވަތަކަށް އެ ގައުމަށް މިހާރު ކުރައްވަމުން ގެންދަވާ ފުރަމާނަ ދަތުރުފުޅުގައި މިއަދު ދެއްވި ހާއްސަ ބަޔާނެއްގައި ރައީސް މުއިއްޒު ވިދާޅުވީ، ސާކްގެ ހަރަކާތްތައް އަލުން ފެށުމަކީ ސަރަހައްދީ ގައުމުތަކުގެ މެދުގައި އިތުބާރު ބޮޑުކުރުމަށް ކޮންމެހެން ބޭނުންތެރި ކަމެއް ކަމަށެވެ.
އަދި ސަރަހައްދަށް ކުރިމަތިވެފައިވާ އެކި ގޮންޖެހުންތަކުން އަރައިގަނެވޭނީ ގައުމުތަކުގެ މެދުގައި އޮންނަ ގުޅުން ބަދަހިކޮށް، ގުޅިގެން މަސައްކަތް ކޮށްގެން ކަމަށްވާތީ، އެކަމަށްޓަކައި މައުނަވީ މަޝްވަރާތަކެއް ކުރަންޖެހޭ ކަމަށް ރައީސް ފާހަގަކުރެއްވިއެވެ.
އެ މަނިކުފާނު އިތުރަށް ވިދާޅުވީ، ސާކްގެ އަގު ރާއްޖެއިން އަބަދުވެސް ވަޒަންކުރާ ކަމަށާއި، ސާކްގެ މެމްބަރު ހުރިހާ ގައުމަކާ އެކުވެސް ގާތުން މަސައްކަތްކޮށް، ވީ އެންމެ އަވަހަކަށް ސާކް ސަމިޓެއް ބޭއްވުމަށް ރާއްޖެއިން އެހީތެރިވެދޭނެ ކަމަށެވެ.
އެންމެ ފަހުން 18 ވަނަ ސާކް ސަމިޓް 2014 ވަނަ އަހަރު ނޭޕާލްގައި ބޭއްވި ފަހުން، 2016 ވަނަ އަހަރު ޕާކިސްތާނުގައި ބާއްވަން ނިންމި ސަމިޓް އިންޑިއާ އާއި ޕާކިސްތާނުގެ ނުތަނަވަސްކަމާ ހުރެ ބޮއިކޮޓްކުރުމާ ގުޅިގެން، ސާކްގެ އިސް ބައްދަލުވުންތައް އޮތީ މެދުކެނޑިފައެވެ.
