އޮމާނުގައި ނުކުޅެދުންތެރިކަން ހުންނަ އޮމާން ރައްޔިތުންގެ އަދަދު 2025 ވަނަ އަހަރު 75,432 އަށް އަރައި، 2024 ވަނަ އަހަރާ އަޅާބަލާއިރު 9 އިންސައްތައިގެ އިތުރުވުމެއް އައިސްފައިވާ ކަމަށް އެ ގައުމުގެ ނޭޝަނަލް ސެންޓަރ ފޯ ސްޓެޓިސްޓިކްސް އެންޑް އިންފޮމޭޝަން (އެންސީއެސްއައި) އިން އާންމުކުރި ތަފާސްހިސާބުތަކުން ދައްކައިފިއެވެ.
މިއީ އޮމާނުގެ މުޅި އާބާދީގެ 2.5 އިންސައްތައެވެ. ނުކުޅެދުންތެރިކަން ހުންނަ މީހުންގެ ތެރެއިން 60 އިންސައްތައަކީ ފިރިހެނުންނެވެ. އެއީ 44,916 ފިރިހެނުންނެވެ. އަދި އަންހެނުންގެ އަދަދަކީ 30,516 އެވެ. އެއީ މުޅި އަދަދުގެ 40 އިންސައްތައެވެ.
ތަފާސްހިސާބުތަކުން ދައްކާ ގޮތުގައި ނުކުޅެދުންތެރިކަން ހުންނަ އޮމާން މީހުންގެ ތެރެއިން 59 އިންސައްތަ މީހުންނަކީ އުމުރުން 40 އަހަރުން ދަށުގެ މީހުންނެވެ. އަދި އެންމެ ގިނައިން ނުކުޅެދުންތެރިކަން ހުންނަ މީހުން ރެކޯޑުކުރެވިފައިވަނީ ނޯތު އަލް ބާތިނާ ގަވަރނަރޭޓުންނެވެ. އެ ސަރަހައްދުގައި ނުކުޅެދުންތެރިކަން ހުންނަ 16,199 މީހުން 2025 ވަނަ އަހަރު ތިބި ކަމަށް ރެކޯޑުކުރެވިފައިވެއެވެ.
ނުކުޅެދުންތެރިކަން މެދުވެރިވި ސަބަބުތަކަށް ބަލާއިރު، 56 އިންސައްތަ (42,210 ހާދިސާ) މެދުވެރިވެފައިވަނީ އުފަންވީއިރު ހުރި ނުކުޅެދުންތެރިކަމެއްގެ ސަބަބުންނެއް ނޫނެވެ. އޭގެ ތެރެއިން 15 އިންސައްތަ ނުކުޅެދުންތެރިކަން މެދުވެރިވީ އުފަންވުމުގެ ތެރޭގައި ކަމަށްވާއިރު، 20 އިންސައްތަ މެދުވެރިވީ ތަފާތު ބަލިތަކުގެ ސަބަބުންނެވެ. އަދި 7 އިންސައްތަ މެދުވެރިވީ އެކްސިޑެންޓުތަކުގެ ސަބަބުންނެވެ. މީގެ އިތުރުން ޖިސްމާނީ ނުކުޅެދުންތެރިކަން ހުންނަ މީހުންގެ ނިސްބަތަކީ މުޅި އާބާދީގެ ގާތްގަނޑަކަށް 28 އިންސައްތައެވެ.
ތައުލީމީ ހާލަތަށް ބަލާއިރު، އުމުރުން 10 އަހަރާއި ތަޢުލީމީ ފެންވަރު ޖެނެރަލް އެޑިއުކޭޝަން ޑިޕްލޯމާއަށްވުރެ ދަށް މީހުންގެ ނިސްބަތް 2025 ވަނަ އަހަރު ހުރީ 42 އިންސައްތައިގައެވެ. 2025/2026 ވަނަ ދިރާސީ އަހަރު ސްކޫލް ތައުލީމު ހާސިލުކުރަމުންދާ އުމުރުން 6 އަހަރުން މަތީގެ ނުކުޅެދުންތެރިކަން ހުންނަ ކުދިންގެ އަދަދަކީ 483 އެވެ. އޭގެ ތެރޭގައި ހިމެނެނީ 276 ފިރިހެން ކުދިންނާއި 207 އަންހެން ކުދިންނެވެ.
ކައިވެނީގެ ހާލަތަށް ބަލާއިރު، އުމުރުން 15 އަހަރުން މަތީގެ ނުކުޅެދުންތެރިކަން ހުންނަ މީހުންގެ ތެރެއިން ކައިވެނިކޮށްގެން އުޅޭ މީހުންގެ ނިސްބަތަކީ ގާތްގަނޑަކަށް 35 އިންސައްތައެވެ. އެއީ ޖުމްލަ 26,511 މީހުންނެވެ. އޭގެ ތެރޭގައި 17,842 ފިރިހެނުންނާއި 8,669 އަންހެނުން ހިމެނެއެވެ.
ވަޒީފާގެ ބާޒާރުގައި އުމުރުން 15 އަހަރުން މަތީގެ ނުކުޅެދުންތެރިކަން ހުންނަ މީހުންގެ އިގްތިސާދީ ބައިވެރިވުން 2025 ވަނަ އަހަރު ހުރީ 38 އިންސައްތައިގައެވެ. އަދި ވަޒީފާ އަދާކުރާ މީހުންގެ އަދަދު ކުރީ އަހަރާ އަޅާބަލާއިރު 10 އިންސައްތަ އިތުރުވެ، 18,437 އަށް އަރާފައިވެއެވެ. މީގެ ތެރެއިން 47 އިންސައްތަ މީހުން މަސައްކަތް ކުރަނީ އަމިއްލަ ދާއިރާގައެވެ. ވަޒީފާ އަދާކުރާ މީހުންގެ އެންމެ ބޮޑު އިންސައްތައެއް (18 އިންސައްތަ) ހިއްސާކުރަނީ ދަނޑުވެރިކަމާއި، ސުވަރުގެއާއި ސޫފާސޫފި ގެންގުޅުމާއި މަސްވެރިކަމުގެ ދާއިރާއިންނެވެ.
މުދާ މިލްކުކުރުމުގެ މައުލޫމާތަށް ބަލާއިރު، އެއް ގަންޖީ ނުވަތަ އެއަށްވުރެ ގިނަ ބިން މިލްކުކުރާ ނުކުޅެދުންތެރިކަން ހުންނަ މީހުންގެ އަދަދު 2025 ވަނަ އަހަރު ވަނީ 9.3 އިންސައްތަ އިތުރުވެފައެވެ. އަދި އެއް ރެސިޑެންޝަލް ޔުނިޓް ނުވަތަ އެއަށްވުރެ ގިނަ ޔުނިޓް މިލްކުކުރާ މީހުންގެ އަދަދު 10 އިންސައްތަ އިތުރުވެފައިވާއިރު، އެއް އުޅަނދު ނުވަތަ އެއަށްވުރެ ގިނަ އުޅަނދު މިލްކުކުރާ މީހުންގެ އަދަދު ވަނީ 18,499 އަށް އަރާފައެވެ. މިއީ 2024 ވަނަ އަހަރާ އަޅާބަލާއިރު 9.5 އިންސައްތައިގެ އިތުރުވުމެކެވެ.
އިޖުތިމާއީ ރައްކާތެރިކަމުގެ ދާއިރާއިން، ނުކުޅެދުންތެރިކަމުގެ އިނާޔަތް ލިބޭ އޮމާން މީހުންގެ އަދަދު 2025 ވަނަ އަހަރު ވަނީ 51,252 އަށް އަރާފައެވެ. މީގެ ތެރެއިން 61 އިންސައްތައަކީ ފިރިހެނުންނެވެ. އަދި އިނާޔަތްތަކުގެ ގޮތުގައި ޖުމްލަ 74 މިލިއަން އޮމާނީ ރިއާލް ވަނީ ދޫކޮށްފައެވެ. މީގެ އިތުރުން އެހީތެރިވެދޭ ވަސީލަތްތަކާއި އެހީތެރިކަން ލިބުނު މީހުންގެ އަދަދު 10,074 އަށް އަރާފައިވާއިރު، އޭގެ ތެރެއިން 22 އިންސައްތައަކީ ޕާކިންގް ޕާމިޓްތަކެވެ.
ރީހެބިލިޓޭޝަން ޚިދުމަތްތަކަށް ބަލާއިރު، ސަރުކާރާއި އަމިއްލަ ރީހެބިލިޓޭޝަން ސެންޓަރުތަކުގައި މިނިސްޓްރީގެ ޚަރަދުގައި 2025 ވަނަ އަހަރު 9,226 މީހުން ބައިވެރިވެފައިވެއެވެ. އަދި މިފަދަ ޚިދުމަތްދޭ ޖުމްލަ 128 ސެންޓަރު އެ ގައުމުގައި ހިންގަމުންދެއެވެ.
