މީސްމީޑިއާގައި އިސްލާމްދީނަށް ފުރައްސާރަކޮށް ވީޑިއޯތައް އާންމުކުރަމުންދާ ”ބޫގާ“ އަށް ގާނޫނީގޮތުންނާއި އިދާރީގޮތުން އެޅެންހުރި ފިޔަވަޅުތައް އެޅުމުގެ މަސައްކަތް ސަރުކާރުގެ ކަމާބެހޭ އިދާރާތަކާ ގުޅިގެން ކުރަމުންދާ ކަމަށް ޕޮލިސް މީޑިއާ ކޯޑިނޭޓަރ ޝިޔާމް ވިދާޅުވެއްޖެއެވެ.
”އެކި.އެމްވީ“ އަށް ދެއްވި ޚާއްޞަ އިންޓަވިއުއެއްގައި އަޙްމަދު ޝިޔާމް ވިދާޅުވީ ދީނަށް ފުރައްސާރަކުރާ މައްސަލަތަކުގައި ފިޔަވަޅު އެޅުމަށްޓަކައި އެކި ފަރުދުންގެ ފެންވަރުގައާއި ސަރުކާރުތަކުގެ ފެންވަރުގައި ގިނަ މަސައްކަތްތަކެއް ކުރެވެމުންދާ ކަމަށެވެ. އެގޮތުން އެފަރާތަކީ ޖަޕާނުގައި ދިރިއުޅޭ މީހެއް ކަމަށް ބެލެވޭތީ، ޖަޕާން ސަރުކާރާ ގުޅިގެންނާއި ސިޔާސީ ފެންވަރުގައި އެޅެންހުރި ފިޔަވަޅުތައް ބަލައި، އެކަންކަން ހަމަޖެއްސުމަށް މަސައްކަތް ކުރަމުންދާ ކަމަށް އޭނާ ފާހަގަކުރެއްވިއެވެ.
ޓިކްޓޮކް ފަދަ ވަސީލަތްތަކަކީ ޚިޔާލުފާޅުކުރުމުގެ މިނިވަންކަން އޮންނަ، ސީދާ ކޮންޓްރޯލް ކުރަން ދަތި މާހައުލަކަށްވީ ނަމަވެސް، ރަސްމީކޮށް ހުށަހަޅަންޖެހޭ މައްސަލަތައް އެފަރާތްތަކަށް ހުށަހަޅައިގެން ކުރިންވެސް ބައެއް އެކައުންޓްތައް ބޭންކުރެވިފައިވާ ކަމަށް ޝިޔާމް ވިދާޅުވިއެވެ. އަދި ދީނަށް ފުރައްސާރަކުރުން ހުއްޓުވުމަށްޓަކައި ދައުލަތުގެ އިދާރާތަކާއި، ގާނޫނު ތަންފީޒުކުރާ މުއައްސަސާތަކާއި، ބޭރުގެ ކަމާބެހޭ ފަރާތްތަކާ ގުޅިގެން ކުރަންޖެހޭ އެންމެހައި މަސައްކަތްތައް ކުރިއަށްދާނެ ކަމުގެ ޔަގީންކަން އޭނާ ދެއްވިއެވެ.
އިސްލާމްދީނަށް ފުރައްސާރަކޮށް އިޖުތިމާއީ މިންގަނޑުތަކާ ޚިލާފު އަމަލުތައް ހިންގުމުގައި ބޫގާގެ ނަމުން ސޯޝަލް މީޑިއާގައި ފާހަގަވެފައިވާ މި މީހާއަކީ މީގެ އެތައް އަހަރެއް ކުރިންވެސް މިފަދަ ކަންކަން ކުރަމުން އަންނަ މީހެކެވެ. މީގެ ކުރިންވެސް އެކި މީސްމީޑިއާ އެކައުންޓްތައް މެދުވެރިކޮށް ދީނަށާއި ގައުމީ އިޖުތިމާއީ މިންގަނޑުތަކަށް ހުރުމަތްތެރިކޮށް ނުހިތައި ވީޑިއޯތައް އާންމުކޮށްފައިވާއިރު، އެފަދަ އަމަލުތައް ހުއްޓުވުމަށް ގާނޫނީގޮތުން ކުރެވެންހުރި ހުރިހާ މަސައްކަތެއް ކުރަމުންދާނެ ކަމުގެ ޔަގީންކަން ކަމާބެހޭ ފަރާތްތަކުން ދެއެވެ.
