މާލެ ސަރަހައްދުގައި ތަރައްގީކުރާ މަލްޓި ސްޕޯޓްސް ކޮމްޕްލެކްސްތަކުގެ ސަބަބުން، ވިއްސާރަވުމުގެ ސަބަބުން މުބާރާތްތައް މެދުކެނޑި ހޭންޑްބޯޅަ ކުޅުންތެރިންނަށް ދިމާވާ ދަތިތަކަށް ދާއިމީ ހައްލެއް ލިބިގެންދާނެ ކަމަށް ޒުވާނުން ބާރުވެރިކުރުވުމާއި ކުޅިވަރާއި ހަށިހެޔޮކަމާ ބެހޭ ވަޒީރު ޢަބްދުالله ރާފިޢު ވިދާޅުވެއްޖެއެވެ.
ސަރުކާރުން ބޭއްވި ”އަހާ“ ފޯރަމްގައި އާންމުންގެ ސުވާލަކަށް ޖަވާބުދެއްވަމުން ވަޒީރު ވިދާޅުވީ، 2024 ވަނަ އަހަރު ބޭއްވި އެތުލީޓްސް ފޯރަމްގައި ހޭންޑްބޯޅަ އާއިލާއިން އެންމެ ބޮޑަށް ހުށަހެޅި ކަންބޮޑުވުމަކީ މޫސުން ގޯސްވުމުގެ ސަބަބުން މުބާރާތްތައް ފަސްކުރަންޖެހި، ރަށްރަށުން އަންނަ ޓީމުތަކަށް ބޮޑެތި ގެއްލުންތަކެއް ކުރިމަތިވުން ކަމަށެވެ. އެހެންކަމުން ހޭންޑްބޯޅަ ކޯޓުތައް އިންޑޯ ފެސިލިޓީތަކަށް ބަދަލުކޮށް، މޫސުމަށް ބެލުމެއްނެތި މުބާރާތްތައް ކުރިއަށްގެންދެވޭނެ މަގުފަހިކުރުމަކީ ސަރުކާރުގެ އިސް އަމާޒެކެވެ.
ވޭތުވެދިޔަ 33 އަހަރުގެ ތެރޭގައި މާލެ ސަރަހައްދުގައި އެކަށީގެންވާ އިންޑޯ ކުޅިވަރު ވަސީލަތެއް ގާއިމުކުރެވިފައި ނުވާކަން ފާހަގަކުރައްވަމުން ވަޒީރު ވިދާޅުވީ، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ތަސައްވުރާ އެއްގޮތަށް އެކުލަވާލި ކުޅިވަރުގެ ދިގު ރާސްތާ ޕްލޭނުގެ ދަށުން މި މައްސަލައަށް މިހާރު އަމަލީ ހައްލުތަކެއް ހޯދެމުންދާ ކަމަށެވެ.
މިގޮތުން ހުޅުމާލޭ ފޭސް ދޭއްގައި މަލްޓި ސްޕޯޓްސް ކޮމްޕްލެކްސް އެޅުމުގެ އަމަލީ މަސައްކަތް ކުރިއަށް އޮތް ދެ ހަފުތާ ތެރޭގައި ފެށޭނެ ކަމަށާއި، އޭގެ ފަހުން ފޭސް އެކެއްގެ މަސައްކަތްވެސް ފެށިގެންދާނެ ކަމަށް ވަޒީރު ހާމަކުރެއްވިއެވެ. މީގެ އިތުރުން ވިލިމާލޭގައިވެސް އިންޑޯ ކޮމްޕްލެކްސްއެއް ތަރައްގީކުރުމަށްޓަކައި އެމްބަސީއަކާއެކު އެއްބަސްވުމުގައި ސޮއިކުރެވިފައިވާ ކަމަށް ވިދާޅުވިއެވެ.
ބައިނަލްއަގުވާމީ މިންގަނޑުތަކަށް ފެތޭގޮތަށް ފަރުމާކުރެވޭ މި ތަންތަނުގެ މައިގަނޑު އެއް މަގުސަދަކީ ކުރިއަށް އޮތް ހަތް އަހަރު ތެރޭގައި ރާއްޖޭގައި ބައިނަލްއަގުވާމީ ރީޖަނަލް ގޭމްސްއެއް ބޭއްވުމަށް ބޭނުންވާ ފެންވަރުގެ ފެސިލިޓީތައް ތައްޔާރުކުރުން ކަމަށްވެސް ވަޒީރު ވިދާޅުވިއެވެ.
އޭގެ އިތުރުން މާލޭގައި މިހާރު އަޅަމުންދާ އިންޑޯ ހޭންޑްބޯޅަ ކޯޓުގެ އޮނިގަނޑުގެ މަސައްކަތް ނިމެން ކައިރިވެފައިވާކަން ފާހަގަކުރައްވަމުން ވަޒީރު ވިދާޅުވީ، އިންޓަރނޭޝަނަލް ހޭންޑްބޯލް ފެޑެރޭޝަނާ ގުޅިގެން އެތަނުގެ ސާފޭސް ޕޭމަންޓް ހަދައި ނިމިފައިވާ ކަމަށެވެ. އަދި މި އަހަރުގެ ނިޔަލަށް އެ ކޯޓުގެ މަސައްކަތް އެއްކޮށް ނިންމާލެވޭނެ ކަމުގެ ޔަގީންކަން ވަޒީރު ދެއްވިއެވެ.
