ހުޅުމާލޭގައި ކާރެއް ކޮންޓްރޯލުން ނެއްޓި ހޮޅިދަނޑިއެއްގައި ޖެހި ހިނގި އެކްސިޑެންޓަކާ ގުޅިގެން ޑްރައިވަރުގެ ލައިސަންސް ހިފަހައްޓައިފިއެވެ.
ހުޅުމާލޭ ބަގީޗާ ހިނގުމުގައި ޕޭވްމަންޓް މަތީގައި ހުރި ހޮޅިދަނޑިއެއްގައި ކާރެއް ޖެހި އެކްސިޑެންޓެއް ހިނގާފައިވާ ކަމުގެ ރިޕޯޓް ފުލުހުންނަށް ލިބިފައިވަނީ ރޭ ފަތިހު 04:33 އެހައިކަންހާއިރުއެވެ. ކޮންޓްރޯލުން ނެއްޓިގެން ގޮސް ހޮޅިދަނޑީގައި ޖެހި ހިނގި މި ހާދިސާއާ ގުޅިގެން ފުލުހުން ވަނީ އެ އުޅަނދު ދުއްވަން އިން ޑްރައިވަރުގެ އެއްގަމު އުޅަނދު ދުއްވުމުގެ ލައިސަންސް ވަގުތީ ގޮތުން ހިފަހައްޓާފައެވެ.
މި ހާދިސާ ހިނގި ވަގުތު ކާރު ދުއްވަން އިނީ އުމުރުން 28 އަހަރުގެ ދިވެހި ފިރިހެނެކެވެ. މި އެކްސިޑެންޓާ ގުޅިގެން އޭނާއަށް އެކިވަރުގެ އަނިޔާތައް ލިބުނު ނަމަވެސް، ސީރިއަސް އަނިޔާއެއް ލިބިފައި ނުވާ ކަމަށް ފުލުހުން މައުލޫމާތު ދެއެވެ.
މި އެކްސިޑެންޓްގައި ކާރަށާއި މަގުމަތީގައި ހުރި ހޮޅިދަނޑިއަށް ވަނީ އެކިވަރުގެ ގެއްލުންތައް ލިބިފައެވެ.
މި މައްސަލައާ ގުޅިގެން ފުލުހުން ދަނީ އެކްސިޑެންޓް ހިނގަން މެދުވެރިވި ސަބަބާއި، ހާދިސާއާ ގުޅޭގޮތުން ބަލަންޖެހޭ އިތުރު ކަންކަން އިތުރަށް ތަހުގީގު ކުރަމުންނެވެ.
