އިސްރާއީލަކީ އިސްތިއުމާރީ ދައުލަތެއް ނުވަތަ އިސްތިއުމާރީ ހަރަކާތެއް ކަމަށް ކުރެވޭ ތުހުމަތުތައް އިސްރާއީލުގެ ބޮޑުވަޒީރު ބެންޖަމިން ނަތަންޔާހޫ ދޮގުކޮށްފިއެވެ. އަދި އެ ސަރަހައްދުގެ އަސްލު މިލްކުވެރިންނަކީ ޔަހޫދީން ކަމަށް ބުނެ އެކަން ދިފާއުކޮށް ވާހަކަދައްކައިފިއެވެ.
ނަތަންޔާހޫ ވަނީ ޣައްޒާ، ލުބުނާން އަދި ސޫރިޔާގެ ސަރަހައްދުތަކުގެ މައްޗަށް ތާރީޚީ އަދި ކަނޑައެޅިގެން ކަލާނގެ ދެއްވާފައިވާ މިލްކުވެރިކަމެއް އިސްރާއީލަށް އޮތް ކަމަށް ބުނެފައެވެ.
މި ދައުވާތަކަކީ ޔަހޫދީންގެ ގަދީމީ ދީނީ ފޮތްތަކުގައި ބަޔާންކޮށްފައިވާ ”ބޮޑު އިސްރާއީލު“ ނުވަތަ ”ގްރޭޓާ އިސްރާއީލު“ ގާއިމުކުރުމުގެ މަޝްރޫއާ ގުޅިފައިވާ ކަންކަމެވެ. އެ ދީނީ ފޮތްތަކުގައިވާ ގޮތުން ކަލާނގެ ވަނީ ނީލް ކޯރުން ފެށިގެން ފުރާތު ކޯރާ ހަމައަށްވާ އެންމެހައި ބިންތައް ޔަހޫދީންނަށް ދެއްވާނެ ކަމަށް ވަޢުދުވެފައެވެ.
އާންމުކޮށް ތާރީޚުގައި ފެންނަންރި އިސްތިއުމާރީ ހަރަކާތްތަކާއި އިސްރާއީލުން މިހާރު ހިންގާ އަމަލުތަކާ ދެމެދު ބޮޑު ތަފާތެއް ހުރިކަން ސިޔާސީ މަޝްރަހު ދިރާސާކުރާ ފަރާތްތަކުން ފާހަގަކުރެއެވެ. ސަގާފީ ނުވަތަ އާދައިގެ އިސްތިއުމާރީ ބާރުތަކުން މަސައްކަތްކުރަނީ ސަރަހައްދުތަކުގެ ތަބީއީ މުއްސަނދިކަން އަތުލައި، އެ ތަންތަނުގައި ދިރިއުޅޭ ރައްޔިތުން އަޅުވެތިކޮށްގެން ބޭނުން ހިފުމަށެވެ.
ނަމަވެސް އިސްރާއީލުން މިހާރު ކުރިއަށްގެންދާ މަޝްރޫއުގެ އަމާޒަކީ އެއާ މުޅިން ތަފާތު ކަމެކެވެ. އެއީ އެ ބިމުގައި ތިބި އަސްލު ރައްޔިތުންނާއި އެމީހުންގެ ނިޝާންތައް އެކީއެކަށް ފޮހެލުމަށް (ޓޯޓަލް އިރޭޝާ) އަމާޒުކޮށްގެން ހިންގާ ހަރަކާތެކެވެ.
އިސްރާއީލުން ޣައްޒާއަށާއި ލުބުނާނަށް ދެމުންދާ ނުރައްކާތެރި ހަމަލާތަކާއި، ސޫރިޔާގެ ސަރަހައްދުތަކަށް އަތްގަދަކުރުމުގެ އަމަލުތަކާ ގުޅިގެން ބައިނަލްއަގުވާމީ މުޖުތަމައުން ދަނީ އިސްރާއީލަކީ އިސްތިއުމާރީ ބާރެއްގެ ގޮތުގައި ސިފަކުރަމުންނެވެ. ނަމަވެސް އެމެރިކާ އާއި އިސްރާއީލުގެ ވެރިން ދަނީ މި ތުހުމަތުތައް ދޮގުކޮށް، އެމީހުންގެ އަމަލުތައް ދިފާއުކުރަމުންނެވެ.
