މާލޭގެ މަގުމަތި ބެލެހެއްޓުމުގެ ތެރެއިން ވަގު ނަންބަރު ބޯޑު ހަރުކޮށްގެން ސައިކަލު ދުއްވުމާއި، ނަންބަރު ބޯޑު ބަދަލުކޮށްގެން ވައްކަން ކުރަން އުޅުނު ފައިވް 5 މީހަކު ފުލުހުންގެ ބެލުމުގެ ދަށަށް ގެންގޮސްފިއެވެ.
ފުލުހުން ކުރިއަށްގެންދިޔަ ސިލްސިލާ ޕެޓްރޯލްތަކުގައި ހައްޔަރުކޮށްފައިވަނީ ދިވެހި ތިން ފިރިހެނުންގެ އިތުރުން ސްރީލަންކާއަށް ނިސްބަތްވާ ދެ ފިރިހެނެކެވެ.
މި މައްސަލަތަކުގެ ތެރެއިން ފުރަތަމަ ހާދިސާ ހިނގާފައިވަނީ ފަތިހު 3:55 ހާއިރު ކާނޭޝަން މަގުގެ ގޯޅިއެއްގެ ތެރޭގައެވެ. އެ ސަރަހައްދުގައި ޝައްކުކުރެވޭ ގޮތަކަށް އުޅެނިކޮށް ފުލުހުންގެ ސަމާލުކަމަށް އައުމުން ހުއްޓުވައި ސުވާލުކޮށްފައިވަނީ 45 އަހަރުގެ ދެ މީހަކާއި 39 އަހަރުގެ ދިވެހި ފިރިހެނެކެވެ. އެ މީހުން ވަނީ އެ ގޯޅި ތެރޭގައި އޮތް ސައިކަލެއްގެ އަސްލު ނަންބަރު ބޯޑު ނައްޓާލުމަށްފަހު އެހެން ނަންބަރު ބޯޑެއް ހަރުކޮށްގެން އެ އުޅަނދު ވަގަށް ނަގަން މަސައްކަތްކޮށްފައެވެ.
ފުލުހުން ފެނުމާއެކު އޭގެ ތެރެއިން އެކަކު ސައިކަލަށް އަރައި މަގުމައްޗަށް ނެރެން އުޅެނިކޮށް ހުއްޓުވުމުން، އެއީ އާއިލީ މީހެއްގެ ސައިކަލެއް ކަމަށް ބުނެ އޮޅުވާލަން އުޅުނެވެ. ނަމަވެސް، ފުލުހުންގެ ކޮމާންޑް ސެންޓަރު މެދުވެރިކޮށް އިންޖީނު ނަންބަރު ޗެކްކުރުމުން އެއީ ސައިކަލުގެ އަސްލު ނަންބަރު ނޫންކަން ވަނީ ސާފުވެފައެވެ. އަދި އެ ސަރަހައްދުގެ ކާނުގަނޑެއްގެ ތެރެއަށް އެއްލާލާފައި އޮތް އަސްލު ނަންބަރު ބޯޑު ފެނުމާއެކު އެ ތިން މީހުން ހައްޔަރުކޮށް، ވައްކަން ކުރަން ބޭނުންކުރި ތަޅުދަނޑިއާއެކު ސައިކަލު ވަނީ ޓޯކޮށްފައެވެ.
ދެވަނަ ހާދިސާގައި ހައްޔަރުކޮށްފައިވަނީ 29 އަހަރާއި 25 އަހަރުގެ ސްރީލަންކާ ދެ ފިރިހެނުންނެވެ. އެ މީހުން ދަންވަރު 2:14 ހާއިރު ލޮނުޒިޔާރަތް މަގުން ވަންވޭއާ ޚިލާފަށް ސައިކަލުގައި ދަނިކޮށް ފުލުހުން ހުއްޓުވިއިރު، ދުއްވަން ހުރި މީހާގެ އަތުގައި އެއްގަމު އުޅަނދު ދުއްވުމުގެ ލައިސަންސް ނެތްކަން ވަނީ އެނގިފައެވެ.
އެ ސައިކަލު ޓޯ ޔާޑަށް ގެންގޮސް އިތުރަށް ބަލައިފާސްކުރިއިރު، ސައިކަލުގައި ހުރި ނަންބަރު ބޯޑާއި އިންޖީނު އަދި ޗެސިސް ނަންބަރު ދިމާނުވާކަން ފާހަގަކުރެވުނެވެ. އަދި ސިސްޓަމް މެދުވެރިކޮށް އިތުރަށް ޗެކްކުރުމުން އެއީ ކުރިން ވަގަށް ނަގާފައިވާ ސައިކަލެއްކަން ކަށަވަރުވުމާ ގުޅިގެން، ވަގަށް ނަގާފައިވާ އުޅަނދެއް ބޭނުންކުރި ކަމުގެ ތުހުމަތުގައި އެ ދެ މީހުން ވަނީ ފުލުހުންގެ ބެލުމުގެ ދަށަށް ގެންގޮސްފައެވެ.
