އީރާނުގެ ނިއުކްލިއަރ މަރުކަޒުތަކާއި ހަކަތަ އުފައްދާ މުހިންމު ވަސީލަތްތަކަށް އަމާޒުކޮށް، އެމެރިކާގެ އަސްކަރިއްޔާގައި އޮތް ނިއުކްލިއަރ ނޫން އެންމެ ބާރުގަދަ ހަތިޔާރު ކަމަށްވާ ”މެސިވް އޯޑްނަންސް އެއަރ ބްލާސްޓް“ (އެމްއޯއޭބީ) ނުވަތަ ”މަދަރ އޮފް އޯލް ބޮމްބްސް“ ބޭނުންކުރުމުގެ ހުރިހާ ތައްޔާރީތަކެއް ވެ ނިމިފައިވާ ކަމަށް ބައިނަލްއަޤްވާމީ ޚަބަރުފަތުރާ ވަސީލަތްތަކުން ހާމަކޮށްފިއެވެ.
އަސްކަރީ ރޭވުންތަކާ ޙަވާލާދީ ރިޕޯޓުތައް ބުނާ ގޮތުގައި، މިފަދަ ހަރުކަށި އަސްކަރީ ފިޔަވަޅަކަށް އެމެރިކާއިން ވިސްނަމުންދަނީ ރައީސް ޑޮނަލްޑް ޓްރަމްޕްގެ އިރުޝާދުގެ ދަށުންނެވެ. މީގެ މައިގަނޑު މަޤްޞަދަކީ އީރާނާއެކު އުފެދިފައިވާ ނުތަނަވަސްކަމަށް އަވަސް ނިމުމެއް ގެނެސް، އެ ސަރަޙައްދުގައި ތިބި އެމެރިކާ ސިފައިން އަނބުރާ ޤައުމަށް ގެންދިއުމަށް މަގުފަހިކުރުމެވެ.
ގާތްގަނޑަކަށް 9.8 ޓަން (21,600 ޕައުންޑް) ގެ ބަރުދަން ހުންނަ މި ބޮމަކީ އެމެރިކާގެ އަސްކަރިއްޔާގައި ހިމެނޭ އާދައިގެ އެންމެ ބޮޑު ގޮވާތަކެއްޗެވެ. މި ހަތިޔާރަކީ ބިމުގެ އަޑިއަށް ވަދެގެން ދިއުމުގެ ބަދަލުގައި، ބިމާ ކައިރިން ވައިގެ ތެރޭގައި ގޮއްވާލައިގެން ފުޅާ ސަރަޙައްދަކަށް އިންތިހާއަށް ބާރުގަދަ ޝޮކްވޭވް ފޮނުވާލެވޭ ގޮތަށް ޚާއްޞަކޮށް ފަރުމާކޮށްފައިވާ ބޮމެކެވެ.
ނަމަވެސް އީރާނުގެ ބިމުގެ އަޑީގައި ވަރުގަދަކޮށް ބިނާކޮށްފައިވާ ނިއުކްލިއަރ މަރުކަޒުތައް ސުންނާފަތިކޮށްލުމުގެ ޤާބިލުކަން މި ބޮމުގައި ހުންނާނެތޯ އަސްކަރީ ތަޖުރިބާކާރުންނާއި އޮފިޝަލުން ދަނީ ސުވާލު އުފައްދަވަމުންނެވެ. އަދި ޢާންމުން ދިރިއުޅޭ ސަރަޙައްދުތަކާ ކައިރީގައިވާ ހަކަތައިގެ މަރުކަޒުތަކަށް މިފަދަ ބާރުގަދަ ހަތިޔާރަކުން ޙަމަލާދީފިނަމަ، ޢާންމު ރައްޔިތުންނަށް ބޮޑެތި ގެއްލުންތަކެއް ލިބިދާނެ ކަމުގެ ކަންބޮޑުވުންވެސް ދަނީ ފާޅުކުރެވެމުންނެވެ.
މި ރޭވުންތަކާ މެދު އަދި މިހާތަނަށް ވަކި ގޮތެއް ނިންމާފައި ނުވި ނަމަވެސް، މިފަދަ ނުރައްކާތެރި ހަތިޔާރެއް ބޭނުންކުރުމަށް އެމެރިކާއިން ވިސްނުމަކީ، މުޅި ސަރަޙައްދުގެ މަސްލަޙަތު އިތުރަށް ގޯސްވެ، ފުޅާ ދާއިރާއެއްގެ ސަރަޙައްދީ ހަނގުރާމައަކަށް މަގުފަހިވެގެން ހިނގައިދާނެ ކަމެއް ކަމަށް މަސްރަޙު ދިރާސާކުރާ ފަރާތްތަކުން ވަނީ އިންޒާރު ދީފައެވެ.
