ހއ. ތުރާކުނުގައި ސަރުކާރުގެ ފަރާތުން ބިނާކުރަމުން އަންނަ 300 މީހުންގެ ޖާގައިގެ އައު މިސްކިތުގެ މަސައްކަތް ބާރަށް ކުރިއަށްދާ ކަމަށާއި، މި މަޝްރޫޢު 2026 ވަނަ އަހަރުގެ ނޮވެންބަރު މަހުގެ ނިޔަލަށް އެއްކޮށް ނިންމުމަށް އަމާޒު ހިފާފައިވާ ކަމަށް މިނިސްޓްރީ އޮފް އިސްލާމިކް އެފެއާޒުން ހާމަކޮށްފިއެވެ.
މި މަޝްރޫޢުގެ މިހާރު ކުރިއަށްދާ މަރުޙަލާއާ ގުޅޭގޮތުން މަޢުލޫމާތު ލިބިފައިވާ ގޮތުގައި، މިހާރު ކުރިއަށްދަނީ މިސްކިތުގެ ސްޓްރަކްޗަރަލް އަދި ފަންނީ ކަންކަން ފުރިހަމަކުރުމަށްޓަކައި ކުރަންޖެހޭ ރެކްޓިފިކޭޝަން (ރަނގަޅުކުރުމުގެ) މަސައްކަތްތަކެވެ. މި މަސައްކަތްތައް ނިމުމުން މިސްކިތުގެ ފިނިޝިންގ އަދި ޒީނަތްތެރިކުރުމުގެ އެހެނިހެން މަރުޙަލާތަކަށް ދިއުމަށް ވަނީ ހަމަޖެހިފައެވެ.
އިސްލާމިކް މިނިސްޓްރީން ހާމަކުރި ގޮތުގައި، މި މަޝްރޫޢަކީ ރަށުގެ ރައްޔިތުންނަށް ދިމާވެފައިވާ ޖާގައިގެ ދަތިކަމަށް ދާއިމީ އަދި ފުރިހަމަ ޙައްލެއް ހޯދައިދިނުމަށްޓަކައި ސަރުކާރުން އިސްކަންދީގެން ކުރިއަށްގެންދާ މުހިންމު މަސައްކަތެކެވެ. އަދި އެ މިނިސްޓްރީން ދަނީ މަސައްކަތުގެ ފެންވަރު ބަލައި، ކަނޑައެޅިފައިވާ މުއްދަތަށް މިސްކިތް ނިންމުމަށްޓަކައި ކޮންޓްރެކްޓަރާއެކު ގާތުން މަސައްކަތް ކުރަމުންނެވެ.
300 މީހުންނަށް އެއްފަހަރާ ނަމާދުކުރެވޭ ގޮތަށް ޒަމާނީ ފެންވަރަށް ބިނާކުރާ މި މިސްކިތް ނިމި، ރައްޔިތުންނަށް ބޭނުންކުރަން ފެށުމުން ތުރާކުނުގެ ގިނަ ޢަދަދެއްގެ މީހުންނަށް ފަސޭހަކަމާއެކު ޖަމާޢަތުގައި ނަމާދުކުރުމުގެ ފުރުޞަތު ފަހިވެގެންދާނެއެވެ. ސަރުކާރުން އަމާޒު ހިފާފައިވަނީ ކަނޑައެޅިފައިވާ ތާވަލާ އެއްގޮތަށް 2026 ވަނަ އަހަރުގެ ނޮވެންބަރު މަހުގެ ނިޔަލަށް މިސްކިތުގެ މަސައްކަތް އެއްކޮށް ނިންމައި ރައްޔިތުންނަށް ޚިދުމަތް ދޭން ފެށުމަށެވެ.
