ދުނިޔޭގެ ބާޒާރުގައި ތެލުގެ އަގު އުފުލުމާއި ބައިނަލްއަގުވާމީ ފެންވަރުގައި ހިނގަމުންދާ ހަނގުރާމަތަކުގެ ސަބަބުން ކުރިމަތިވަމުންދާ އިގްތިސާދީ ލޮޅުންތަކުން ރާއްޖެ ރައްކާތެރިކޮށް، މާލީ ހަމަޖެހުން ދަމަހައްޓަން ސަރުކާރުން ހާއްސަ އިސްކަމެއް ދީގެން ހަރުދަނާ ފިޔަވަޅުތަކެއް އަޅަމުންދާ ކަމަށް މާލީ ވަޒީރު ހަސަން ޒަރީރު ވިދާޅުވެއްޖެއެވެ.
ރޮއިޓާސްއަށް ދެއްވި ހާއްސަ ބަސްދީގަތުމެއްގައި މާލީ ވަޒީރު ފާހަގަކުރެއްވި ގޮތުގައި، ދުނިޔޭގެ އެކި ކަންކޮޅުތަކުގައި އުފެދިފައިވާ ހަމަނުޖެހުންތަކުގެ ނޭދެވޭ އަސަރު ފަތުރުވެރިކަމުގެ ސިނާއަތަށް ކުރަމުންދިޔަ ނަމަވެސް، މިއީ ދުނިޔޭގެ ގިނަ ގައުމުތަކަށް މިއަދު ކުރިމަތިވެފައިވާ އާންމު ގޮންޖެހުމެކެވެ. އެހެންކަމުން ރާއްޖޭގެ އިގްތިސާދީ ވިލުންވެރިކަން އިތުރުކުރުމަށްޓަކައި އިސްނަގައިގެން އަވަސް ފިޔަވަޅުތަކެއް އެޅުމަކީ ކޮންމެހެން ބޭނުންތެރި ކަމެއްކަން އޭނާ ފާހަގަކުރެއްވިއެވެ.
ދައުލަތުގެ ހަރަދުތައް ކުޑަކުރުމަށާއި މާލީ ނިޒާމު އިތުރަށް ތަރުތީބުކޮށް ހަރުދަނާކުރުމަށް ސަރުކާރުން އަޅަމުންދާ ފިޔަވަޅުތަކުގެ މައިގަނޑު އަމާޒަކީ ދުނިޔޭގެ އިގްތިސާދީ ނުތަނަވަސްކަމުން ގައުމަށް ކުރާ ނޭދެވޭ އަސަރުތައް ކުޑަކޮށް، ދެމެހެއްޓެނިވި ގޮތެއްގައި ގައުމީ އިގްތިސާދު ކުރިއެރުވުން ކަމަށް ވަޒީރު ވިދާޅުވިއެވެ.
އިގްތިސާދީ އިސްލާހީ އެޖެންޑާ ކުރިއަށްގެންދިއުމުގައި ބައިނަލްއަގުވާމީ މާލީ އިދާރާތަކުގެ އެހީތެރިކަން ބޮޑު ދައުރެއް އަދާކުރާނެކަން ފާހަގަކުރައްވަމުން، ވަޒީރު ވިދާޅުވީ ވޯލްޑް ބޭންކު ފަދަ މާލީ އިދާރާތަކާއެކު ސަރުކާރުން އަންނަނީ ފުޅާ ދާއިރާއެއްގައި މަޝްވަރާތައް ބާއްވަމުންނެވެ.
ކުރިއަށް އޮތް ތަނުގައި ރާއްޖޭގެ އިގްތިސާދީ ކުރިއެރުމަށް ބަލާއިރު، 2027 ވަނަ އަހަރު އިގްތިސާދު 3.8 އިންސައްތައިގައި އަދި 2028 ވަނަ އަހަރު 6.8 އިންސައްތައިގައި ކުރިއަރާނެ ކަމަށް ސަރުކާރުން ލަފާކުރެއެވެ.
ސަރުކާރުގެ އިގްތިސާދީ އިސްތިރާތީޖީ އަމާޒުތަކުގެ ތެރޭގައި އިގްތިސާދު ސިންދަފާތުކުރުމާއި ފަތުރުވެރިކަން ކުރިއެރުވުމުގެ އިތުރުން، 2028 ވަނަ އަހަރާ ހަމައަށް އިއާދަކުރަނިވި ހަކަތައިގެ އިންވެސްޓްމަންޓްތައް 33 އިންސައްތައަށް އިތުރުކުރުން ހިމެނެއެވެ.
މި ލަނޑުދަނޑިތައް ހާސިލުކުރުމަށް ބޭރުގެ މާލީ އެހީތެރިކަން ލިބެމުންދާކަން ފާހަގަކުރައްވަމުން ވަޒީރު ވިދާޅުވީ، ކުރިއަށް އޮތް ދެތިން އަހަރުގެ ތެރޭގައި ވޯލްޑް ބޭންކުން 250 މިލިއަން އެމެރިކާ ޑޮލަރުގެ އެހީއެއް ދިނުމަށް ހަމަޖެހިފައިވާ ކަމަށެވެ. އަދި ވޭތުވެދިޔަ މަހު އިންޓަރނޭޝަނަލް އިސްލާމިކް ޓްރޭޑް ފައިނޭންސް ކޯޕަރޭޝަން (އައިޓީއެފްސީ) އާއެކު ފަސް އަހަރުގެ މުއްދަތަށް 1.5 ބިލިއަން ޑޮލަރުގެ ފްރޭމްވޯކް އެއްބަސްވުމެއްގައި ވަނީ ސޮއިކޮށްފައެވެ.
މާލީ ހިންގުން ހަރުދަނާކޮށް، ބައިނަލްއަގުވާމީ ގުޅުންތައް ބަދަހިކުރުމާއެކު އިސްތިރާތީޖީ ދާއިރާތަކަށް އިންވެސްޓްކުރުމަކީ މިހާރު ކުރިމަތިވެފައިވާ އިގްތިސާދީ ފިއްތުންތަކަށް ދާއިމީ ހައްލެއް ހޯދައި، ގައުމުގެ ދިގު މުއްދަތުގެ ތަރައްގީގެ އަމާޒުތައް ކާމިޔާބުކުރުމަށް ސަރުކާރުން އަޅަމުންދާ ހަރުދަނާ ފިޔަވަޅުތަކެކެވެ.
