ޔަމަނުގެ ހޫޘީން ޖެހިޖެހިގެން 3 ވަނަ ދުވަހު ސަޢޫދީ ޢަރަބިއްޔާގެ ވެރިރަށް ރިޔާޟަށް އަމާޒުކޮށް ބެލިސްޓިކް މިސައިލް ޙަމަލާއެއް ދީފިއެވެ. ސަޢޫދީގެ ވައިގެ ދިފާޢީ ނިޒާމުން ވަނީ މި މިސައިލް ރިޔާޟްގެ މައްޗަށް ވައްޓާލާފައެވެ. ހޫޘީން ބުނެފައިވަނީ މި ޙަމަލާ އަމާޒުކުރީ ކިންގް ޚާލިދު އިންޓަނޭޝަނަލް އެއަރޕޯޓަށެވެ. މެދުކެނޑުމެއްނެތި ދެމުންދާ މި ޙަމަލާތަކާ ގުޅިގެން ސަޢޫދީއިން ވަނީ އެއަރޕޯޓުގެ އުދުހުންތައް މެދުކަނޑާލާފައެވެ.
މި ޙަމަލާތަކުގެ ސަބަބުން ރިޔާޟްގައި ބާއްވަން ހަމަޖެހިފައިވާ ބޮޑެތި ބައިނަލްއަޤްވާމީ ބައްދަލުވުންތަކަށް ދަނީ ހުރަސްއެޅެމުންނެވެ. އޭގެ ތެރޭގައި ސަޢޫދީގެ އިންވެސްޓްމަންޓް ކޮންފަރެންސާއި، ވޯލްޑް ޕެޓްރޯލިއަމް ކޮންގްރެސް ހިމެނެއެވެ. ސަލާމަތީ ސަބަބުތަކަށްޓަކައި ބޮޑެތި ތެޔޮ ކުންފުނިތަކުގެ އިސްވެރިން ވަނީ މި ބައްދަލުވުމުގައި ބައިވެރިނުވާން ނިންމާފައެވެ.
އެމެރިކާގެ ރައީސް ޑޮނަލްޑް ޓްރަމްޕް ވަނީ ހޫޘީންގެ ޢަމަލުތައް ކުށްވެރިކޮށް، އެމީހުންގެ ޢަމަލުތައް ވަރަށް ގޯސް ކަމަށް ބުނެފައެވެ. ނަމަވެސް އެމެރިކާއިން ސީދާ ޙަމަލާދޭނެކަމުގެ އިޝާރާތެއް ނުދެއެވެ. މިއާއެކު ހޫޘީން ވަނީ، އެމެރިކާއިން މިކަމުގެ ތެރެއަށް ވަދެެއްޖެނަމަ ވަރުގަދަ ރައްދެއް ދޭނެކަމުގެ އިންޒާރު ދީފައެވެ.
