ސަރުކާރު ހިންގާ ޕީޕަލްސް ނޭޝަނަލް ކޮންގްރެސް (ޕީއެންސީ) އަށް ސޮއިނުކުރުމުގެ ސަބަބުން ސަފީރަކު މަގާމުން ވަކިކުރި ކަމަށް ބުނެ ފަތުރަމުންދަނީ އެއްވެސް ހަގީގަތެއް ނެތް ދޮގު މައުލޫމާތެއް ކަމަށް ޚާރިޖީ ވުޒާރާއިން ހާމަކޮށްފިއެވެ.
އެ ވުޒާރާއިން ނެރުނު ނޫސްބަޔާނެއްގައި ބުނީ ސަފީރުން މަގާމަށް އައްޔަނުކުރުމާއި ވަކިކުރުމުގެ ހުރިހާ ނިންމުންތަކަކީ ދިވެހިރާއްޖޭގެ ފޮރިން ސާވިސް ގާނޫނުގައި ބަޔާންކޮށްފައިވާ އުސޫލުތަކުގެ ތެރެއިން ރައީސުލްޖުމްހޫރިއްޔާއަށް ލިބިވަޑައިގަންނަވާ އިޚްތިޔާރުގެ ދަށުން ނިންމަވާ ނިންމެވުންތަކެއް ކަމަށެވެ.
ޚަބަރުގައި އިޝާރާތްކޮށްފައިވާ ސަފީރާ ގުޅޭގޮތުން އިތުރަށް ތަފްސީލު ދެމުން މިނިސްޓްރީން ބުނީ، އެ ބޭފުޅަކީ 3 ޖެނުއަރީ 2024 އިން ފެށިގެން އެމްބެސެޑަރ އެޓް ލާޖްގެ ގޮތުގައި، ސްޓޭޓް މިނިސްޓަރުންގެ ފެންވަރުގައި ޚާރިޖީ ވުޒާރާގެ ސިޔާސީ މަގާމެއް ފުރުއްވަމުން ގެންދެވި ބޭފުޅެއް ކަމަށާއި، ސަފީރެއްގެ މަގާމަށް އެ ބޭފުޅާ އައްޔަނުކުރެއްވީ 30 އޮކްޓޯބަރު 2024 ގައެވެ.
ފޮރިން ސާވިސްގެ މުވައްޒަފުންނަށް ކޯޑް އޮފް ކޮންޑަކްޓްގެ ދަށުން ސިޔާސީ ޕާޓީއެއްގެ މެންބަރެއްގެ ގޮތުގައި ނުހުރެވޭނެކަން ފާހަގަކޮށް، އެފަދަ މުވައްޒަފުން ގާނޫނާ ޚިލާފަށް ސިޔާސީ ޕާޓީއަކަށް ސޮއިކުރުމަށް ސަރުކާރުން އެއްވެސް މަޖުބޫރުކަމެއް ކޮށްފައި ނުވާނެ ކަމަށްވެސް އެ ބަޔާނުގައިވެއެވެ.
މީގެއިތުރުން، ޚާރިޖީ ވުޒާރާއާއި އެ ވުޒާރާގެ މުވައްޒަފުންނާ ގުޅުވައިގެން ހަގީގަތާ ޚިލާފު އަދި ސާބިތުނުވާ މައުލޫމާތު އާންމު ނުކުރުމަށްވެސް ފޮރިން މިނިސްޓްރީން ވަނީ އިލްތިމާސްކޮށްފައެވެ.
