ރާއްޖޭގެ އުތުރުގެ އަތޮޅުތައް ވައިގެ ދަތުރުފަތުރުގެ ނިޒާމުން ގުޅުވާލުމުގެ މަސައްކަތުގެ ދަށުން، އައިލެންޑް އޭވިއޭޝަނަށް ކުރިއަށް އޮތް އަހަރުގެ ކުރީކޮޅު އާ ދެ މަތިންދާބޯޓު ގެނައުމުގެ މަސައްކަތް ކުރަމުންދާ ކަމަށް ފަތުރުވެރިކަމާއި މަދަނީ އުދުހުންތަކާ ބެހޭ ވަޒީރު މުހައްމަދު އަމީން ވިދާޅުވެއްޖެއެވެ.
ސަރުކާރުން ބޭއްވި ”އަހާ“ ފޯރަމްގައި ވާހަކަދައްކަވަމުން ވަޒީރު ވިދާޅުވީ، ރާއްޖޭގެ ދެކުނުގެ ހަތަރު އަތޮޅު ވައިގެ މަގުން ގުޅުވާލެވިފައިވާ ފަދައިން އުތުރުގެ ހއ. ހދ. އަދި ށ. އަތޮޅުވެސް އެކީގައި ގުޅުވާލުމަކީ ރައީސުލްޖުމްހޫރިއްޔާ ނިންމަވައި އިއުލާނު ކުރައްވާފައިވާ ކަމެއް ކަމަށެވެ. އަދި އަލަށް ގެންނަ ދެ މަތިންދާބޯޓާއެކު އެ ސަރަހައްދުގެ އެއާ ޓްރެވަލްގެ ހަރަކާތްތަކާއި ފަތުރުވެރިކަން އެކީގައި ފެށިގެންދާނެ ކަމަށްވެސް ވަޒީރު ފާހަގަކުރެއްވިއެވެ.
ނިމިދިޔަ ސަރުކާރުގައި ތަރައްގީކުރަން ފަށައި މި ސަރުކާރުގައި ހުޅުވި ހދ. ހަނިމާދޫ އިންޓަނޭޝަނަލް އެއާޕޯޓަކީ ދުރު ދަތުރުތައް ކުރާ އެންމެ ބޮޑެތި މަތިންދާބޯޓުތަކަށް ޖެއްސޭ ފެންވަރަށް ތަރައްގީކުރެވިފައިވާ ތަނަކަށް ނުވާތީ، އެ ސަރަހައްދުގެ ރައްޔިތުންނަށް ގިނަ ގޮންޖެހުންތަކެއް ހުރިކަން ވަޒީރު ފާހަގަކުރެއްވިއެވެ. އެއީ ހަނިމާދޫ އެއާޕޯޓު ތަރައްގީކުރުމުގައި ޝާމިލު ރޭވުމެއް ނެތުމާއި، އެ ސަރަހައްދުގައި ފަތުރުވެރިކަން އެކަށީގެންވާ ވަރަށް ތަރައްގީވެފައި ނެތުމުން ބައިނަލްއަގުވާމީ ދަތުރުތައް ފެށުމަށް ދިމާވި ހުރަހެއް ކަމަށްވެސް ވިދާޅުވިއެވެ.
މި މައްސަލަތަކަށް ދާއިމީ ހައްލެއް ހޯދައިދިނުމުގެ ގޮތުން، އެ ސަރަހައްދުގައި ފަތުރުވެރިކަން ފުޅާކުރުމަށް ރަށްތައް ދޫކުރުމުގެ މަސައްކަތާއި، ވަށާޖެހޭ ރޭވުމެއްގެ ދަށުން ދަތުރުފަތުރުގެ ނިޒާމު ހަރުދަނާކުރުމުގެ މަސައްކަތް ސަރުކާރުން ކުރިއަށްދާ ކަމަށް ވަޒީރު ވިދާޅުވިއެވެ. މިއާއެކު އުތުރުގެ ރައްޔިތުންގެ ކަންބޮޑުވުންތަކަށް އަމަލީ ހައްލެއް ލިބިގެންދާނެ ކަމުގެ ޔަގީންކަން ވަނީ ދެއްވާފައެވެ.
