މަގުމަތީގައި ހިނގާ އެކްސިޑެންޓުތަކުގެ ތަޙުޤީޤުތައް މިހާރަށްވުރެ ހަރުދަނާކޮށް އަވަސްކުރުމުގެ މަޤުޞަދުގައި، ”ސްމާޓް ޑްރޯ“ ނަމަކަށް ކިޔާ ޚާއްޞަ ޓްރެފިކް އިންވެސްޓިގޭޝަން ސޮފްޓްވެއަރއެއް ދިވެހި ފުލުހުންގެ ޚިދުމަތުން ބޭނުންކުރަން ފަށައިފިއެވެ.
މިއީ ޓްރެފިކް ޕޮލިސް އެންޑް ރޯޑު މެނޭޖްމަންޓުގެ ދަށުން ހިންގާ ޓްރެފިކް އިންވެސްޓިގޭޝަން ފަންކްޝަނުން ތަޢާރަފުކުރި ޒަމާނީ ވަސީލަތެކެވެ.
ފުލުހުން ބުނި ގޮތުގައި، މި ސޮފްޓްވެއަރއަކީ އެކްސިޑެންޓު ހިނގާ ސަރަޙައްދުތަކުގެ ސްކެޗުތަކާއި ޑައިގްރާމްތައް ކުރެހުން ފަސޭހަކޮށްދިނުމަށް ޚާއްޞަކޮށްގެން ފަރުމާކޮށްފައިވާ ޔޫޒަރ-ފްރެންޑްލީ ނިޒާމެކެވެ. މިއީ ތަޙުޤީޤީ ރިޕޯޓުތަކުގެ ފެންވަރު މަތިކުރުމަށާއި، ހެކި ޑޮކިއުމެންޓުކުރުން އިތުރަށް ހަރުދަނާކޮށް، އޮޕަރޭޝަނަލް ހިންގުން އަވަސްކުރުމަށް އެޅުނު މުހިންމު ފިޔަވަޅެކެވެ.
މި ސޮފްޓްވެއަރގައި އިންޓަރސެކްޝަންތަކާއި ޓީ-ޖަންކްޝަންތައް އަދި ސީދާ މަގުތައް ހިމެނޭހެން ތަފާތު މަގުތަކުގެ ލޭއައުޓުތައް ކުރީބައިގައި ފަރުމާކޮށްފައި ހުންނާނެއެވެ. އަދި އެކި ބާވަތުގެ އުޅަނދުފަހަރާއި، ސައިކަލް، ޓްރެފިކް ނިޝާންތަކުގެ އިތުރުން މަގުބައްތި ފަދަ ތަޙުޤީޤަށް ބޭނުންވާ މުހިންމު ބައިތަކުގެ ރެޑީމޭޑް ސިމްބަލްތައްވެސް މި ސޮފްޓްވެއަރގައި ހިމެނެއެވެ.
މީގެ އިތުރުން، އެކްސިޑެންޓު ހިނގި ސަރަޙައްދުގެ މަންޒަރު އެންމެ ފުރިހަމައަށް އަދި ސައްޙަކޮށް ދެއްކުމަށްޓަކައި، ގޫގުލް މެޕްސްއާއި ސެޓެލައިޓް އިމޭޖުތައް ސޮފްޓްވެއަރއަށް އަޅައިގެން ޑައިގްރާމް ތައްޔާރުކުރުމުގެ ފުރުޞަތުވެސް މި ނިޒާމުގެ ތެރެއިން ލިބިގެންދެއެވެ.
ދިވެހި ފުލުހުންގެ ޚިދުމަތުން ދަނީ ރާއްޖޭގެ އެކި ކަންކޮޅުތަކުގައި ދޭ ޕޮލިސިންގ ޚިދުމަތްތައް އިތުރަށް ހަރުދަނާކުރުމަށް ޒަމާނީ ޓެކްނޮލޮޖީއާއި އައު ވަސީލަތްތައް ތަޢާރަފުކުރަމުންނެވެ. އަދި އެކްސިޑެންޓުތައް މަދުކުރުމަށް އާންމުން ހޭލުންތެރިކުރުވުމުގެ ޕްރޮގްރާމްތައް ކުރިއަށްގެންދާއިރު، ނުރައްކާތެރިކޮށް ދުއްވާ ފަރާތްތަކާމެދު ފުލުހުން ދަނީ ހަރުކަށި ފިޔަވަޅުތައްވެސް އަޅަމުންނެވެ.
