ޔޫކްރެއިންގެ ހަނގުރާމަ ހުއްޓުވުމަށް އެމެރިކާއިން އިސްނަގައިގެން މުހިންމު މަޝްވަރާތަކެއް ބާއްވަމުން ދަނިކޮށް، ރަޝިޔާއިން ޔޫކްރެއިންގެ ދެކުނުގެ ސިޓީއެއް ކަމަށްވާ ޒަޕޮރީޜިއާއަށް ދިން ނުރައްކާތެރި ވައިގެ ހަމަލާތަކެއްގައި ތިން ކުޑަކުދިން ހިމެނޭހެން 20 މީހުން މަރުވެއްޖެއެވެ.
ހޮނިހިރު ދުވަހުގެ ފަތިހުގެ ވަގުތެއްގައި ރަޝިޔާއިން އެއްފަހަރާ އެކި ސަރަހައްދުތަކަށް އަމާޒުކޮށް ދިން މި ހަމަލާތަކުގައި އެޕާޓްމަންޓް އިމާރާތްތަކެއް ބިމާ ހަމަވެފައިވާއިރު، މަރުވި މީހުންގެ ތެރޭގައި ހަ އަހަރުގެ އަންހެން ކުއްޖަކު ވެސް ހިމެނެއެވެ. މިއީ މި ހަފުތާގެ ތެރޭގައި ރަޝިޔާއިން އާންމުންނަށް އަމާޒުކޮށް ދިން މިފަދަ ތިންވަނަ ބޮޑު ހަމަލާއެވެ. މި ހަފުތާގެ ބުދަ އަދި ބުރާސްފަތި ދުވަހު ދިން ހަމަލާތަކުގައި ވެސް 80 އެއްހާ އާންމުން ވަނީ މަރުވެފައެވެ.
މި ހަމަލާއާ ގުޅިގެން ޔޫކްރެއިންގެ ރައީސް ވޮލޮޑިމީރް ޒެލެންސްކީ ވަނީ އެމެރިކާގެ ސިޔާސަތުތަކަށް ވަރަށް ބޮޑަށް ފާޑުވިދާޅުވެފައެވެ. ޚާއްސަކޮށް، ރަޝިޔާގެ ޑީސަލް އެކްސްޕޯޓް ކުރުމަށް އަޅާފައިވާ ދަތިކުރުމުގެ ފިޔަވަޅުތައް އުވާލަން އެމެރިކާގެ ރައީސް ޑޮނަލްޑް ޓްރަމްޕް ނިންމެވި ނިންމެވުމަށް އިޝާރާތް ކުރައްވައި ޒެލެންސްކީ ވިދާޅުވީ، ދަތިކުރުމުގެ ފިޔަވަޅުތައް އުވާލުމުން ރަޝިޔާއިން އެކަމުގެ ޝުކުރު އަދާކުރީ ޒަޕޮރީޜިއާގެ އާންމުން ދިރިއުޅޭ އިމާރާތްތަކަށް ފަސް ބޮން އަޅައިގެން ކަމަށެވެ.
ވިލާތުގެ އިއްތިހާދު (އީޔޫ) ގެ ޚާރިޖީ ސިޔާސަތާ ބެހޭ ވެރިޔާ ކާޖާ ކައްލަސް ވެސް ވަނީ އެމެރިކާގެ މި ނިންމުމަށް ފާޑުވިދާޅުވެފައެވެ. އޭނާ ވިދާޅުވީ ރަޝިޔާގެ ޑީސަލް މައްޗަށް އޮތް ދަތިކުރުމުގެ ފިޔަވަޅުތައް އުވާލުމަކީ ހަނގުރާމައަށް ރަޝިޔާއަށް ހިތްވަރު ދިނުން ކަމަށާއި، ވިލާތުން ރަޝިޔާއަށް ދޭ ޕްރެޝަރު ކުޑަނުކުރާނެ ކަމަށެވެ. އެމެރިކާއިން މި ފިޔަވަޅު އުވާލަން ނިންމީ އީރާނާ އެކު އުފެދިފައިވާ ނުތަނަވަސްކަމުގެ ސަބަބުން ދުނިޔޭގެ ބާޒާރުގައި ތެލުގެ އަގު އުފުލެމުންދާތީ އެކަން ކޮންޓްރޯލް ކުރުމުގެ ބޭނުމުގައެވެ.
މި ހަމަލާތައް ދީފައި މިވަނީ، ފިނި މޫސުން އައުމުގެ ކުރިން ހަނގުރާމަ ދާއިމީކޮށް ހުއްޓުވުމަށް މަގުފަހިކުރުމަށްޓަކައި އެމެރިކާގެ ފްލޮރިޑާގެ މަޔާމީގައި އެމެރިކާ، ޔޫކްރެއިން، އީޔޫ އަދި ނޭޓޯގެ އޮފިޝަލުންގެ މެދުގައި މުހިންމު މަޝްވަރާތަކެއް ބާއްވާފައި ވަނިކޮށެވެ. އެމެރިކާގެ މަންދޫބު ސްޓީވް ވިޓްކޮފް ވިދާޅުވީ، ހަނގުރާމަ ހުއްޓުވުމަށާއި ޔޫކްރެއިންގެ ސަލާމަތީ ކަންކަމާއި އަދި ހަނގުރާމައަށްފަހު ގައުމު އާރާސްތުކުރުމާ ގުޅޭގޮތުން ވަރަށް ”އެދެވޭ އަދި ކާމިޔާބު“ މަޝްވަރާތަކެއް ކުރެވުނު ކަމަށެވެ.
ނަމަވެސް އެމެރިކާގެ ސެކްރެޓަރީ އޮފް ސްޓޭޓް މާކޯ ރޫބިއޯ ވަނީ ހަނގުރާމަ މިހާރު އޮތް ހުއްޓުމަކަށް އައިސްފައިވާ ހާލަތުން ސުލްހައިގެ އެއްބަސްވުމަކަށް ނުދެވިއްޖެނަމަ، ހަމަނުޖެހުންތައް އިތުރަށް ފުޅާވެ، އަވަށްޓެހި ނޭޓޯގެ ގައުމުތަކަށް ވެސް ހަނގުރާމައިގެ އަސަރު ފޯރުމުގެ ނުރައްކާ ބޮޑުވެފައިވާ ކަމަށް އިންޒާރު ދެއްވާފައެވެ.
