ބައިނަލްއަގުވާމީ އަންހެންކުދިންގެ ދުވަހުގެ މުނާސަބަތުގައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ އަނބިކަނބަލުން، މެޑަމް ސާޖިދާ މުޙައްމަދު މިއަދު ސޯޝަލް މީޑިއާގައި މެސެޖެއް ހިއްސާކުރައްވައިފިއެވެ.
މެޑަމް ސާޖިދާ ހިއްސާކުރެއްވި ޕޯސްޓުގައި، ރާއްޖެއާއި މުޅި ދުނިޔޭގެ އެކި ކަންކޮޅުތަކުގައި ތިބި އަންހެންކުދިންގެ ހިތްވަރާއި، އުންމީދުތަކާއި އަދި އެކުދިންގެ ނިމުމެއްނެތް ގާބިލުކަން ފާހަގަކުރައްވައި، ތަހުނިޔާ ވިދާޅުވެފައިވެއެވެ.
އެކަމަނާގެ މެސެޖުގައި ވިދާޅުވެފައިވަނީ، އަންހެންކުދިންނަކީ ލީޑަރުން ކަމަށާއި، އީޖާދީ ވިސްނުންތަކުގެ ވެރިންގެ އިތުރުން ހެޔޮ ބަދަލުތައް ގެނެސްދޭ ބައެއް ކަމަށެވެ. އަދި އެކުދިންގެ އަޑާއި، ހުނަރާއި އަދި ލީޑަރޝިޕަކީ ވަރުގަދަ އަދި ކެތްތެރި މުޖުތަމައުތަކެއް ބިނާކުރުމަށް ވަރަށް ބޮޑު އެހީތެރިކަމެއް ފޯރުކޮށްދޭ ކަންކަން ކަމުގައި ފާހަގަކުރެއްވިއެވެ.
On International #DayOfTheGirl, we celebrate the strength, ambition, and endless potential of girls in the Maldives and around the world. Girls are leaders, innovators, and changemakers whose voices, talents, and leadership contributes extensively to stronger and more resilient… pic.twitter.com/YI5GZLIglN
— First Lady Sajidha Mohamed (@sajidhaamohamed) October 11, 2026
މީގެއިތުރުން، އަންހެންކުދިން ބާރުވެރިކުރުވުމަކީ ހަމައެކަނި އެކުދިންގެ އަމިއްލަ ދިރިއުޅުމަށް އަންނަ ބަދަލެއް ނޫން ކަމަށާއި، އެއީ މުޅި ގައުމުގެ މުސްތަގުބަލު އުފުލައިދޭ މުހިންމު ބާރެއް ކަމަށް މެޑަމް ވިދާޅުވިއެވެ. އެގޮތުން ތަޢުލީމީ ދާއިރާއާއި، ދައުލަތުގެ ޚިދުމަތްތަކާއި، ވިޔަފާރިވެރިކަމާއި، ކުޅިވަރުގެ އިތުރުން މުޖުތަމައުގެ އިސް ސަފުގައި އަންހެންކުދިންނާއި ޒުވާން އަންހެނުން ދައްކަމުންދާ ފާހަގަކޮށްލެވޭ ފަދަ ޚިދުމަތްތައް ރާއްޖެއިން ފެންނަމުންދާ ކަމަށް އެކަމަނާ ފާހަގަކުރެއްވިއެވެ.
އެކަމަނާގެ މެސެޖު ނިންމަވާލައްވަމުން ވިދާޅުވީ، އަންހެންކުދިން ދެމުންގެންދާ އަގުހުރި ޚިދުމަތްތަކާއި ހޯދަމުންދާ ކާމިޔާބީތަކަކީ ވަރުގަދަ އަދި ދެމެހެއްޓެނިވި ގައުމުތަކެއް ބިނާކުރުމަށް ނުހަނު ބޮޑަށް ބާރުއަޅާ ކަންކަން ކަމުގައެވެ.
