އިންސާނުންގެ އަތްމަތީގައިވާ މުދަލަކީ ވަގުތީ ގޮތުން ޙަވާލުކުރެވިފައިވާ އިލާހީ އަމާނާތެއް ކަމަށާއި، ޙަރާމް ގޮތުގައި އާމްދަނީ ހޯދުމަކީ އަމާނާތަށް ވެވޭ ބޮޑު ޚިޔާނާތެއް ކަމަށް މިއަދުގެ ހުކުރު ޚުޠުބާގައި ވިދާޅުވެއްޖެއެވެ.
”މުދަލަކީ މާތް ﷲގެ ޙައްޤެކެވެ“ މި މައުޟޫޢަށް މިއަދު ދެއްވި ހުކުރު ޚުޠުބާގައި ވިދާޅުވީ، ކާއިނާތުގައިވާ އެންމެހައި ތަކެއްޗަކީ މާތް ﷲގެ ފުރިހަމަ މިލްކުވެރިކަމުގެ ދަށުގައިވާ ތަކެތި ކަމަށެވެ. އަދި ދުނިޔޭގައި ލިބިފައިވާ މުދަލަކީ އިންސާނުން އިމްތިޙާނު ކުރެއްވުމަށް ދެއްވާފައިވާ އެއްޗެއް ކަމަށާއި، ޤިޔާމަތް ދުވަހު އެ މުދާ ހޯދި ގޮތާއި ހޭދަކުރި ގޮތާމެދު މާތް ﷲގެ ޙަޟުރަތުގައި ޖަވާބުދާރީވާން ޖެހޭނެ ކަމަށް ޚުޠުބާގައި ހަނދާންކޮށްދެއްވިއެވެ.
ޚުޠުބާގައި ބަޔާންކުރެއްވި ގޮތުގައި، ރިބާކެއުމާއި، ރިޝްވަތާއި، މަކަރާއި ޙީލަތް ހެދުމާއި، ވައްކަމާއި، ޖުވާކުޅުމާއި އަދި އަމާނާތަށް ޚިޔާނާތްތެރިވުން ފަދަ ނަހަމަ ގޮތްގޮތުން ފައިސާ ހޯދުމަކީ މާތް ﷲ ކަނޑައެޅިގެން ޙަރާމްކުރައްވާފައިވާ ކަންކަމެވެ. އަދި ޙަރާމް ތަކެތި ކައިގެން ހެދިބޮޑުވާ ކޮންމެ ހަށިގަނޑަކަށް އެންމެ އައުލާކަން ބޮޑީ ނަރަކައިގެ އަލިފާން ކަމަށް ރަސޫލާގެ ޙަދީޘްފުޅާ ޙަވާލާދީ ޚުޠުބާގައި ވިދާޅުވިއެވެ.
ޙަލާލު ގޮތުގައި އާމްދަނީ ހޯދުމުގެ މުހިންމުކަމަށް އަލިއަޅުވާލައްވަމުން، ތެދުވެރިކަމާއެކު ކުރާ މަސައްކަތާއި އަދާކުރާ ވަޒީފާއިން ލިބޭ އުޖޫރައާއި، ހުއްދަ ވިޔަފާރިތަކުން ލިބޭ ފައިސާއަކީ ޙަލާލު ތަކެތި ކަމަށް ޚުޠުބާގައި ބަޔާންކުރެއްވިއެވެ. އަދި އެ މުދަލުން އަނބިދަރިންނާއި މައިންބަފައިންނަށް ހޭދަކުރުމަކީ މަތިވެރި ދީނީ ވާޖިބެއް ކަމަށާއި، އަހަރަކު އެއްފަހަރު މުދާ ޠާހިރުކުރުމަށް ޓަކައި ފަރުޟު ޒަކާތް އަދާކުރުމަށް ޚުޠުބާގައި އިލްތިމާސްކުރެއްވިއެވެ.
މީގެ އިތުރުން، މުދާ އިސްރާފުކުރުމާއި ބޭކާރު ގޮތުގައި ހަލާކުކޮށްލުމަކީ ވެސް އަމާނާތަށް ޚިޔާނާތްތެރިވުން ކަމަށާއި، މުދަލާއި މުއްސަނދިކަމަކީ ޙަލާލު ގޮތުގައި ހޯދައި ހެޔޮ ގޮތުގައި ހޭދަކުރާ ނަމަ ޒުހުދުވެރިކަމާ ފުށުއަރާ ކަމެއް ނޫން ކަމަށް ޚުޠުބާގައި ނިންމަވާލައްވަމުން ވިދާޅުވިއެވެ.
