އީރާނާ ގުޅުންހުރި ނެޓްވޯކަކުން އާޓިފިޝަލް އިންޓެލިޖެންސް (އޭއައި) ބޭނުންކޮށްގެން ފޭކް ނޫސްވެރިންތަކެއް އުފައްދައި، ބައިނަލްއަޤްވާމީ މީޑިއާތަކުގައި ޚަބަރު ފަތުރަމުންދިޔަ ”ބޯގަސް ބައިލައިންސް“ ނަމަކަށް ކިޔާ ކެމްޕޭނެއް އޯޕަންއޭއައި އިން ހުއްޓުވައިފިއެވެ.
މި އޮޕަރޭޝަންގައި ހުޅަނގުގެ ނަންތައް ބޭނުންކޮށްގެން 7 ފޭކް ނޫސްވެރިންގެ އައިޑެންޓިޓީ އުފައްދާފައިވެއެވެ. އަދި ބައިނަލްއަޤްވާމީ މައްސަލަތަކާ ގުޅޭގޮތުން ލިޔެފައިވާ 100 އާ ގާތްކުރާ އަދަދެއްގެ އާޓިކަލް، ދުނިޔޭގެ އެކި ކަންކޮޅުތަކުގައިވާ 12 ވަރަކަށް އަސްލު މީޑިއާ އައުޓްލެޓެއްގައި ވަނީ ކާމިޔާބުކަމާއެކު ޝާއިޢުކޮށްފައެވެ.
އީރާނުގެ މި ނެޓްވޯކުން ޗެޓްޖީޕީޓީ ބޭނުންކޮށްފައިވަނީ ލިޔުންތަކުގެ ފެންވަރު ރަނގަޅުކޮށް، ނޫސްތަކުގެ އެޑިޓަރުންނަށް ފޮނުވާ އީމެއިލްތައް ލިޔެ، އަދި ސޯޝަލް މީޑިއާ ކޮމެންޓްތައް އުފެއްދުމަށެވެ. މީގެ އިތުރުން އެމީހުންގެ އަމިއްލަ ރިޕޯޓުތައް ތައްޔާރުކުރުމަށްވެސް އޭއައި ބޭނުންކޮށްފައިވެއެވެ.
މި ލިޔުންތަކުގެ މައިގަނޑު މަޤްޞަދަކީ އެމެރިކާ-އީރާނު ހަނގުރާމައިގައި ދުނިޔޭގެ ވިސްނުން ބަދަލުކުރުމެވެ. އެގޮތުން، އެމެރިކާއަކީ އިސްވެ ޙަމަލާދޭ ގޯސް ފަރާތްކަމަށާއި، އިސްރާއީލަކީ އިތުބާރު ނުކުރެވޭ ބައެއްކަމަށް، އަދި އީރާނަކީ އަނިޔާ ލިބެމުންދާ ޤައުމެއްކަމަށް ދެއްކުމަށް މި ލިޔުންތަކުގައި މަސައްކަތްކޮށްފައިވެއެވެ
