އެމެރިކާގައި ނޮވެމްބަރު 3 ވަނަ ދުވަހު ބާއްވާ މިޑްޓަރމް އިންތިޚާބުގެ ކުރިން އީރާނަށް އެއްވެސް އަސްކަރީ ޙަމަލާއެއް ނުދޭނެކަމަށް އެމެރިކާގެ ރައީސް ޑޮނަލްޑް ޓްރަމްޕް ބުނެފިއެވެ.
ޓްރަމްޕް ބުނީ އީރާނާއެކު މިހާރު ކުރިއަށްދާ މަޝްވަރާތަކަކީ ވަރަށް ”ކާމިޔާބު“ އަދި އުންމީދީ މަޝްވަރާތަކެއް ކަމަށެވެ. އެހެންކަމުން، މިވަގުތު އީރާނުގެ ނިއުކްލިއަރ ނުވަތަ ތެލުގެ މަރުކަޒުތަކަށް ޙަމަލާދިނުމުގެ އެއްވެސް ވިސްނުމެއް ނެތްކަމަށް އޭނާ ހާމަކުރިއެވެ. މިއާއެކު މެދުއިރުމަތީގައި ބޮޑު ހަނގުރާމައެއް ފެށިދާނެކަމަށް އޮތް ބިރުވެރިކަމަށް ވަނީ ކޮންމެވެސް ވަރެއްގެ ލުޔެއް ލިބިފައެވެ.
ސިޔާސީ މުޙައްލިލުން ދެކޭގޮތުގައި، އިންތިޚާބާ ގާތްވެފައިވަނިކޮށް ބޮޑު ހަނގުރާމައެއް ފަށައިފިނަމަ، ތެލުގެ އަގު އުފުލި، އެމެރިކާގެ އިޤްތިޞާދަށް އޭގެ ނޭދެވޭ އަސަރުކޮށް، އިންތިޚާބުގައި ވެރިކަންކުރާ ޕާޓީއަށް ގެއްލުންވުމުގެ ފުރުޞަތު ބޮޑެވެ. އެހެންކަމުން މިއީ ސިޔާސީ ގޮތުންވެސް ރައްކާތެރިވުމަށް އެޅި ފިޔަވަޅެއްކަމަށް ބެލެވެއެވެ.
