ނަރެންދުރަ މޯދީގެ ބީޖޭޕީ ސަރުކާރުގެ ފުރަތަމަ ދެ ދައުރުގެ ތެރޭގައި (2014 އިން 2024 އަށް) އިންޑިއާގައި ހިންގާފައިވާ ”މޮބް ލިންޗިންގ“ ނުވަތަ ބަޔަކު އެއްވެ މީހުންނަށް އަނިޔާކޮށް މެރުމުގެ 1،743 ޙާދިސާ ހިމެނޭ 744 ޞަފުޙާގެ ބޮޑު ފޮތެއް ނެރެފިއެވެ.
’އަ ރެކޯޑް’، 2014-2024 ގެ ނަމުގައި މި ފޮތް ލިޔުއްވާފައިވަނީ ތަޖުރިބާކާރު ނޫސްވެރިޔާ އަދި މުސްލިމް ލީޑަރެއް ކަމަށްވާ ޡަފަރުލް އިސްލާމް ޚާން އެވެ. މި ފޮތުގައިވާ މަޢުލޫމާތުތަކަށް ބަލާއިރު، މި އަނިޔާވެރި ޢަމަލުތައް އެންމެ ގިނައިން އަމާޒުކޮށްފައިވަނީ އިންޑިއާގެ މުސްލިމުންނާއި، ކްރިސްޓިއަނުންނާއި، އަދި ދަށު ފަންތީގެ ހިންދޫން ކަމަށްވާ ދަލިތުންނަށެވެ.
ޡަފަރުލް އިސްލާމް ޚާން މި ޢަމަލުތައް ސިފަކޮށްފައިވަނީ ”ޓެރަރިޒަމްގެ ތަފާތު ވައްތަރެއް“ ގެ ގޮތުގައެވެ. އޭނާ ބުނި ގޮތުގައި މިއީ މިހާރު އިންޑިއާގެ މުޖުތަމަޢުގައި ”އާންމު ކަމަކަށް“ ބަދަލުވެފައިވާ ނުރައްކާތެރި ޙާލަތެކެވެ. 10 އަހަރުގެ ތެރޭގައި 1،700 އަށްވުރެ ގިނަ ޙާދިސާ ރެކޯޑުކުރެވިފައިވުމަކީ، ޤާނޫނު ތަންފީޒުކުރާ ފަރާތްތަކުގެ ފެއިލްވުމެއްގެ އިތުރުން، މިކަމަށް ސިޔާސީ ގޮތުން ލިބެމުންދާ ހިތްވަރު ދައްކުވައިދޭ ކަމެއްކަމަށް ފާޑުކިޔާ ފަރާތްތަކުން ބުނެއެވެ.
