އިސްރާއީލުގެ އަނިޔާވެރި ސިފައިން މުޅި ޣައްޒާއަށް ދެމުންގެންދާ ވައިގެ އަދި އެއްގަމު ހަމަލާތަކުގައި، ސަލާމަތީ މަސައްކަތްތެރިއަކު ހިމެނޭހެން މަދުވެގެން ހަތަރު ފަލަސްޠީނު މީހުން ޝަހީދުވެ، އިތުރު ބަޔަކު ޒަޚަމްވެއްޖެއެވެ.
ބޭރުގެ ޚަބަރުފަތުރާ ވަސީލަތްތަކުން ރިޕޯޓުކޮށްފައިވާ ގޮތުގައި، ޣައްޒާގެ އުތުރުގައި އޮންނަ ބައިތު ލާހިޔާގެ ކަމާލް އަދުވާން ހޮސްޕިޓަލް ކައިރިން އަނިޔާވި މީހުންނަށް އެހީތެރިވުމަށް ދަތުރުކުރަމުން ދިޔަ ފަލަސްތީނިއަން ސިވިލް ޑިފެންސްގެ ވޮލަންޓިއަރަކު ވަނީ އިސްރާއީލުގެ ވައިގެ ހަމަލާއެއްގައި ޝަހީދުވެފައެވެ. ސިވިލް ޑިފެންސުން މަޢުލޫމާތު ދީފައިވާ ގޮތުގައި ޝަހީދުވެފައިވަނީ މުޙައްމަދު ތަމޫސް ނަމަކަށް ކިޔާ ރެސްކިއު ވޯކަރެކެވެ.
މީގެ އިތުރުން، ޣައްޒާގެ ދެކުނުގައިވާ ޚާން ޔޫނިސްއަށް އިސްރާއީލުން ޑްރޯން މެދުވެރިކޮށް ދިން ހަމަލާއެއްގައި އުމުރުން 60 އަހަރުގެ ހިޝާމް އިބްރާހީމް އަބޫ މުޞްޠަފާ ޝަހީދުވެ، އިތުރު ބަޔަކު ޒަޚަމްވެފައިވާ ކަމަށް ނާޞިރު ހޮސްޕިޓަލުން ކަށަވަރުކޮށްދީފައިވާކަމަށް ރިޕޯޓުތައް ބުނެއެވެ. އަދި ޚާން ޔޫނިސްގެ ދެކުނުގައިވާ ޤީޒާން އަބޫ ރަޝްވާން ސަރަޙައްދަށް ދިން އެހެން ޑްރޯން ހަމަލާއެއްގައި 17 އަހަރުގެ ފަލަސްޠީނު ޒުވާނަކު ޝަހީދުވެގެން އޭނާގެ ހަށިގަނޑު ވެސް ވަނީ ނާޞިރު ހޮސްޕިޓަލަށް ގެންގޮސްފައި ކަމަށްވެވެ.
ތުރުކީގެ އަނަދޯލޫ ނިއުސް އޭޖެންސީން ރިޕޯޓުކޮށްފައިވާ ގޮތުގައި، ވޭތުވެދިޔަ މަހު ޚާން ޔޫނިސްގެ އިރުމަތީގައި އިސްރާއީލު ސިފައިން ބަޑިޖެހުމުގެ ސަބަބުން އަނިޔާވި ފުރާވަރުގެ ފިރިހެން ކުއްޖަކު ވެސް ވަނީ ލިބުނު ޒަޚަމްތަކަށް ފަރުވާ ހޯދަމުން ދަނިކޮށް ޝަހީދުވެފައެވެ. ހަމައެއާއެކު، ބުދަ ދުވަހު އަލް-އަމަލް އަވަށުގައި ގެދޮރު ގެއްލިފައިވާ ފަލަސްޠީނު ރައްޔިތުން ދިރިއުޅެމުންދިޔަ ފޭލިގެތަކަކަށް އިސްރާއީލު ސިފައިން ދިން ބަޑީގެ ހަމަލާތަކެއްގައި ކުޑަ އަންހެން ކުއްޖަކު ވަނީ ޒަޚަމްވެފައެވެ.
މީހުން މެރުމުގެ އިތުރުން، އިސްރާއީލުގެ އަސްކަރިއްޔާއިން ދަނީ ޢާންމުންގެ ގެދޮރު ސުންނާފަތި ކުރުމުގެ އުދުވާނުތައްވެސް ހިންގަމުންނެވެ. އެގޮތުން ޚާން ޔޫނިސްގެ އިރުއުތުރާއި އިރުމަތީ ސަރަޙައްދުތަކުން ބައެއް އިމާރާތްތައް ގޮއްވާލައި ބިމާ ހަމަކޮށްފައިވާއިރު، ޣައްޒާ ސިޓީގެ ތުއްފާޙް އަވަށުގެ އިރުމަތީ ސަރަޙައްދުގައިވެސް އިސްރާއީލު ސިފައިން ވަނީ އިމާރާތްތައް ތަޅާލައި ބޮޑެތި ގެއްލުންތަކެއް ދީފައެވެ.
