ޔުނައިޓެޑް ޢަރަބް އެމިރޭޓްސް (ޔޫއޭއީ) ގެ މައްޗަށް 2-0 ގެ ނަތީޖާއަކުން ކުރިހޯދައި، 22 އަހަރުގެ ދިގު އިންތިޒާރަކަށްފަހު ސަޢޫދީ ޢަރަބިއްޔާއިން އަރަބިއަން ގަލްފް ކަޕްގެ ޗެމްޕިއަންކަން ހޯދައިފިއެވެ.
ސަޢޫދީގެ ޖިއްދާގައި ހުންނަ ކިންގް ޢަބްދުﷲ ސްޕޯޓްސް ސިޓީ ސްޓޭޑިއަމްގައި އަންގާރަ ދުވަހު ކުޅުނު ފޯރިގަދަ ފައިނަލް މެޗުގައި ސަޢޫދީ ޓީމުން ވަނީ މެޗުގެ ކުރީކޮޅު ދެ ލަނޑު ޖަހައި ލީޑު ނަގާފައެވެ. މި މެޗުގައި ސަޢޫދީ ޓީމަށް ލަނޑުތައް ކާމިޔާބުކޮށްދިނީ ހައްމާމް އަލް-ހައްމާމީ އަދި ފިރާސް އަލް-ބުރައިކާންއެވެ. މިއީ އެ ޤައުމުން ގަލްފް ކަޕް ކާމިޔާބުކުރި ހަތަރުވަނަ ފަހަރެވެ. ސަޢޫދީން އެންމެ ފަހުން މި މުބާރާތް ކާމިޔާބުކޮށްފައިވަނީ 2004 ވަނަ އަހަރުއެވެ.
މެޗު ފަށައިގެން 11 ވަނަ މިނެޓުގައި ޕެނަލްޓީ އޭރިއާގެ ބޭރުން ފޮނުވާލި ހަމަލާއަކުން ސަޢޫދީއަށް ފުރަތަމަ ލަނޑު ޖަހައިދިނީ އަލް-ހައްމާމީއެވެ. އޭގެ ދެ މިނެޓު ފަހުން، ނާސިރު އަލް-ދައުސަރީ ދިން ރީތި ޕާހަކުން ޓީމުގެ ދެވަނަ ލަނޑު ކާމިޔާބުކޮށްދިނީ އަލް-ބުރައިކާންއެވެ. އަދި މެޗުގެ 16 ވަނަ މިނެޓުގައި ސާލިޙް އަބޫ އަލް-ޝާމަތު ފޮނުވާލި ހަމަލާ ގޯލުގެ ދަނޑިއަށް އަމާޒުވުމުން ތިންވަނަ ލަނޑެއް ޖެހުމުގެ ފުރުޞަތު ސަޢޫދީއަށް ވަނީ ގެއްލިފައެވެ.
މެޗުގެ 24 ވަނަ މިނެޓުގައި ޔޫއޭއީގެ ނިކޮލަސް ޖިމެނޭޒް ފޮނުވާލި ބޯޅަ ގޯލުގެ ދަނޑިއަށް އަމާޒުވި އިރު، ފުރަތަމަ ހާފު ނިމެން ހަ މިނެޓަށް ވެފައިވަނިކޮށް އެ ޓީމުގެ ބްރޫނޯއަށް ލިބުނު ޕެނަލްޓީ ވަނީ ވީއޭއާރު (VAR) ބެލުމަށްފަހު ކެންސަލްކޮށްފައެވެ. އަދި ދެވަނަ ހާފުގެ ކުރީކޮޅު ޔޫއޭއީގެ ސުލްޠާން ޢާދިލް ފޮނުވާލި ނުރައްކާތެރި ހަމަލާ ސަޢޫދީގެ ކީޕަރު މުޙައްމަދު އަލް-އުވައިސް ވަނީ ހުށިޔާރުކަމާއެކު ދިފާޢުކޮށްފައެވެ.
މެޗަށްފަހު ވާހަކަދައްކަމުން ސަޢޫދީގެ ހެޑް ކޯޗު ޖިއޯޖިއޮސް ޑޯނިސް ބުނީ، މިއީ ގިނަ ގޮންޖެހުންތަކަކަށްފަހު ކުޅުންތެރިން ދެއްކި ޑިސިޕްލިން އަދި ހިތްވަރުގެ ނަތީޖާ ކަމަށެވެ. އަދި ވޯލްޑް ކަޕަށްފަހު ހެދުނު ގޯސްތަކުން ޢިބްރަތް ހާސިލުކޮށް، ކުޅުން ރަނގަޅުކުރެވުނު ކަމަށާއި މި ކާމިޔާބީއަކީ ކުރިމަގަށް ލިބުނު ވަރަށް ބޮޑު އިތުބާރެއް ކަމަށްވެސް އޭނާ ފާހަގަކުރިއެވެ.
ފީފާ ވޯލްޑް ކަޕް 2026 ގެ ގްރޫޕް ސްޓޭޖުން ވަކިވާން ޖެހުނު ސަޢޫދީ ޓީމަށް، މި ލިބުނު ކާމިޔާބީ ވެގެންދާނީ 2027 ވަނަ އަހަރު އެ ޤައުމުގައި ބޭއްވުމަށް ހަމަޖެހިފައިވާ އޭއެފްސީ އޭޝިއަން ކަޕަށް ތައްޔާރުވުމަށް އެޅުނު ވަރުގަދަ ބިންގަލަކަށެވެ. މީގެއިތުރުން، ސަޢޫދީ ޢަރަބިއްޔާއަކީ ޤަޠަރަށްފަހު 2034 ވަނަ އަހަރުގެ ފީފާ ވޯލްޑް ކަޕް ބާއްވާ ދެވަނަ ގަލްފް ޤައުމެވެ.
