އީގަލް ހިލްސް ކުންފުނީގެ ޗެއަރމަން މުޙައްމަދު އަލްޢައްބާރު މާދަމާ ރާއްޖެ ވަޑައިގަތުމަށް ހަމަޖެހިއްޖެއެވެ.
އަލްޢައްބާރު ރާއްޖެ ވަޑައިގަތުމަށް ހަމަޖެހިފައިވަނީ މާދަމާ ހެނދުނެވެ. އޭނާ ރާއްޖެއަށް ކުރައްވާ މި ދަތުރުފުޅުގައި ރާއްޖޭގެ މީޑިއާތަކާ ބައްދަލުކުރައްވައި ހާއްސަ އިންޓަވިއުތަކެއް ދެއްވުމާއި ރާއްޖޭގެ ބޮޑެތި ވިޔަފާރިވެރިންނާ ބައްދަލުކުރެއްވުމަށް ވަނީ ހަމަޖެހިފައެވެ. މީގެއިތުރުން، މީޑިއާތަކަށާއި ވިޔަފާރިވެރިންނަށް މާދަމާ މެންދުރު ހާއްސަ ފަރިއްކޮޅެއް ވެސް ދެއްވުމަށް ވެސް ވަނީ ހަމަޖެހިފައެވެ.
އަލްޢައްބާރު މާދަމާ ރާއްޖެއަށް ވަޑައިގަތުމަށް ހަމަޖެހިފައިވާއިރު، އީގަލް ހިލްސް ކުންފުނިން ރަސްމާލޭގައި މޯލްޑިވްސް މެރީނާ އެންޑް ވޯޓަރ ފްރަންޓް މަޝްރޫއުގެ ނަމުގައި ތަރައްގީގެ ބޮޑު މަޝްރޫއެއް ހިންގުމަށް ވަނީ ނިންމައިފައެވެ. 20 ބިލިއަން ޑޮލަރުގެ މި މަޝްރޫއުގައި، ބައިނަލްއަގުވާމީ ފެންވަރުގެ ހިދުމަތްތަކާއި މަތީ ފަންތީގެ އަދި ބްރޭންޑެޑް ރެސިޑެންސްތަކާއި ޒަމާނީ މެރީނާއެއްގެ އިތުރުން ވޯޓަރފްރަންޓް މުނިފޫހިފިލުވުމުގެ ވަސީލަތްތައް ހިމެނެއެވެ.
މީގެއިތުރުން ވިޔަފާރި އާއި ކެއިންބުއިމާއި ތައުލީމާއި ސިއްހީ ހިދުމަތްތަކުގެ އިތުރުން އިޖުތިމާއީ އެންމެހައި ވަސީލަތްތައް ވެސް ތަރައްގީކުރުމަށް ވަނީ ހަމަޖެހިފައެވެ. މި މަޝްރޫއު ހިންގަނީ ރަސްމާލެއިން މިހާރު ހިއްކާފައިވާ 500 ހެކްޓަރުގެ ސަރަހައްދުގައި ކަމަށްވާއިރު، ބާކީ އޮތް 600 ހެކްޓަރު ހާއްސަކުރާނީ ގޯއްޗާއި ފްލެޓާއި އަސާސީ ހިދުމަތްތައް ގާއިމު ކުރުމަށެވެ. މި މަޝްރޫއު ކުރިއަށްގެންދިއުމުގެ ފުރުސަތު ލިބިގެންދިއުމަކީ އެ ކުންފުންޏަށް ލިބުނު ވަރަށް ބޮޑު ފަހުރެއް ކަމަށް އަލްޢައްބާރު މީގެކުރިން ވަނީ ވިދާޅުވެފައެވެ.
ރާއްޖެއަށް ކުރައްވާ ދަތުރުފުޅު ނިންމަވާލެއްވުމަށްފަހު އަލްޢައްބާރު އެނބުރި ގައުމަށް ފުރާވަޑައިގަތުމަށް ހަމަޖެހިފައިވަނީ އަންނަ ހުކުރު ދުވަހުއެވެ.
