ފްލައިދުބާއީ ފްލައިޓް 1073 ގެ ދަތުރުވެރިންނާއި ފަޅުވެރިން، ބޯޓު ޖޯޑަންގެ އުޑުމައްޗަށް ފޯރުމުގެ ކުރިން ބޯޓުގެ ކޮންޓްރޯލް އަނބުރާ ނުނެގިނަމަ، އިސްރާއީލުގެ ހަނގުރާމަމަތީ މަތިންދާބޯޓުތައް ޖޯޑަންގެ ވައިގެ ސަރަހައްދަށް ވަދެ، ބޭނުންވެއްޖެ ހާލަތެއްގައި އެ ބޯޓު ވައްޓާލުމަށް އޮތީ ތައްޔާރަށް ކަމަށް ސީބީއެސް ނިއުސްއަށް މައުލޫމާތު ދިން އިސްރާއީލުގެ މަސްދަރުތަކުން ހާމަކޮށްފިއެވެ.
އިސްރާއީލުން ވަނީ ސެޕްޓެމްބަރު 11 ގައި އެމެރިކާއަށް ދިން ފަދަ ހައިޖެކް ކުރުމުގެ ހާދިސާއަކަށް ތައްޔާރުވުމަށް އަހަރުތަކެއް ވަންދެން މަސައްކަތްކޮށްފައެވެ. އިސްރާއީލުގެ ވައިގެ ސިފައިންނަށް އެ ބޯޓާ ގުޅޭގޮތް ނުވުމާއެކު، ކުއްލި ކޮމާންޑް ސެންޓަރެއް ވަގުތުން ގާއިމުކޮށް، އިސްރާއީލުގެ ވައިގެ ސަރަހައްދު ބަންދުކޮށް، ޖެޓްތައް ވަނީ ވައިގެ ތެރެއަށް ފޮނުވާލާފައެވެ. ނަމަވެސް އެ ބޯޓު މިސްރާބު ބަދަލުކޮށް ސައޫދީ އަރަބިއްޔާއަށް ކުއްލި ހާލަތުގައި ޖެއްސުމުން ޖެޓްތައް ވަނީ އަނބުރާ އައިސްފައެވެ.
އެ ބޯޓު ކުރިއަށް ދިޔަނަމަ، ކޮމާންޑް ސެންޓަރުން އިސްރާއީލުގެ ބޮޑުވަޒީރު ބެންޖަމިން ނަތަންޔާހޫއާ ގުޅައި، ބޯޓުގައި ތިބި 182 ފުރާނައިގެ ނިޔާ ކަނޑައެޅުމުގެ ފަހު ނިންމުން ނިންމާނީ އޭނާއެވެ. މިއީ އިސްރާއީލުގެ ރައްޔިތުން ރަހީނުވިޔަނުދީ ހުއްޓުވުމަށްޓަކައި، މީހުން މެރުމާ ހަމައަށްވެސް ފިޔަވަޅު އެޅުމަށް އަންގާ އިސްރާއީލުގެ ”ހެނިބަލް ޑިރެކްޓިވް“ އުސޫލުގެ ބޭނުން ހިފުން ފަދަ ކަމެކެވެ. މި އުސޫލަކީ އޮކްޓޯބަރު 7 ގައިވެސް އިސްރާއީލުން ބޭނުންކޮށްފައިވާ އުސޫލެކެވެ.
ފްލައިދުބާއީ ފްލައިޓް 1073 ގެ ހާދިސާއާ މެދު ނޫސްވެރިންގެ މެދުގައި ގިނަ ސުވާލުތަކެއް ވަނީ އުފެދިފައެވެ. މިއީ ވަކި ހައްދުފަނައަޅާފައިވާ ފަރުދަކު ހިންގި ހައިޖެކް ކުރުމުގެ އަމަލެއްތޯ، ނޫންނަމަ އީރާން ކުށްވެރިކޮށް، އިސްރާއީލާއި ގަލްފުގެ ގައުމުތަކުގެ ގުޅުން ބަދަހިކޮށް، ބައިނަލްއަގުވާމީ ސަޕޯޓު ހޯދުމަށް ނަތަންޔާހޫ ރޭވިގެން ހިންގި ”ފޯލްސް ފްލެގް“ އަމަލެއްތޯ ސުވާލު އުފެދެއެވެ.
މި ހާދިސާ ހިނގުމުގެ އެއްދުވަސް ކުރިން ނަތަންޔާހޫ ވަނީ އިސްރާއީލަށް ކުރިމަތިވެފައިވާ ސެކިއުރިޓީ ނުރައްކާތަކާ ބެހޭ ގޮތުން އިންޒާރުދީ ވީޑިއޯއެއް އާންމުކޮށްފައެވެ. އަދި އޭގެ ކުޑަ ދުވަސްކޮޅެއް ކުރިން، އޮކްޓޯބަރު 7 ގެ ހަމަލާގެ މައުލޫމާތު އޭނާއަށް ކުރިން އެނގިފައިވާ ކަމަށް ބުނެ ފެތުރުނު ވާހަކަތައް އަނބުރާ ގެންދިއުމަށް އެދި އޭނާ ވަނީ ޔޫއޭއީއަށް ސިއްރު ދަތުރެއްކޮށް ޝެއިޚް މުހައްމަދު ބިން ޒައިދުއާ ބައްދަލުކޮށްފައެވެ.
