ވ. ރަކީދޫ ކައުންސިލް އިދާރާގެ ވަގުތީ ސެކްރެޓަރީ ޖެނެރަލްގެ މަގާމުގައި ހުރި މުވައްޒަފަކު ދައުލަތުގެ މާލީ ގަވާއިދުތަކާ ހިލާފަށް ”މިސްކިތު ވޭޖް“ ގެ ނަމުގައި ތިން އަހަރު ދުވަސް ވަންދެން އިތުރު މުސާރަ ނަގާފައިވާ ކަން އޮޑިޓަރ ޖެނެރަލްގެ އޮފީހުން ނެރުނު ރިޕޯޓަކުން ހާމަވެއްޖެއެވެ.
އޮޑިޓަރ ޖެނެރަލްގެ އޮފީހުން އާންމުކުރި ރަކީދޫ ކައުންސިލް އިދާރާގެ 2024 ވަނަ އަހަރުގެ ކޮމްޕްލަޔަންސް އޮޑިޓް ރިޕޯޓުގައިވާ ގޮތުން، 2022 ވަނަ އަހަރުން ފެށިގެން 2025 ވަނަ އަހަރުގެ ނިޔަލަށް އެ މުވައްޒަފުގެ އެކައުންޓަށް މިސްކިތު ވޭޖުގެ ގޮތުގައި ޖުމްލަ 337,600 ރުފިޔާ ވަނީ ޖަމާކޮށްފައެވެ.
މި ފައިސާ ކޮންމެ މަހަކުވެސް އެކައުންޓަށް ޖަމާކޮށްފައިވަނީ ކައުންސިލް އިދާރާއިން ބޭންކަށް ފޮނުވި ސިޓީއާއެކު ހިމަނާފައިވާ ޝީޓުގައި ވަގުތީ ސެކްރެޓަރީ ޖެނެރަލްގެ އިތުރުން ކައުންސިލްގެ ރައީސާއި، ނައިބު ރައީސް އަދި އެހެން މުވައްޒަފަކު ސޮއިކޮށް ހުއްދަ ދީގެން ކަމަށް އޮޑިޓް ރިޕޯޓުގައި ބަޔާންކޮށްފައިވެއެވެ.
ސިވިލް ސަރވިސްގެ ގަވާއިދުތަކާ ހިލާފަށް މި ފައިސާ ދޫކޮށްފައިވާއިރު، މުސާރަ ދިނުމުގައި މަސައްކަތް ކުރި ދުވަސްތަކާއި، މުސާރަ ހިސާބުކުރި ގޮތް ނުވަތަ ކުރި މަސައްކަތް އެނގޭނެ އެއްވެސް ލޮގެއް ނެތް ކަމަށްވެސް އޮޑިޓްގައި ފާހަގަކޮށްފައިވެއެވެ. އަދި އެ އިދާރާގައި މިސްކިތުގެ މަސައްކަތް ކުރުމަށް ”ކައުންސިލް އެސިސްޓެންޓް“ ގެ މަގާމުގައި މީހަކު ހަމަޖައްސާފައި ހުރިކަންވެސް ރިޕޯޓުގައި ބުނެފައިވެއެވެ.
މި މައްސަލައާ ގުޅިގެން އޮޑިޓަރ ޖެނެރަލް ލަފާދެއްވާފައިވަނީ އެންޓި-ކޮރަޕްޝަން ކޮމިޝަން (އޭސީސީ) އަށް މައްސަލަ ހުށަހަޅައިގެން ތަހުގީގު ކުރުމަށާއި، ގަވާއިދާ ހިލާފަށް ދޫކޮށްފައިވާ ފައިސާ އަނބުރާ ދައުލަތަށް ހޯދުމުގެ މަސައްކަތް ކުރުމަށެވެ.
