ފްލައިދުބާއީގެ ބޯޓު (FZ1073) ވައްޓާލަން އުޅުނު ޙާދިސާއަކީ ގަސްދުގައި ކުރި ޢަމަލެއްކަން ކަށަވަރުވެއްޖެއެވެ. ވޯލް ސްޓްރީޓް ޖަރނަލް އަދި ފަސްޓްޕޯސްޓުން ރިޕޯޓުކުރާ ގޮތުގައި، މި ބޯޓުގެ ކޯ-ޕައިލެޓް ކަމަށްވާ އުމުރުން 29 އަހަރުގެ އޮމާންގެ ރައްޔިތެއްކަމަށްވާ ހަމާމް އަލް-ހައްމާމީ ވަނީ، އޭނާ ގަސްތުގައި ބޯޓު ވައްޓާލަން އުޅުނުކަމަށާއި މަރުވާން ބިރުނުގަންނަކަމަށް ސަޢޫދީގެ ތަޙުޤީޤީ އިދާރާތަކަށް އެއްބަސްވެފައެވެ.
މީގެ ކުރިން އޮމާން އެއަރގައި މަސައްކަތްކުރިއިރު، ހަރުކަށި ފިކުރު ކަމަށް މާނަކުރާ ވެބްސައިޓްތަކަށް އޭނާ ވަންނަކަމުގެ ތުހުމަތާ ގުޅިގެން، ބޯޓު ދުއްވުމުން އޭނާ ވަނީ ސަސްޕެންޑްކޮށްފައެވެ. އަދި އޭނާ ރަނގަޅުކުރުމަށް ޚާއްޞަ ޕްރޮގްރާމެއްވެސް ހިންގާފައިވެއެވެ. މިފަދަ ރެކޯޑެއް އޮތް މީހަކަށް 2026 ވަނަ އަހަރުގެ ފެބްރުއަރީ މަހު ފްލައިދުބާއީން ވަޒީފާ ދީފައިވުމަކީ، އެވިއޭޝަން ސެކިއުރިޓީގެ ވަރަށް ބޮޑު ފެއިލްވުމެއްގެ ގޮތުގައި ވަނީ ފާހަގަކުރެވިފައެވެ.
ބޯޓު 15،000 ފޫޓު ތިރިއަށް ދިޔައީ ގާތްގަނޑަކަށް 30 ސިކުންތުގެ ތެރޭގައެވެ. ރިޕޯޓުތައް ބުނާގޮތުގައި ހައްމާމީ ވަނީ ކޮކްޕިޓްގައި އޮންނަ ކޯރާޑީއަކުން ކެޕްޓަން ސްމިތު މައްޗަރަށް ޙަމަލާދީފައެވެ. ނަމަވެސް ކެޕްޓަން ވަނީ ކޮކްޕިޓްގެ ދޮރު ހުޅުވާލާފައެވެ. އެއާއެކު ފަސިންޖަރުންނާއި އޮފް-ޑިއުޓީގައި ތިބި އެހެން ޕައިލެޓުން ވަދެ އޭނާ ވަނީ ހުއްޓުވާފައެވެ.
މި ޙާދިސާއަކީ ”9/11 ފަދަ ކާރިސާއެއް“ ކަމަށް އިޒްރޭލުގެ ބޮޑުވަޒީރު ނަތަންޔާހޫ ވަނީ ސިފަކޮށްފައެވެ. އަދި މިކަމުގެ ފަހަތުގައި އެހެން ބަޔަކު ވާނަމަ، އެބަޔަކަށް ހަރުކަށި އަދަބު ދޭނެކަމަށް އޭނާ ބުންޏެވެ.
