ޔޫކްރެއިންގެ އިލެކްޓްރޯނިކް ވޯފެއަރ (އީޑަބްލިއު) ނިޒާމުތައް ފޫއަޅުވާލުމަށްޓަކައި، ރަޝިޔާ ސިފައިން ޔޫކްރެއިންގެ ސިޓީތަކުގެ ތެރޭގައި ކުދި ސިގްނަލް ރިޕީޓަރތަކެއް ސިއްރުން ބަހައްޓަމުންދާކަމަށް ހަތިޔާރުގެ ތަޖުރިބާކާރުން ބުނެފިއެވެ.
މި ސިގްނަލް ރިޕީޓަރތަކަކީ އާންމުކޮށް ބޭނުންކުރާ ބޮޑު ”ލަންޗްބޮކްސް“ އެއްގެ ސައިޒުގެ އެއްޗެއް ކަމަށްވުމުން، ސިޓީތަކުގެ ތެރޭގައި މިއީ ފޮރުވަން ވަރަށް ފަސޭހަ އާލާތްތަކެކެވެ. މިއީ އަބަދު ސިގްނަލް ފޮނުވާ އެއްޗަކަށް ނުވުމުން، ޔޫކްރެއިންގެ ސިފައިންނަށް މިއީ ކޮންތާކު ހުރި އެއްޗެއްކަން ހޯދަން ވަރަށް އުނދަގޫވާނެއެވެ.
މިދިޔަ ސެޕްޓެންބަރު މަހުގެ 4 ވަނަ ދުވަހު ކިޔޭވްގައި ހުންނަ ޔޫކްރެއިންގެ ސެކިއުރިޓީ ސަރވިސް (އެސްބީޔޫ) ގެ މައި އިމާރާތަށް ދިން ޑްރޯން ޙަމަލާއަކީ މި އާލާތްތައް ބޭނުންކޮށްގެން ދީފައިވާ ޙަމަލާއެއްކަމަށް ތަޖުރިބާކާރުން ލަފާކުރެއެވެ. ސަބަބަކީ އެ ޙަމަލާ ދިން ވަގުތު މަތިން އުދުހޭ އެއްވެސް ޑްރޯން ރިލޭއެއް ފެންނަން ނެތުމެވެ.
ޔޫކްރެއިންގެ ރައީސް ޒެލެންސްކީ ބުނެފައިވާ ގޮތުގައި، އާދައިގެ ޑްރޯންތަކުގެ 70 އިންސައްތަ ވައްޓާލެވުނު ނަމަވެސް، ރަޝިޔާއިން އަލަށް އުފައްދާ ޖެޓް-ޕަވަރޑް ޑްރޯންތައް ވައްޓާލެވެނީ ގާތްގަނޑަކަށް 57 އިންސައްތައެވެ. ރަޝިޔާއިން އަންނަ އަހަރު ޑްރޯން އުފެއްދުމަށް 12 ބިލިއަން ޑޮލަރު ޚަރަދުކުރާނެކަމަށް ބެލެވެއެވެ.
