އެމްޑީޕީގެ ކޮންގްރެސްގެ ނިންމުންތަކަށް ވޯޓަށް އެހުމުގެ މުހިންމު މަރުޙަލާ ކުރިއަށްދިޔަ ވަގުތު، ވާހަކަދެއްކުމުގެ ފުރުސަތު ވަކި ބަޔަކަށް އެކަނި ދޭ ކަމަށް ބުނެ ބައިވެރިންގެ މެދުގައި ބޮޑު ހިތްހަމަނުޖެހުމެއް އުފެދި މާލަމުގެ މަސްރަޙު ހޫނުވެއްޖެއެވެ.
ކޮންގްރެސްގެ ފަހު ދުވަހު ނަގަންޖެހޭ މުހިންމު ވޯޓުތަކާ ގުޅޭގޮތުން ޚިޔާލުފާޅުކުރުމަށް ހުރިހާ ބައިވެރިންނަށް ހަމަހަމަ ފުރުސަތު ނުލިބޭ ކަމުގެ ޝަކުވާ ބޮޑުވެފައިވާއިރު، ކުރީގެ މަޖިލިސް މެންބަރު މުޙައްމަދު ނާޒިމް ވިދާޅުވީ ވަކި ބަޔަކަށް އެކަނި އިސްކަންދީގެން ކުރިއަށްދާނަމަ އެފަދަ ބައްދަލުވުމަކަށް ހާޒިރުވުމުގެ އެއްވެސް ބޭނުމެއް ނެތް ކަމަށެވެ.
ރިޔާސަތުގައި އިންނެވި މުޙައްމަދު ނަޝީދު ވަކި ބަޔަކަށް ފުރުސަތު ދޭ ކަމަށް ކުރެވުނު ތުހުމަތުތައް ދޮގުކުރެއްވި ނަމަވެސް، އެކަމާ ދެކޮޅަށް މާލަމުގައި ތިބި ގިނަ ބައިވެރިން ވަނީ އަޑުއުފުލައި، ރިޔާސަތުން ހަދަނީ ދޮގު ކަމަށް ބުނެ ހަޅޭއްލަވައިފައެވެ.
މި ފަހަރުގެ ކޮންގްރެސްގެ މުޅި އިންތިޒާމުތަކާއި ހިންގުމުގެ ވައްޓަފާޅިއަށް ގިނަ ބައެއްގެ ފާޑުކިޔުން އަމާޒުވެފައިވާއިރު، އިފްތިތާޙީ ޖަލްސާގައި ހިނގާދިޔަ ކަންތައްތަކަކީވެސް ސިޔާސީ އިމުގެ ބޭރުން ހިނގި ހުތުރު ކަންތައްތަކެއްގެ ގޮތުގައި ގިނަ ބަޔަކު ސިފަކުރެއެވެ.
ޚާއްޞަކޮށް، ބޭރު ގައުމުތަކުގެ ސަފީރުންނާއި ސިޔާސީ އިސް ބޭފުޅުން ބައިވެރިވެވަޑައިގެންނެވި ފެށުމުގެ ރަސްމިއްޔާތުގައި ރިޔާސަތުން ވާހަކަދައްކަވަމުން ދިޔައިރު މާލަމުތެރޭގައި އުފެދުނު އަޑުގަދަކުރުންތަކަށް ތަރުހީބުދެވުނު ގޮތުން، ވަޑައިގެން ތިއްބެވި މެހެމާނުންނަށް ބޮޑެތި އުނދަގޫތަކާ ކުރިމަތިލާންޖެހުނެވެ.
މި ހަމަނުޖެހުންތަކާ ހުރެ ޖަލްސާއަށްފަހު އިންތިޒާމުކުރެވިފައި އޮތް ފަރިއްކޮޅަށްވެސް މަޑުނުކުރައްވައި ސަފީރުން ވަނީ އެވަގުތުން ވަގުތަށް މާލަން ދޫކުރައްވައި ވަޑައިގެންފައެވެ.
އާންމުންނާއި ސިޔާސީ މަޝްރަޙު ދިރާސާކުރާ ފަރާތްތަކުން ފާހަގަކުރާ ގޮތުގައި، ކޮންގްރެސްއެއްފަދަ މަދަނީ އަދި ސިޔާސީ ސީރިއަސް ބައްދަލުވުމަކާއި އާންމު މުޒާހަރާއެއްގެ ތަފާތު ނޭނގި، އަޑުގަދަކުރުމާއި ހަޅޭއްލެވުން އިސްކުރުމަކީ ޕާޓީގެ އަބުރަށް ލިބުނު ބޮޑު ހުތުރެކެވެ.
