މި އަހަރަކީ ދިވެހިރާއްޖޭގެ ތާރީހުގައި ވެސް އެންމެ ގިނަ އަދަދަކަށް ޒަކާތް ދެއްކި އަހަރު ކަމަށް އިސްލާމިކް މިނިސްޓަރު ޑރ. މުޙައްމަދު ޝަހީމް ޢަލީ ސަޢީދު ވިދާޅުވެއްޖެއެވެ.
މީސްމީޑިއާ މެދުވެރިކުރައްވައި ހިއްސާކުރެއްވި މެސެޖެއްގައި މިނިސްޓަރު ވިދާޅުވީ، ރާއްޖޭގެ ޒަކާތުގެ ނިޒާމަކީ ގާނޫނީ ރައްކާތެރިކަން ލިބިފައިވާ، ވަރަށް ހަރުދަނާ އުސޫލުތަކެއްގެ މައްޗަށް އެކުލެވިގެންވާ ނިޒާމެއް ކަމަށެވެ. އެގޮތުން، ޒަކާތުގެ ފައިސާ ބަލަހައްޓަމުން ގެންދަނީ މަރުކަޒީ ބޭންކް (އެމްއެމްއޭ) މެދުވެރިކޮށްކަން ފާހަގަކުރައްވައި މިނިސްޓަރު ވިދާޅުވީ، އެ ފައިސާ ހަރަދުކުރެވެނީ އިސްލާމީ ޝަރީއަތުގެ ހަމަތަކާ އެއްގޮތަށް، އާންމުކޮށްފައިވާ ޝަރީއާ އުސޫލުތަކާ އެއްގޮތްވާ ގޮތުގެ މަތިން ކަމަށެވެ.
ދިވެހިރާއްޖޭގެ ޒަކާތުގެ ނިޒާމަކީ ހަރުދަނާ އުޞޫލުތަކެއްގެ މައްޗަށް އާރާސްތުކުރެވިފައިވާ ނިޒާމެއް. ޤާނޫނަކުން ރައްކާތެރިކަން ލިބިފައިވާ ނިޒާމެއް. ޒާކާތު ފައިސާ ބަލަހައްޓަމުންދަނީ މަރުކަޒީ ބޭންކުން. ޒަކާތުން ލިބޭ ފައިސާ ހޭދަކުރަމުން ދަނީ އިސްލާމީ ޝަރީޢަތުގައިވާ ގޮތުގެ މަތިން ޝަރީޢާ… https://t.co/jKhkjBbjqs
— Mohamed Shaheem Ali Saeed (@Mohamedshaheem1) October 3, 2026
އަދި ޒަކާތުގެ ހަރަދުތަކުގެ ތަފުސީލު ކޮންމެ މަހަކު ވެސް ހާމަކުރަމުންދާ ކަމަށާއި، މި ކަންކަން ކުރިއަށް ގެންދަނީ ޒަކާތު ކައުންސިލާއި ޝަރީއާ ކޮމިޓީގެ ފަންނީ ލަފަޔާއި އިރުޝާދުގެ ދަށުން ކަމަށްވެސް މިނިސްޓަރު ވިދާޅުވިއެވެ. މީގެ އިތުރުން، ވޭތުވެދިޔަ ދެ އަހަރަކީ ރާއްޖޭގެ ޒަކާތުގެ ނިޒާމަށް ފާހަގަކޮށްލެވޭ ފަދަ ހެޔޮ ބަދަލުތަކެއް ގެނެވުނު ދެ އަހަރުކަން ފާހަގަކުރައްވަމުން ވަޒީރު ވިދާޅުވީ، ރާއްޖޭގެ ތާރީހުގައި އެންމެ ގިނައިން ޒަކާތުގެ ގޮތުގައި ފައިސާ ލިބިފައިވަނީ ވެސް މި މުއްދަތުގެ ތެރޭގައި ކަމަށެވެ.
އަދި ހަމައެހެންމެ، މިއަހަރަކީ ރާއްޖޭގެ ތާރީހުގައި ވެސް އެންމެ ބޮޑު އަދަދަކަށް ޒަކާތް ދެއްކި އަހަރުކަން ފާހަގަކުރައްވައި މިިނިސްޓަރު ވިދާޅުވީ، ފަގީރުންގެ ދަފުތަރުގައި ރަޖިސްޓްރީވެފައިވާ ފަރާތްތަކަށް އެންމެ ގިނައިން އެހީތެރިކަން ފޯރުކޮށްދެވިފައިވަނީ ވެސް ވޭތުވެދިޔަ ދެ އަހަރުގެ ތެރޭގައި ކަމަށެވެ.
ފަގީރުންނަށް ސީދާ މާލީ އެހީތެރިކަން ދިނުމުގެ އިތުރުން، އެ ފަރާތްތަކުގެ ތައުލީމާއި ސިއްހީ ކަންކަމަށް ވެސް ފައިސާ ހޭދަކުރެވިފައިވާ ކަމަށް މިނިސްޓަރު ވިދާޅުވިއެވެ. އަދި ވޭތުވެދިޔަ ދެ އަހަރުގެ ތެރޭގައި ޝަރީއާ ހުއްދަކުރާ އުސޫލުތަކުގެ ތެރެއިން ޒަކާތު ފަންޑު އިތުރުކުރުމަށް ގިނަގުނަ މަސައްކަތްތަކެއް ފެށި، ޒަކާތުގެ ކަންކަމަށް ހާއްސަކޮށް ޒަކާތު ހައުސް ގާއިމުކުރެވިގެން ދިޔަކަން ވެސް މިނިސްޓަރު ފާހަގަކުރެއްވިއެވެ. މީގެ އިތުރުން، ރާއްޖޭގެ ޒަކާތުގެ ނިޒާމަށް ރައްޔިތުން ކުރަމުން އަންނަ ފުރިހަމަ އިތުބާރަށްޓަކައި ވަޒީރު ވަނީ ރައްޔިތުންނަށް ޝުކުރު އަދާކުރައްވައިފައެވެ. އަދި ގަނޫނީ އޮނިގަނޑެއްގެ ތެރެއިން ޒަކާތުގެ ނިޒާމު ހަރުދަނާކޮށް ތަރައްގީކޮށްދެއްވުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ކުރައްވަމުން ގެންދަވާ މަސައްކަތްޕުޅުތަކަށް ވެސް މިނިސްޓަރު ޝުކުރު ދަންނަވައިފައެވެ.
ޒަކާތު ހައުސްގެ ތަފާސްހިސާބުތައް ދައްކާ ގޮތުގައި، މިއަހަރުގެ ޖެނުއަރީ މަހުން ފެށިގެން މިދިޔަ މަހުގެ ނިޔަލަށް މުދަލު ޒަކާތުގެ ގޮތުގައި 109 މިލިއަނަށްވުރެ ގިނަ ރުފިޔާ ވަނީ ލިބިފައެވެ. މިއީ ވޭތުވެދިޔަ އަހަރުގެ މި މުއްދަތުގައި ލިބުނު އަދަދާ އަޅާބަލާއިރު 2.64 އިންސައްތައިގެ ކުރިއެރުމެކެވެ.
ތަޅާ ބުރުވާލާ