ފަތުރުވެރިކަމުގެ ސިނާއަތަކީ ގައުމުގެ އެންމެ ބޮޑު ކާމިޔާބީގެ ތެރޭގައި ހިމެނޭ އެއް ސިނާއަތް ކަމަށާއި، މި ސިނާއަތުން އެތައް ޖީލަކަށް ފުރުސަތުތައް ފަހިކޮށްދީފައިވާ ކަމަށް އިކޮނޮމިކް މިނިސްޓަރު މުޙައްމަދު ސަޢީދު މިއަދު ވިދާޅުވެއްޖެއެވެ.
މިނިސްޓަރު ސަޢީދު މި މޭރުމުން ވިދާޅުވީ، ފަތުރުވެރިކަމުގެ ދުވަހާއި ގުޅިގެން މީސްމީޑިއާ މެދުވެރިކޮށް ހިއްސާކުރެއްވި ޕޯސްޓެއްގައެވެ. މިނިސްޓަރު ފާހަގަކުރެއްވި ގޮތުގައި، މި ސިނާއަތަކީ އެންމެ ކުޑަކޮށް ފެށިގެން ދުނިޔޭގެ މަގުބޫލު މަންޒިލަކަށް ރާއްޖެ ހަދައިދީފައިވާ ސިނާއަތް ކަމަށެވެ. މިއަހަރު ފަތުރުވެރިކަމުގެ 54 ވަނަ އަހަރީ ދުވަސް ފާހަގަކުރެވޭއިރު، ރާއްޖެއަކީ ދުނިޔެ ގަބޫލުކުރާ މަންޒިލެއްގެ ގޮތުގައި ފާހަގަކުރެވިފައިވާ ކަމަށްވެސް މިނިސްޓަރު ވިދާޅުވިއެވެ.
On National Tourism Day, we celebrate 54 years of one of the Maldives’ greatest national achievements, building a world-renowned tourism industry from humble beginnings and transforming our island nation into a globally recognised destination.
Warmest wishes to President Dr.… pic.twitter.com/4bqnXLSq5E
— Mohamed Saeed (@em_saeed) October 3, 2026
މި ކާމިޔާބީއާ ގުޅިގެން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒަށް ހޫނު މަރުހަބާއެއް ވިދާޅުވެ، ފަތުރުވެރިކަމުގެ ސިނާއަތުގެ ބިންގާ އެޅުއްވި ދިވެހި ދަރިންނަށާއި، މި ސިނާއަތުގައި މަސައްކަތްކުރާ މުވައްޒަފުންނަށާއި، އިންވެސްޓަރުންނަށާއި، ރިސޯޓް އޮޕަރޭޓަރުންނަށާއި، ވިޔަފާރިވެރިންނަށާއި، އަދި މި ސިނާއަތުގެ ކާމިޔާބީއަށް މުހިއްމު އިހުލާސްތެރި ހިދުމަތްތަކެއް ކުރާ ހުރިހާ ފަރާތްތަކަށް ވެސް މިނިސްޓަރު ސަޢީދު ވަނީ ޝުކުރު އަދާކުރައްވައިފައެވެ.
ފަތުރުވެރިކަމުގެ ސިނާއަތުން ދިވެހިރާއްޖޭގެ އިގްތިސާދަށް ބޮޑެތި ބަދަލުތަކެއް އައިސްފައިވާކަން ފާހަގަކުރައްވައި މިނިސްޓަރު ވިދާޅުވީ، މި ސިނާއަތުގެ ސަބަބުން އެތައް ޖީލަކަށް ވަޒީފާގެ ފުރުސަތުތައް ހުޅުވިފައިވާ ކަމަށެވެ. އަދި ދިވެހިރާއްޖޭގެ ހުރިހާ ރަށްތަކެއް ދުނިޔެއާ ގުޅުވައިލައި، ދުނިޔޭގެ ޗާޓުގައި ރާއްޖެއަށް ފަހުރުވެރި ޖާގައެއް ހޯދައިދީފައިވާކަން މިނިސްޓަރު ފާހަގަކުރެއްވިއެވެ.
މިއަދު މި ފާހަގަކުރެވެނީ މި ތާރީހި ދަތުރުގެ ބައިވެރިއަކަށްވި ކޮންމެ ފަރުދެއްގެ ހިދުމަތް ކަމަށާއި، މި ސިނާއަތުގެ ކުރިމަގަށް ފުރިހަމަ އިތުބާރާއި ޔަގީންކަން އޮތް ކަމަށްވެސް މިނިސްޓަރު ސަޢީދު ވަނީ އިތުރަށް ވިދާޅުވެފައެވެ.
