ޔަމަނުގެ ހޫޘީން ސަޢޫދީ ޢަރަބިއްޔާގެ ދެކުނުގައި އޮންނަ އަސީރު ސަރަޙައްދަށް އަމާޒުކޮށް ހޮނިހިރު ދުވަހު ފޮނުވާލި ބެލިސްޓިކް މިސައިލެއް ސަޢޫދީ ސިފައިން ވައްޓާލުމާ ގުޅިގެން، އޭގެ ބައިތައް ވެއްޓި މީހަކަށް އަނިޔާވެއްޖެއެވެ.
ސަޢޫދީގެ ސިވިލް ޑިފެންސުން މަޢުލޫމާތު ދޭގޮތުގައި، މި ޙާދިސާގައި އަނިޔާވެފައިވަނީ ސަޢޫދީގައި ދިރިއުޅޭ އޭޝިއާ ދަރިކޮޅުގެ މީހަކަށެވެ. އަދި މިސައިލްގެ ބައިތައް ވެއްޓުމުގެ ސަބަބުން ޢިމާރާތެއްގެ އެތެރޭގައި ހަދާފައިވާ ނަމާދުކުރާ ކޮޓަރިއަކަށާއި އެ ސަރަޙައްދުގައި ޕާކުކޮށްފައި އޮތް ބައެއް ކާރުތަކަށް ވަނީ ގެއްލުންވެފައެވެ.
ސަޢޫދީ އިސްކޮށް އޮވެ ހިންގާ ކޯލިޝަނުން ވަނީ ޚަމީސް މުޝައިޠު ސަރަޙައްދަށް އަމާޒުކޮށް ހޫޘީން ފޮނުވާލި 3 ބެލިސްޓިކް މިސައިލެއް ވައިގެ ތެރޭގައި ގޮއްވާލައި، ވައްޓާލާފައެވެ. މިސައިލް ގޮއްވާލުމާއެކު އޭގެ ދަގަނޑު ބައިތައް ވެއްޓިފައިވަނީ އަޙަދު ރަފީދާ ސަރަޙައްދަށެވެ. މީގެ ސަބަބުން ނަމާދުކުރާ ކޮޓަރީގެ ފުރާޅު ފޫދުއްވާލައި، އެތެރޭގައި އަޅާފައިވާ މުސައްލަތަކުގެ މައްޗަށް ދަގަނޑުތައް ވެއްޓިފައިވާ މަންޒަރު ފެންނަ ފޮޓޯތަކެއް ވަނީ އާންމުކޮށްފައެވެ.
ވެއްޓުނު ދަގަނޑުތަކުން ޖެހި އަނިޔާވި މީހާއަށް ސިވިލް ޑިފެންސްގެ ޓީމުތަކުން ވަނީ ވަގުތުން ޞިއްޙީ ފަރުވާ ފޯރުކޮށްދީފައެވެ. މި ޙާދިސާއަށްފަހު، އެ ސަރަޙައްދުގެ ރައްކާތެރިކަން ކަށަވަރުކުރުމަށްޓަކައި ކަމާބެހޭ ފަރާތްތަކުން ދަނީ ޚާއްޞަ މަސައްކަތްތަކެއް ކުރަމުންނެވެ.
