ނުކުޅެދުންތެރިކަން ހުންނަ ފަރާތްތަކަށް ކުރިމަތިވެފައިވާ ގޮންޖެހުންތަކާއި ދަތިތައް ބައްލަވައި، އެ ފަރާތްތަކަށް ހުރި ފުރުސަތުތައް ފަހިކޮށްދެއްވުމަށް މަސައްކަތްކުރައްވާނެ ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.
”ރައްޔިތުންގެ އަޑު“ ޕްރޮގްރާމްގެ މިރޭގެ އެޕިސޯޑުގައި، ޑައުންސިންޑްރޯމް ހުންނަ ކުއްޖެއްގެ މަންމައެއް ކަމަށްވާ ފާޠިމަތު ފައިރޫޒާ އާދަމް ވަނީ، ނުކުޅެދުންތެރިކަން ހުންނަ ކުދިންނަށް ތައުލީމު ހާސިލުކުރުމުގައްޔާއި ކުޅިވަރުގެ މައިދާނުގައި ދިމާވާ ގޮންޖެހުންތަކާ ގުޅޭގޮތުން ހުރި ކަންބޮޑުވުންތައް ރައީސް މުޢިއްޒުއާ ހިއްސާކޮށްފައެވެ.
ފައިރޫޒާގެ ވާހަކައިގައި ފާހަގަކުރި ގޮތުގައި، އިންކްލޫސިވް އެޑިއުކޭޝަން ފޯރުކޮށްދޭ ކަމަށް އިޝްތިހާރުކުރާ އަމިއްލަ ފަސް ސްކޫލަކަށް އޭނާގެ ދަރިފުޅު ސާރާ ވެއްދުމަށް މަސައްކަތްކުރި ނަމަވެސް، ކުއްޖާގެ ބޭރުފުށުން ޑައުންސިންޑްރޯމް ހުންނަކަން ފާހަގަކުރެވެން ހުރުމުގެ ސަބަބުން އެއްވެސް ސްކޫލަކުން ޖާގަ ދީފައެއް ނުވެއެވެ. އަދި އޭގެ ފަހުން، ދަރިފުޅުގެ އުމުރުން ހަތް އަހަރުގައި ގްރޭޑް އެކަކަށް އިމާދުއްދީން ސްކޫލަށް ވެއްދުމަށްފަހު، އެ ސްކޫލަށްވުރެ ޖަމާލުއްދީން ސްކޫލް ރަނގަޅު ކަމަށް ފެންނާތީ ސްކޫލް ބަދަލުކުރި ކަމަށް އޭނާ ބުންޏެވެ.
ތަޢުލީމީ ފެންވަރުގެ ގޮތުން ޖަމާލުއްދީން ސްކޫލަކީ ރަނގަޅު ސްކޫލެއް ނަމަވެސް، އެސެސްމަންޓްތަކާއި މާކްސް ދިނުމުގައި ނުކުޅެދުންތެރިކަން ހުންނަ ކުދިންނާއި އާދައިގެ އެހެން ކުދިންނާ ދެމެދު އެއް އުސޫލަކުން އަމަލުކުރުމުގެ ސަބަބުން ބޮޑެތި ދަތިތަކާ ކުރިމަތިވިކަން އޭނާ ފާހަގަކުރިއެވެ. ނަމަވެސް، މި އަހަރު ގްރޭޑް ހަތަރަކުން ފެށިގެން ދަރިފުޅު ތާޖުއްދީން ސްކޫލަށް ބަދަލުކުރި ފަހުން، ދަރިފުޅުގެ ކިބައިން ފާހަގަކޮށްލެވޭ ފަދަ ރަނގަޅު ކުރިއެރުންތަކެއް ފެންނަމުންދާ ކަމަށް ފައިރޫޒާ ވަނީ ބުނެފައެވެ.
މިފަދަ ދަތިތަކަށް އޮތް ހައްލެއް ކަމަށް ފައިރޫޒާ ބުނެފައިވަނީ އެކި ބާވަތުގެ ނުކުޅެދުންތެރިކަން ހުންނަ ފަރާތްތަކަށް ހާއްސަކޮށްގެން ތައުލީމީ ނިޒާމު ބައްޓަންކުރުމެވެ. އަދި އެ ފަރާތްތަކުގެ ހާލަތަށް ރިއާޔަތްކޮށް، އެކަށީގެންވާ ސްކޫލުތައް ހަމަޖައްސައިދިނުމަށް ވެސް އޭނާ ވަނީ ރައީސްގެ އަރިހުން އެދިފައެވެ. މީގެއިތުރުން، ބޯހިޔާވަހިކަން ހޯދުމުގައި ދިމާވާ ގޮންޖެހުންތަކާއި، ކުޅިވަރުގެ ގާނޫނުގެ ތެރެއިން ސްޕެޝަލް އޮލިމްޕިކްސްއަށް ހުރި ހުރަސްތަކުގެ އިތުރުން، އެފަދަ އެތުލީޓުންނަށް އިންޝުއަރެންސް ނުލިބޭ މައްސަލަ ވެސް ފައިރޫޒާ ވަނީ ފާހަގަކޮށްފައެވެ.
ފައިރޫޒާގެ މި ކަންބޮޑުވުންތަކާ ގުޅިގެން ރައީސް މުޢިއްޒު ވިދާޅުވީ، ވީއެންމެ އަވަހަކަށް އަދި އެންމެ ފުރިހަމަ ގޮތެއްގައި އެކަންކަމަށް އެދެވޭ ހައްލެއް ހޯއްދަވައިދެއްވުމަށް ސަރުކާރުން މަސައްކަތްކުރައްވާނެ ކަމުގެ ޔަގީންކަން ދެއްވާ ކަމަށެވެ. މިއީ ވަކި ކުއްޖަކަށް ނުވަތަ ވަކި އާއިލާއަކަށް ހާއްސަ ކަމެއް ނޫންކަން ފާހަގަކުރައްވަމުން ރައީސް ވިދާޅުވީ، މިކަމަކީ މުޅި މުޖުތަމައާއި، މިކަމުގައި ޝާމިލުވާ ފަރާތްތަކުގެ ވެސް ލާބައާ ގުޅިފައިވާ ކަމެއް ކަމަށެވެ. އަދި އެންމެ ބޭނުންފުޅުވަނީ ރާއްޖޭގެ ހުރިހާ ރައްޔިތުންނަށް ވެސް ހަމަހަމަކަމާއެކު، ވީއެންމެ ރަނގަޅު ގޮތުގައި ފުރުސަތުތައް ފަހިވެގެންދިޔުން ކަމަށްވެސް އެމަނިކުފާނު ވިދާޅުވިއެވެ.
