2040 ވަނަ އަހަރު އަންނައިރު ރާއްޖެއަކީ ތަރައްގީވެފައިވާ ގައުމަކަށް ހެދުމަށްޓަކައި ސަރުކާރުން އަޅާ އެންމެ ވަރުގަދަ އެއް ބިންގަލަކީ ތިލަފުށީގައި ގާއިމުކުރާ ވިޔަފާރި ބަނދަރުގެ މަޝްރޫއު ކަމަށް އިގުތިސާދީ ތަރައްގީއާއި، ދަތުރުފަތުރާއި، ވިޔަފާރިއާ ބެހޭ ވަޒީރު މުހައްމަދު ސައީދު ވިދާޅުވެއްޖެއެވެ.
ރައީސުލްޖުމްހޫރިއްޔާ ޑރ. މުހައްމަދު މުއިއްޒާއެކު ތިލަފުށީގެ މަސައްކަތްތައް ބައްލަވާލެއްވުމަށްފަހު ނޫސްވެރިންނާ ވާހަކަދައްކަވަމުން ވަޒީރު ސައީދު ފާހަގަކުރެއްވީ، މިއީ ރައީސް ވަރަށް ބޮޑަށް އިސްކަންދެއްވާ މަޝްރޫއެއް ކަމަށާއި، ވިޔަފާރި ބަނދަރު ބަދަލުނުކުރެވި އެތައް އަހަރެއް ފާއިތުވުމަކީ އިގުތިސާދީ ކުރިއެރުމަށް އެޅުނު ބޮޑު ހުރަހެއް ކަމަށެވެ.
އާ ބަނދަރާއެކު މުދާ ބާލައި ކްލިއާ ކުރުމަށް މިހާރު ނަގާ ހަތް ދުވަހުގެ ބަދަލުގައި، މޭވާއާއި ތަރުކާރީ ފަދަ އަވަހަށް ހަލާކުވާ ކާބޯތަކެތި އެއް ދުވަސް ތެރޭގައި ބޯޓުން ބާލައިގެން ލިބޭނެ އިންތިޒާމު ހަމަޖެހިގެންދާނެ ކަމަށް ވަޒީރު ވިދާޅުވިއެވެ.
ސަރުކާރުގެ އަމާޒަކީ އަންނަ އަހަރުގެ ނޮވެމްބަރުގެ ކުރިން މަޝްރޫއުގެ ފުރަތަމަ ފިޔަވަހި ނިންމާލައި، 2028 ވަނަ އަހަރުގެ ނޮވެމްބަރުގެ ކުރިން މުޅި ބަނދަރުގެ އޮޕަރޭޝަން އެއްކޮށް ނިންމާލުން ކަމަށް ސައީދު ހާމަކުރެއްވިއެވެ.
މި މަޝްރޫއު ފުރިހަމަވުމުން އިންޓަނޭޝަނަލް ކީވޯލްއާއި، ބަނދަރާއި، ސްޓޯރޭޖް ވެއަރހައުސްތަކުގެ އިތުރުން މާލޭ ބާޒާރުމަތީގައި ހުރި ގޯޑައުންތަކާއި އަތޮޅު ފިހާރަތަކުގެ އޮޕަރޭޝަންތައް ތިލަފުއްޓަށް ބަދަލުވެގެންދާނެއެވެ.
އޭގެ އިތުރުން ހުޅުމާލެއިން އިންބައުންޑް ކާގޯގެ ހިދުމަތް ދެވޭނެ ގޮތް ހަދައި، ވެލާނާ އިންޓަނޭޝަނަލް އެއާޕޯޓަށް ސީ-ޓޫ-އެއާ ކާގޯގެ ހިދުމަތް ފުޅާދާއިރާއެއްގައި ދެވޭނެ އިންތިޒާމުތައް ހަމަޖެހިގެންދާނެކަން ވަޒީރު ފާހަގަކުރެއްވިއެވެ.
ރާއްޖޭގެ އަމިއްލަ ސެކްޓަރުގައި ކޮންސްޓްރަކްޝަން ދާއިރާއިން 11 ބިލިއަން ޑޮލަރުގެ އިންވެސްޓްމަންޓް ހިނގަމުންދާއިރު، އޭގެ ބޮޑު ބަޔަކީ ފަތުރުވެރިކަމުގެ ދާއިރާ ކަމަށްވުމާއެކު، މި އާ ބަނދަރުގެ ސަބަބުން އެންމެ ބޮޑު ހިތްހަމަޖެހުމެއް ލިބޭނީ ވިޔަފާރިވެރިންނަށާއި އިންވެސްޓަރުންނަށް ކަމަށް ސައީދު ވިދާޅުވިއެވެ.
