ޔޫއޭއީގެ އީގަލް ހިލްސް ކުންފުނިން ރަސްމާލޭގައި ހިންގުމަށް ނިންމާފައިވާ މޯލްޑިވްސް ވޯޓަރފްރޮންޓް އެންޑް މެރީނާ މަޝްރޫއިން އަހަރެއްގެ މައްޗަށް 1.1 ބިލިއަން ޑޮލަރު ލިބޭނެ ކަމަށް ފިނޭންސް މިނިސްޓަރު ޙަސަން ޒަރީރު ވިދާޅުވެއްޖެއެވެ.
މީސްމީޑިއާގައި ހިއްސާކުރެއްވި ޕޯސްޓެއްގައި މިނިސްޓަރު ވިދާޅުވީ، މި މަޝްރޫއުގެ ދަށުން 10 އަހަރުދުވަހުގެ ތެރޭގައި 11 ބިލިއަން ޑޮލަރުގެ އާމްދަނީއެއް ދައުލަތަށް ލިބޭނެ ކަމަށް ލަފާކުރެވޭ ކަމަށެވެ. އަދި މި އަދަދަކީ ރާއްޖޭގައި ހިންގަމުން އަންނަ 179 ރިސޯޓާއި 16 ހޮޓަލާއި 920 ގެސްޓްހައުސްގެ އިތުރުން 165 ސަފާރީ އުޅަނދުން ލިބޭ ޖުމްލަ އާމްދަނީއަށްވުރެ ބޮޑު އަދަދެއް ކަމަށް މިނިސްޓަރު ވަނީ ވިދާޅުވެފައެވެ.
The Maldives Waterfront and Marina project at Ras Malé is projected to generate over US$11 billion in State revenue during its 10-year development period, an average of approximately US$1.1 billion annually.
This projected annual contribution would exceed the annual government… pic.twitter.com/e58wGbTguJ
— Hassan Zareer (@Finance_Min_MV) September 30, 2026
ރަސްމާލެ އެއްބަސްވުމުގެ ދަށުން ދައުލަތަށް އާމްދަނީ ލިބޭނެ ގޮތްތަކުގެ ތެރޭގައި، އާންމު ރޭޓުތަކުން ނަގާ ޓީޖީއެސްޓީ އާއި، މާސްޓަރ ޑިވެލޮޕަރަށް ފުރަތަމަ ވިއްކާ ވިއްކުންތަކާއި ކުއްޔަށް ދޫކުރާ ކުރުންތަކުން ލިބޭ އާމްދަނީގެ 10 އިންސައްތަ ހިމެނޭކަން ފާހަގަކުރައްވަމުން މިނިސްޓަރު ވިދާޅުވީ، އަލަށް މުދާ ގަންނަ ފަރާތްތަކާއި، އޭގެ ފަހުން މިލްކުވެރިކަން ބަދަލުވާ ހާލަތްތަކުގައި، އެ މުދަލެއްގެ އަގުގެ 4 އިންސައްތަ ދައުލަތަށް ދައްކަންޖެހޭނެ ކަމަށެވެ. އަދި މި އެއްބަސްވުމުގެ ދަށުން ޓެކްސްގެ އެއްވެސް ލުޔެއް ނުވަތަ ޑިއުޓީ އިސްތިސްނާއެއް ދީފައި ނުވާނެ ކަމަށްވެސް މިނިސްޓަރު ވަނީ ވިދާޅުވެފައެވެ.
މި މަޝްރޫއަކީ އެއްވެސް ލޯނެއް ނެގުމަކާ ނުލައި އަދި ސޮވެރިން ގެރެންޓީއެއްވެސް ދިނުމަކާނުލައި ސަރުކާރުން ކުރިއަށްގެންދިއުމަށް ނިންމާފައިވާ މަޝްރޫއެކެވެ. މިކަމުގެ ސަބަބުން، ދައުލަތަށް މާލީ އެއްވެސް ބުރައެއް އުފުލާކަށް ނުޖެހޭނެއެވެ. ރަސްމާލެ އެއްބަސްވުމުގެ ދަށުން، ޕްރޮޕަޓީ ވިއްކައިގެން ލިބޭ އެންމެހައި ފައިސާއެއް ރާއްޖޭގައި ގާއިމުކޮށްފައިވާ އެސްކްރޯ އެކައުންޓެއްގައި ރައްކާކުރަންޖެހޭނެއެވެ. އަދި އެ ފައިސާ ދޫކުރަންވާނީ އެއްބަސްވުމުގައި ބަޔާންކޮށްފައިވާ ގޮތުގެ މަތިންނެވެ. މީގެ އިތުރުން، މި މަޝްރޫއުގެ ހުރިހާ ފައިސާގެ މުއާމަލާތްތައް ހިންގަންވާނީ ދިވެހިރާއްޖޭގެ ބޭންކުތައް މެދުވެރިކޮށެވެ.
މި މަޝްރޫއުގެ ދަށުން 500 ހެކްޓަރުގެ ބިމެއްގައި 20 ބިލިއަން ޑޮލަރުގެ ވޯޓަރފްރަންޓް އަދި މެރީނާ މަޝްރޫއެއް ގާތްގަނޑަކަށް 10 އަހަރު ދުވަހުގެ ތެރޭގައި ފިޔަވަހިތަކަކަށް ބަހާލައިގެން ތަރައްގީކުރުމަށް ވަނީ ރޭވިފައެވެ. މި މަޝްރޫއުގައި ގެދޮރާއި، ހޮޓާތަކާއި، ރިސޯޓްތަކާއި، މެރީނާގެ އިތުރުން ވިޔަފާރި، ތައުލީމީ އަދި ސިއްހީ ހިދުމަތްތައް ހިމެނެއެވެ. މި މަސައްކަތް އެއްކޮށް ނިމުމުން، އަހަރަކު 1 މިލިއަނަށްވުރެ ގިނަ ފަތުރުވެރިން ޒިޔާރަތްކޮށް، ފަތުރުވެރިކަމުގެ ދާއިރާއިން އަހަރަކު ގާތްގަނޑަކަށް 2 ބިލިއަން ޑޮލަރުގެ އާމްދަނީއެއް ލިބި، ރާއްޖޭގެ އިގްތިސާދަށް ދިގު މުއްދަތުގެ ކުރިއެރުމެއް ލިބިގެންދާނެ ކަމަށް ލަފާކުރެވެއެވެ.
