މާލެ ސަރަހައްދުގައި ސިއްހީ ދާއިރާގެ ބިޔަ މަޝްރޫއުތަކެއް ހިންގުމަށް ސަރުކާރުން ނިންމައި، އެ މަސައްކަތްތައް ބާރުދުވެލީގައި ކުރިއަށް ގެންދިއުމަށް ތައްޔާރުވަމުންދާ ކަމަށް ސިއްހަތާއި، އާއިލާއާއި އިޖުތިމާއީ އެހީއާ ބެހޭ ވަޒީރު ޤީލާ ޢަލީ ވިދާޅުވެއްޖެއެވެ.
އެކަމަނާ މިކަން ހާމަކުރެއްވީ ރައީސުލްޖުމްހޫރިއްޔާގެ އޮފީހުގައި ބޭއްވި ނޫސްވެރިންގެ ބައްދަލުވުމުގައެވެ.
ވަޒީރު ޤީލާ ޢަލީ ހާމަކުރެއްވި ގޮތުގައި، މާލެ، ވިލިމާލެ އަދި ހުޅުމާލެ ހިމެނޭހެން މާލެ ސަރަޙައްދުގައި ތަރައްޤީކުރުމަށް ރޭވިފައިވާ މައިގަނޑު މަޝްރޫޢުތަކަކީ:
• ވިލިމާލޭގައި 100 އެނދުގެ ޓާރޝަރީ ހޮސްޕިޓަލެއް: މި މަޝްރޫޢު ކުރިއަށް ގެންދަނީ ޗައިނާ ސަރުކާރުގެ ހިލޭ އެހީތެރިކަމާއެކުގައެވެ.
• ޑައިގްނޯސްޓިކް ސެންޓަރ ފޯ އޮންކޮލޮޖީ ސަރވިސަސް (ހުޅުމާލެ ފޭސް 2): ކެންސަރު ބަލި ދެނެގަތުމަށް ޚާއްޞަ މި މަރުކަޒުގެ މަސައްކަތުގެ އެއްބަސްވުމުގައި ކުރިއަށް އޮތް ދެ ހަފްތާގެ ތެރޭގައި ސޮއިކުރެވޭނެއެވެ.
• 500 އެނދުގެ މަލްޓި-ސްޕެޝަލިޓީ ހޮސްޕިޓަލް (ހުޅުމާލެ ފޭސް 2): މި ބިޔަ ހޮސްޕިޓަލުގެ ޢަމަލީ މަސައްކަތްތައް ކުރިއަށް ގެންދާނެ އެންމެ އެކަށޭނަ ގޮތްތަކާ ގުޅޭގޮތުން މިހާރު ދަނީ މަޝްވަރާކުރެވެމުންނެވެ.
• 250 އެނދުގެ މަލްޓި-ސްޕެޝަލިޓީ ހޮސްޕިޓަލް (ހުޅުމާލެ ފޭސް 1): މި މަޝްރޫޢު ވެސް ކުރިއަށް ގެންދިއުމަށް ބޭނުންވާ ފަންނީ މަޝްވަރާތައް ދަނީ ހިނގަމުންނެވެ.
• ނޭޝަނަލް ޑިސެބިލިޓީ ސަރވިސް އެންޑް ތެރަޕީ ސެންޓަރ (ހުޅުމާލެ ފޭސް 2): ބޭންކް އޮފް މޯލްޑިވްސް (ބީއެމްއެލް) ގެ ފައިނޭންސްގެ ދަށުން ހިންގާ މި މަޝްރޫޢުގެ މަސައްކަތް މިހާރު ދަނީ ބާރަށް ކުރިއަށެވެ.
• 100 އެނދުގެ ތެލެސީމިއާ އެންޑް ހެމަޓޮލޮޖީ ހޮސްޕިޓަލް (ހުޅުމާލެ ފޭސް 2): ތެލެސީމިއާ އަދި ލޭގެ ބަލިތަކަށް ޚާއްޞަ މި ހޮސްޕިޓަލް ޤާއިމުކުރުމުގެ މަޝްވަރާތައް ވެސް ދަނީ ކުރިއަށެވެ.
ވަޒީރު ޤީލާ ފާހަގަކުރެއްވި ގޮތުގައި، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ތަޞައްވުރާ އެއްގޮތަށް މި މަޝްރޫޢުތައް ނިމި ޚިދުމަތް ދޭން ފެށުމުން، ރާއްޖޭގެ ޞިއްޙީ ނިޒާމަށް އިންޤިލާބީ ބޮޑު ބަދަލެއް އަންނާނެއެވެ. އަދި ބޮޑެތި ބަލިތަކަށް ފަރުވާ ހޯދުމަށް ރާއްޖެއިން ބޭރަށް ދާންޖެހޭ ދިއުން ނިމުމަކަށް އައިސް، އަމިއްލަ ޤައުމުގައި ތިބެގެން ބައިނަލްއަޤްވާމީ ފެންވަރުގެ އެންމެ ޒަމާނީ ޞިއްޙީ ފަރުވާ ރައްޔިތުންނަށް ލިބިގެންދާނެއެވެ.
މީގެ ސަބަބުން، ބޭސްފަރުވާއަށް ރައްޔިތުންނާއި ދައުލަތުން ކުރަންޖެހޭ ބޮޑެތި ޚަރަދުތައް ސަލާމަތްވެ، އެތައް ޢާއިލާއަކަށް މާލީ އަދި ނަފްސާނީ ގޮތުން ބޮޑު ލުޔަކާއި ހިތްހަމަޖެހުމެއް ލިބިގެންދާނެ ކަމަށް ވަޒީރު ވިދާޅުވިއެވެ.
