ދަރިމައިވުމުގެ ދަތިކަން ހުންނަ ފަރާތްތަކަށް ސަރުކާރުން ބޮޑެތި އެހީތެރިކަމެއް ފޯރުކޮށްދެމުންދާ ކަމަށާއި، ރާއްޖޭގައި ހުރެގެންވެސް އެ ހިދުމަތް ހޯދުމުގެ ފުރުސަތު ފަހިވެފައިވާ ކަމަށް ހެލްތް މިނިސްޓަރު ޤީލާ ޢަލީ ވިދާޅުވެއްޖެއެވެ.
ރައީސުލްޖުމްހޫރިއްޔާގެ އޮފީހުގައި މިއަދު ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން މިނިސްޓަރު ޤީލާ ވިދާޅުވީ އިންދިރާ ގާންދީ މެމޯރިއަލް ހޮސްޕިޓަލް (އައިޖީއެމްއެޗް) ގައި ގާއިމުކޮށްފައިވާ ފާރޓިލިޓީ ސެންޓަރުން އައިވީއެފް މެދުވެރިކޮށް ފަރުވާ ހޯދި ފަރާތަކަށް ފުރަތަމަ ފަހަރަށް ކާމިޔާބުކަމާއެކު ދަރިއަކު އުފަންވެއްޖެ ކަމަށެވެ.
މިނިސްޓަރު ޤީލާ ވިދާޅުވީ، ރާއްޖޭގައި ފުރަތަމަ ފަހަރަށް އައިވީއެފް މެދުވެރިކޮށް ކުއްޖަކު އުފަންވެފައިވަނީ 7 ޖަނަވަރީ 2026 ގައި ކަމަށެވެ. މިއީ ދަރިމައިވުމުގެ ސިއްހަތާ ގުޅުންހުރި މައްސަލަތަކަށް ދާއިމީ ހައްލެއް ހޯއްދަވައިދެއްވުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވެވަޑައިގެންނެވި ވައުދުފުޅުގެ ދަށުން، 15 ނޮވެމްބަރު 2024 ގައި ހުޅުވި ފާރޓިލިޓީ ސެންޓަރުގެ ތާރީހީ އަދި ބޮޑު ކާމިޔާބީއެއް ކަމަށް މިނިސްޓަރު ފާހަގަކުރެއްވިއެވެ.
މީގެއިތުރުން، ދަރިމައިވުމުގެ ދަތިތައް ހުންނަ ފަރާތްތަކަށް އެހީތެރިވުމުގެ ގޮތުން 50 ދެމަފިރިއަކަށް އައިވީއެފް ހެދުމުގެ ފުރުސަތު ސަރުކާރުން ހަމަޖައްސައިދީފައިވާ ކަމަށްވެސް މިނިސްޓަރު ވިދާޅުވިއެވެ.
ހަމައެއާއެކު، އައިވީއެފް ޓްރީޓްމަންޓް ހިމެނޭހެން ދަރިމައިވުމާ ގުޅޭ އަގު ބޮޑެތި ފަރުވާތައް އާސަންދަ މެދުވެރިކޮށް ލިބޭނެ އިންތިޒާމުވެސް ސަރުކާރުން ވަނީ ހަމަޖައްސައިދީފައެވެ. އެގޮތުން، އައިޔޫއައި އަދި އައިވީއެފްގެ ފަރުވާތައް އާސަންދަ ސްކީމްގެ ދަށުން ފޯރުކޮށްދިނުމަށްޓަކައި 15 މާރިޗު 2024 އިން ފެށިގެން އެކަމަށް އެދި ހުށަހެޅި ފަރާތްތަކުގެ ތެރެއިން ޝަރުތު ހަމަވާ އެންމެހައި ފަރާތްތަކަށް އެ ހިދުމަތްތައް ލިބޭނެ މަގު ވަނީ ފަހިކޮށްދެވިފައެވެ.
މިނިސްޓަރު ޤީލާ ފާހަގަކުރެއްވި ގޮތުގައި، ދަރިމައިވުމުގެ ފަރުވާތައް ރާއްޖެއިން ލިބޭނެ މަގު ފަހިކޮށްދީ، އެކަމަށް ދައުލަތުން މާލީ އެހީތެރިކަން ދިނުމަކީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ހާއްސަ އިސްކަމެއް ދެއްވައިގެން ކުރިއަށް ގެންދަވާ، ދިވެހި އެތައް އާއިލާއަކަށް އުފާވެރިކަން ގެނެސްދެމުންދާ މުހިންމު ސިޔާސަތެކެވެ.
