ދުބާއީން ފުރައިގެން އިޒްރޭލުގެ ތެލް އަވީވްއަށް ދަތުރުކުރަމުންދިޔަ ފްލައިޓެއްގައި ސަލާމަތީ މައްސަލައެއް ދިމާވެގެން އުޅޭކަމަށް އިޒްރޭލުގެ މީޑިއާތަކުން ރިޕޯޓުކޮށްފިއެވެ.
މިއީ މިވަގުތު ހިނގަމުންދާ ޙާދިސާއަކަށް ވުމާއެކު، މިއީ ބޮމުގެ އިންޒާރެއް ކަމެއް، ފްލައިޓް ހައިޖެކް ކުރަން އުޅުނީ ކަމެއް ނުވަތަ އެހެން ކަހަލަ މައްސަލައެއް ކަމެއް އަދި ކަށަވަރުވެފައެއް ނުވެއެވެ.
އިޒްރޭލުގެ މީޑިއާތަކުން މި ޚަބަރު ފަތުރާފައިވީ ނަމަވެސް، މިއީ ކޮން އެއަރލައިނެއްގެ ފްލައިޓެއްކަން އަދި ހާމަކޮށްފައެއް ނުވެއެވެ. އާންމުގޮތެއްގައި މިފަދަ ޙާދިސާތަކުގައި، ފްލައިޓް ރައްކާތެރިކަމާއެކު ޖެއްސެންދެން އިޒްރޭލުގެ ސަލާމަތީ އިދާރާތަކުން މަޢުލޫމާތު ސިއްރުކުރެއެވެ.
މި ޙާދިސާ ހިނގާފައިމިވަނީ މެދުއިރުމަތީގެ މަސްރަޙު ވަރަށް ބޮޑަށް ގޯސްވެ، ވައިގެ ދަތުރުފަތުރަށްވެސް ބޮޑެތި ނުރައްކާތަކެއް ކުރިމަތިވެފައިވާ ދަނޑިވަޅެއްގައެވެ. ދުބާއީ އާއި ތެލް އަވީވްއާ ދެމެދު ކުރާ ދަތުރުތަކަކީ ’އަބްރަހާމް އެކޯޑްސް‘ އެއްބަސްވުމުގެގެ ދަށުން ފެށި، ސަލާމަތީ ގޮތުން ވަރަށް ބޮޑަށް ފާރަވެރިވާ ދަތުރުތަކެކެވެ.
