މަގުމަތީގެ ސަލާމަތާއި ރައްކާތެރިކަން ކަށަވަރުކުރުމަށްޓަކައި، ޓްރެފިކް ގަވާއިދުތަކާ ތަކުރާރުކޮށް ހިލާފުވާ ފަރާތްތަކާމެދު ގާނޫނުގައި ކަނޑައެޅިފައިވާ އެންމެ ހަރުކަށި ފިޔަވަޅު އެޅުމަށް ކޮމިޝަނަރ އޮފް ޕޮލިސް އަޙުމަދު މުޙައްމަދު ދިވެހި ފުލުހުންގެ ހިދުމަތަށާއި ކަމާ ގުޅޭ މުއައްސަސާތަކަށް އަންގަވައިފިއެވެ.
ސީޕީ އަޙުމަދު މުޙައްމަދު ނެރުއްވި މެސެޖެއްގައި ވިދާޅުވީ، މަގުމަތީގެ އާންމު ޓްރެފިކް އުސޫލުތަކަށާއި، އަދަބުތަކަށް ބޯނުލަނބާ ބައެއް ފަރާތްތަކުގެ ސަބަބުން ގިނަ ބައެއްގެ ހައްގުތަކެއް ގެއްލި, ނުރައްކާތެރި އެކިއެކި ހާދިސާތައް ތަކުރާރުކޮށް ހިލާފުވާ ފަރާތްތަކާމެދު ހާއްސަ ފިޔަވަޅުތަކެއް ފުލުހުންގެ ފަރާތުން އަޅަމުންދާނެ ކަމުގެ ޔަގީންކަން ދެއްވާ ކަމަށެވެ.
”މި ފިޔަވަޅުތަކުގެ މައިގަނޑު މަގުސަދަކީ އެންމެހައި ރައްޔިތުންނަށް މަގުމަތީގެ އަމާންކަމާއި ރައްކާތެރިކަން ކަށަވަރުކޮށްދިނުމާއި މަދު ބައެއްގެ ޒިންމާދާރުކަން ކުޑަ އަމަލުތަކުގެ ސަބަބުން ތަކުރާރުކޮށް ހިނގަމުންދާ މިފަދަ ނުރައްކާތެރި ހާދިސާތައް ހުއްޓުވުމަށް އެޅެންހުރި އެންމެ ހަރުކަށި ފިޔަވަޅުތައް އެޅުން ކަމުގައި ދަންނަވަމެވެ. އަދި މި ފިޔަވަޅުތައް ކަމާ ގުޅުންހުރި އެންމެހައި މުއައްސަސާތަކާ ގުޅިގެން އެންމެ މަތީ ދަރަޖައެއްގައި އަޅަމުންދިޔުމަށް ފުލުހުންގެ ކަމާބެހޭ އެންމެހައި ބަހާތަކަށް އަޅުގަނޑު މިހާރު ވަނީ އަންގައިފައެވެ.“ – ސީޕީގެ މެސެޖުގައިވެއެވެ.
ސީޕީ ވިދާޅުވީ، މި ފިޔަވަޅުތައް މާލޭ ސަރަހައްދުގެ އިތުރުން އަތޮޅުތެރޭގެ ރަށްރަށުގައިވެސް އަޅަމުން ގެންދާނެ ކަމަށެވެ. އަދި މިކަމުގައި އެންމެހައި ފަރާތްތަކުގެ އެހީތެރިކަމާއި އެއްބާރުލުން ދިވެހި ފުލުހުންނަށް ދިނުމަށް އިލްތިމާސްކުރާ ކަމަށެވެ.
މަގުމަތީގެ ސަލާމަތާއި ރައްކާތެރިކަން ކަށަވަރުކުރުމަށްޓަކައި، ޓްރެފިކް ގަވާއިދުތަކާ ތަކުރާރުކޮށް ހިލާފުވާ ފަރާތްތަކާމެދު ހަރުކަށި ފިޔަވަޅު އެޅުމާ ގުޅޭގޮތުން ކޮމިޝަނަރ އޮފް ޕޮލިސް ދެއްވި މެސެޖު pic.twitter.com/mfFLxF7hxT
— Maldives Police (@PoliceMv) September 29, 2026
ސީޕީ އަޙުމަދު މުޙައްމަދު މިފަދަ އެންގެވުމެއް އަންގަވާފައިވާއިރު، ފާހަގަކޮށްލަންޖެހޭ ކަމަކީ މިފަހުން މާލެ ސަރަހައްދުގައި އެކްސިޑެންޓުތައް ހިނގާ މިންވަރު ވަނީ ވަރަށް ބޮޑުތަނުން އިތުރުވެފައެވެ. މިފަދަ އެކްސިޑެންޓްތަކުގެ ސަބަބުން މީހުންނަށް ބޮޑެތި އަނިޔާވެ، ދެ މީހަކާއި ކުޑަކުއްޖެއް ވަނީ ނިޔާވެސްވެފައެވެ.
