ރ. އަނގޮޅިތީމުގައި ގެއަކަށް ވަދެ އުމުރުން 72 އަހަރުގެ އަންހެނަކަށް ގަދަކަމުން ޖިންސީ ގޯނާކުރުމަށްފަހު މަރާލާނެކަމުގެ އިންޒާރު ދިން ކަމަށް ތުހުމަތުކުރެވޭ މައްސަލައިގައި 44 އަހަރުގެ ދިވެހި ފިރިހެނަކު ކޯޓު އަމުރެއްގެ ދަށުން ފުލުހުން ހައްޔަރުކޮށްފިއެވެ.
މި ހާދިސާއާ ގުޅިގެން ފުލުހުން ބުނެފައިވަނީ، އަނގޮޅިތީމު ގެއަކަށް ވަދެ އުމުރުން ދުވަސްވީ އަންހެނަކަށް ގަދަކަމުން ޖިންސީ ގޯނާކޮށް މަރާލާނޭ ކަމަށް ބުނެ އިންޒާރުދިން މައްސަލައެއް ފުލުހުންނަށް ހުށަހަޅާފައިވަނީ މިދިޔަ އާދިއްތަ ދުވަހުގެ ރޭ 8:30 ހާއިރު ކަމަށެވެ.
މި އަނިޔާ ލިބުނު އުމުރުން ދުވަސްވީ އަންހެން މީހާއަށް އަނގޮޅިތީމު ހެލްތު ސެންޓަރުގައި ސިއްހީ ފަރުވާ ދިނުމަށްފަހު، އެ ސެންޓަރުން މިހާރު ވަނީ ދޫކޮށްލާފައެވެ.
މި މައްސަލައާ ގުޅިގެން ކޯޓު އަމުރެއްގެ ދަށުން އިއްޔެ ރޭގެ ވަގުތެއްގައި ތުހުމަތުކުރެވޭ މީހާ ހައްޔަރުކޮށްފައިވާއިރު، ފުލުހުން ދަނީ މި މައްސަލަ އިތުރަށް ތަހުގީގު ކުރަމުންނެވެ.
