ވ. އާރަށު މައްސަލައިގައި ކުރީގެ ރައީސް ޢަބްދުﷲ ޔާމީން ޢަބްދުލްޤައްޔޫމްގެ މައްޗަށް އުފުލާފައިވާ ދައުވާތަކާ ގުޅިގެން ސުޕްރީމް ކޯޓުގައި މައްސަލައެއް އޮތުމުން، ކްރިމިނަލް ކޯޓުގައި މަޑުޖައްސާލާފައި އޮތް އެ މައްސަލައިގެ ޝަރީއަތް އަލުން ފަށައިފިއެވެ.
އާރަށް ކުއްޔަށް ދިނުމުގެ މުއާމަލާތާ ގުޅިގެން ރިޝްވަތު ހިފުމާއި މަނީ ލޯންޑްރިންގގެ ކުށް ސާބިތުވެ، ރައީސް ޔާމީންގެ މައްޗަށް އިއްވި 11 އަހަރުގެ ޖަލު ހުކުމް ހައިކޯޓުން ބާތިލުކުރުމަށްފަހު، އެ މައްސަލަ އަލުން ބެލުމަށް ވަނީ ކްރިމިނަލް ކޯޓަށް އަމުރުކޮށްފައެވެ. ނަމަވެސް، ހައިކޯޓުގެ ހުކުމުގައި އާ ހެކިތަކެއް ބަލައިނުގަނެވޭނެ ކަމަށް ކަނޑައަޅާފައިވާ ބައި ދައުލަތުން ސުޕްރީމް ކޯޓުގައި އިސްތިއުނާފު ކުރިއެވެ. ސުޕްރީމް ކޯޓުން އެ މައްސަލައިގައި ގޮތެއް ނިންމަންދެން ކްރިމިނަލް ކޯޓުގެ ޝަރީއަތް މަޑުޖައްސައިދިނުމަށް ރައީސް ޔާމީންގެ ފަރާތްޕުޅުން އެދިވަޑައިގަތުމުން، ކޯޓުން ވަނީ އެގޮތަށް ނިންމަވައިފައެވެ.
މި މައްސަލައިގައި ސުޕްރީމް ކޯޓުން ވެސް ހުކުމްކޮށްފައިވަނީ، ހައިކޯޓުގެ ނިންމުމަށް ތާއީދުކޮށް، ދައުލަތުން ހުށަހެޅި އާ ހެކިތައް ބަލައިނުގަނެވޭނެ ކަމަށެވެ. ސުޕްރީމް ކޯޓުން އެ މައްސަލަ ނިންމި ފަހުން، ކްރިމިނަލް ކޯޓުގައި އާރަށު މައްސަލައިގެ އަޑުއެހުމެއް ފުރަތަމަ ފަހަރަށް ތާވަލުކޮށް، މިއަދު ވަނީ ކުރިއަށް ގެންގޮސްފައެވެ. މިއަދުގެ އަޑުއެހުމުގައި ކުރިއަށް ގެންގޮސްފައިވަނީ ޝަރީއަތުގެ ކުރިން ހުށަހަޅާ ހުށަހެޅުންތަކާ ގުޅޭގޮތުން ވާހަކަދެއްކުމެވެ.
އާރަށު މައްސަލައިގައި ރައީސް ޔާމީންގެ އިތުރުން، ރައްޔިތުންގެ މަޖިލީހުގެ ފެލިދޫ ދާއިރާގެ ކުރީގެ މެންބަރު ޔޫސުފް ނަޢީމްގެ މައްޗަށް ވެސް ކްރިމިނަލް ކޯޓުން ޖަލު ހުކުމެއް އިއްވިއެވެ. ނަމަވެސް، ހައިކޯޓުން ވަނީ އެ ހުކުމް ވެސް ބާތިލުކޮށް، އެ މައްސަލަ ވެސް އަލުން ބެލުމަށް އަމުރުކޮށްފައެވެ.
ފާހަގަކޮށްލެވޭ ގޮތުގައި، ރ. ފުއްގިރި ކުއްޔަށް ދޫކުރުމުގެ މުއާމަލާތާ ގުޅިގެން ރިޝްވަތު ހިފުމާއި މަނީ ލޯންޑްރިންގގެ ތުހުމަތުގައި ރައީސް ޔާމީންގެ މައްޗަށް ދައުލަތުން އުފުލާފައިވާ ދައުވާތަކުގެ ޝަރީއަތް ވެސް ކްރިމިނަލް ކޯޓުގައި ދަނީ ހިނގަމުންނެވެ. އެ މައްސަލައިގައި މިދިޔަ ހަފުތާއަށް ތާވަލުކުރި އަޑުއެހުން ވަނީ ކެންސަލްކޮށްފައެވެ. ފުއްގިރި މައްސަލައިގައި ރިޝްވަތުގެ ގޮތުގައި އެއް މިލިއަން ޑޮލަރު ގަބޫލުކުރައްވައި، އެ ފައިސާ ލޯންޑަރ ކުރެއްވި ކަމަށް ބުނާ މައްސަލައިގެ ހެކިބަސް ނެގުމުގެ މަރުހަލާ މިހާރު ވަނީ ނިމިފައެވެ. އަދި ޝަރީއަތް މިހާރު އޮތީ ހެއްކާ ބެހޭގޮތުން ވާހަކަދެއްކުމުގެ މަރުހަލާގައެވެ.
ނަމަވެސް، މި މަރުހަލާގައި މައްސަލަ މަޑުޖެހިފައި އޮންނަތާ މިހާރު ގިނަ ދުވަސްތަކެއް ވަނީ ވެފައެވެ.
