ކޫރިއާ މެދުވެރިކޮށް ރާއްޖެ ގެނެސްފައިވާ ދެ ޕެކޭޖެއްގެ ތެރޭގައި ފޮރުވައިގެން އެތެރެކުރަން އުޅުނު 11.7 ކިލޯއަށްވުރެ ގިނަ ކެނަބިސް މޯލްޑިވްސް ކަސްޓަމްސް ސާވިސްއިން އަތުލައިގެންފިއެވެ.
ކަސްޓަމްސްއިން މަޢުލޫމާތު ދީފައިވާ ގޮތުގައި މި ތަކެތި އަތުލައިގެންފައިވަނީ މި ހިނގާ ސެޕްޓެމްބަރު މަހުގެ 7 ވަނަ ދުވަހު، ވެލާނާ އިންޓަނޭޝަނަލް އެއާޕޯޓުންނެވެ. އެ ތަކެތި އަތުލައިގަތީ ކޫރިއާ މެދުވެރުކޮށް ގެނެސްފައިވާ ދެ ޕެކޭޖެއް ބަލައި ފާސްކުރަމުން ދިޔައިރު، އޭގެ ތެރޭގައި މަސްތުވާތަކެތި ފޮރުވާފައި ހުރި ކަމަށް ޝައްކުކުރެވިގެން އިތުރަށް ޗެކުކުރުމުގެ ތެރޭގައެވެ.
މި މައްސަލައާ ގުޅިގެން މިހާތަނަށް މީހަކު އަތުލައިގަތް ކަމެއް ނުވަތަ ނޫން ކަމެއް ކަސްޓަމްސްއިން ހާމަކޮށްފައެއް ނުވެއެވެ.
ރާއްޖޭގައި މަސްތުވާތަކެތީގެ މައްސަލަތައް އިތުރުވަމުންދާއިރު، ހަށިގަނޑުގައި ފޮރުވައިގެންނާއި ކޫރިއާ މެދުވެރިކޮށް ޕެކޭޖުތަކުގައި މަސްތުވާތަކެތި އެތެރެކުރަން އުޅޭ މައްސަލަތައް ދޭތެރެދޭތެރެއިން އަންނަނީ އަތުލައިގަންނަމުންނެވެ. އަދި މިފަދަ މައްސަލަތައް ހައްލުކުރުމަށް ސަރުކާރުން ދަނީ މަސައްކަތްތަކެއް ކުރަމުންނެވެ.
