ދުނިޔޭގެ ފަތުރުވެރިކަމުގެ ދާއިރާގައި ދެވޭ އެންމެ ޝަރަފުވެރި އެއް އެވޯޑު ކަމަށްވާ ވޯލްޑް ޓްރެވަލް އެވޯޑްސްގެ ”އިންޑިއަން އޯޝަންސް ލީޑިންގް އެއާޕޯޓު 2026“ ގެ ލަގަބު ރާއްޖޭގެ މައި ދޮރާށި، ވެލާނާ އިންޓަނޭޝަނަލް އެއާޕޯޓު (ވީއައިއޭ) އިން ކާމިޔާބުކޮށްފިއެވެ.
މިއީ ސަރަހައްދީ ފެންވަރުގައި ދެވޭ މި ޝަރަފުވެރި އެވޯޑު ވެލާނާ އިންޓަނޭޝަނަލް އެއާޕޯޓުން ކާމިޔާބުކުރި 13 ވަނަ ފަހަރެވެ.
އެއާޕޯޓު ހިންގާ މޯލްޑިވްސް އެއާޕޯޓްސް ކޮމްޕެނީ ލިމިޓެޑް (އެމްއޭސީއެލް) އިން ބުނި ގޮތުގައި މިއީ ވީއައިއޭ އަދި އެ ކުންފުންޏަށް ލިބުނު ވަރަށް ބޮޑު ފަޚުރެއްގެ އިތުރުން ފާހަގަކޮށްލެވޭ މުހިންމު ތާރީޚީ ކާމިޔާބީއެކެވެ.
ރާއްޖޭގެ ފަތުރުވެރިކަމުގެ ދާއިރާ ކުރިއެރުވުމަށާއި، އެއާޕޯޓުން ފޯރުކޮށްދޭ ޚިދުމަތްތަކުގެ ފެންވަރު މަތިކޮށް ފުރިހަމަކުރުމަށް އެމްއޭސީއެލްއިން ކުރަމުންދާ މަސައްކަތްތަކަށް މި އެވޯޑުގެ ސަބަބުން އިތުރު ހިތްވަރެއް ލިބި، ބައިނަލްއަޤްވާމީ ދާއިރާގައި ރާއްޖޭގެ މަގާމު އިތުރަށް ވަރުގަދަވެގެންދާނެއެވެ.
